Ni Sa Ravuta na Matavuvale na iYaloyalo Vakasisila—Dodonu Me Rau Vakabulai Ruarua o Tama kei Tina
Au sa raica sara ga na kaukauwa ni veivakacegui ni iVakabula vei ira na tina vakakina na tama ni sa vesuki voli ena iyaloyalo vakasisila o Tama.
iTaba vakaraitaka o ira na modela.
Ena loma ga ni ono na vula na noqu a kacivi meu bisopi era lewe levu na veiwatini ena noqu tabanalevu era lako mai vei au me ra mai wasea na nodra vesuki voli ena iyaloyalo vakasisila o tama. Ena so na kisi sa bau kidrowa sara ga o tina ni mai rogoca na itukutuku vuni era sa kila lo tu mai e lewe levu ena vica vata na vula se yabaki.
Au sa bau vakasinaiti sara ga ena loloma levu vei ira na veiwatini oqo ka sa vakila tu na loloma kaukauwa ni iVakabula niu sa dabe yadudua kei ira na tagane meu vukei ira mera “kureitaka tani na sinucodo … o koya sa vesuki [kemudou] matua” (2 Nifai 9:45).
Sa na rairai ka dina beka ni sa sovaraki yauyau mai na Yalotabu ena gauna au dabe yadudua kina kei ira na watidra yalewa. Au sa raica ni so na mavoa e se ka vou e so sa dede mai na kena sa veivesuki voli mai ena vica vata na yabaki, ni o ira kece na yalewa oqo era sa lako curuma tiko mai e dua na mavoa vakayalo ka vakavuna na taro vakaoqo, “Na cava au a cakava me vakavuna na nona sa sega ni dau malele kina mai vei au?” se “Na cava me laki vakananumi koya tiko kina kei na duatani tale ka sega ni vata kei au?”
Me vaka ni o tama sa vakacalai tiko mai, sa na rawarawa kina vei bisopi me vakila ni o tama e vinakata vakalevu cake na idola ni veisereki ni veivakabulai kauwakauwa ni iVakabula, ia au sa mai vulica ni o tina talega ena gadreva vakalevu na veivakabulai mai na mosi kei na mosi me vaka ga vei tama ena nona gadreva na veivakabulai kei na veisereki ni ivalavala ca kei na vakanananu lo.
Ena nona vosa vei ira na Nifai, na Parofita o Jekope ka cudruvi ira kina na tagane ena vuku ni nodra tawa yalodina vei ira na watidra, ni vuqa vei ira [era] sa yalolokumi sara ka yalosavasava ka malumalumu ena mata ni Kalou, ka sa taleitaki vua na Kalou (Jekope 2:7). E a tomana ka kaya: Dou sa voroka na lomadra na watimudou sa yalomalumalumu, ka vakacacana na nodra nuitaki kemudou ko ira na luvemudou, ena vuku ni nomudou ivakaraitaki ca e matadra; ka sa cabe cake vua na Kalou na tagi ni lomadra me beitaki kemudou (Jekope 2:35). Au sa raica sara ga qo e mataqu, na nodra tagiyaso. Era sa dau vakavotui sara ga mai ka sega ena momosi ni yalo e tu vei tina baleta na veivuni voli mai nei tama ena vakayagataki ni iyaloyalo vakasisila, ia sa dau basika sara ga baleta na veivosa e dau vakayagataki ka vakavuna na kena vakayagataki tiko kei na sasaga lo e lomadra. E sega ni ka vuni na dina, ni dua na tamata sa kilai na nona ivunivuni me dau bilitaki o watina baleta na nona ivakarau ka dau tukuni e so na ka sa dau cakava o watina yalewa se dausega ni cakava, sa sega talega ni ka vuni me vakadinadinataka o yalewa na veika vaka o ya kei na veidusi sa dau vakayacori.
Dua na veiwatini e rau a dabe ena noqu valenivolavola ni oti ga e vica na siga na nona sa vakaraitaka o tagane ni sa vesuki voli mai ena iyaloyalo vakasisila mai na gauna ni nona cauravou. Ena noqu vakarogoca voli mai e dua na lesoni ni iSoqosoqo ni Veivukei ka yavutaki mai na vosa nei Sisita Linda S. Reeves ena koniferedi raraba ni Epereli, 2014 “Taqomaki mai na iYaloyalo Vakasisila—Matavuvale Vakaliuci Karisito,” sa tekivu raica na watina yalewa na ivakarau iwatina tagane ena veika e sa veivosakitaki tiko mai ena vosa e vakamacala tiko kina o dauniveituberi. Ni oti ga na lesoni sa tarogi watina tagane sara ena taro ka sa mani tukutuku vakadodonu mai o watina ena veika e a vunitaka tu mai vakadede. Na nona bula e loma ka sa mavoa tu mai sa qai bibi ga na kena icolacola ena cudru waqawaqa. Ena imatai ni nodrau mai sota vata kei au, erau sasaga me rau kila se na rawa ni vakabulai nodrau bula vakawati. Au vakadeitaka vei rau ni tiko na inuinui, ka vakasalataki rau ka mai sureti rau me rau lesu tale mai ka mai raici au yadudua.
Ni salavata voli mai kei na masu au dau cabora ena vakarautaki ni mai veisotari vaka oya, au a railesuva talega na vakatutu e tiko ena Ministering Resourcesena lds.org, vakabibi ena ivurevure baleta na nodra tokoni na watidra o ira era vakayagataki ni iyaloyalo vakasisila, kau wilika kina vei ira na veika oqo: “Vakaraitaka na nomu loloma kei na nanamaki baleti tina vakataki koya, vakatalega kina o watina tagane. Vakadeitaka ni o koya e sega ni vakavuna na nona mai vesuki ena iyaloyalo vakasisila o watina tagane se ivakarau sega ni vinaka ka na sega ni namaki vua me vosota taudua voli nona ivakarau.”
Niu taura matua na ivakasala oqo ka vakuria ena noqu kaya ni ka e cakava o watina tagane e sega ni baleti koya sega ni ka e cakava se sega ni cakava, ia o watina kei na nona leqa vakataki koya. Au a sarava toka na kena sa luvuci koya na ibalebale ni ka au vakaraitaka o ya vua ka vakila na veitokoni ni Yalotabu me vakadeitaka vua na dina ni veika au tukuna vua. Ni sa mai cava na veivakatarogi e qai kerea meu solia vua e dua na veivakalougatataki ni matabete. Au qai vakila mai ni o au duadua ga ena rawa meu solia vua na veivakalougatataki vaka o ya ma vaka ni vinakata o koya me maroroi na itukutuku ni veika e yaco tiko mai vei ira na itokani kei na matavuvale.
Me vukea na veivuke ni veisereki au a sureti watina tagane me na tiko ena dua na soqoni ni veisereki mai na veivakatotogani ni Yalododonu Edaida kau sureti watina yalewa talega me tiko ena soqoni vata o ya baleti ira na itokani kei na matavuvale. Mai tukuna o koya vei au na vakacegu e vakila ni sotavi ira na marama ka ra kila vinaka na rarawa e colata voli kei na vakanuinui e solia vua ni raici ira na veiwatini ka ra sa lako curuma oti mai na buca ni yaloyalo ni mate ka sa ra vakabulai oti mai kina.
Sa oti oqo e vica vata na vula na noqu a sotavi rau na veiwatini oqo ka sa tubucake sara ga na noqu loloma kei na noqu kauwai baleti rau ena vuku ni neitou sa daumai veiwasei vakawasoma. Niu a vakila ni na sega ni galala mai na veigauna ni rarawa na ilakolako vou era sa tekivu lakova sa vu ni reki vei au niu sa kila ni sa qai sega tale ni lesuva o Watina tagane na dodomo lo kei na iyaloyalo vakasisila kei na watina yalewa ena nona sa vakila na veisereki kei na yalodei ni sa laurai votu sara ga.
Na vica na veivakatarogi se qai yaco oti ga oqo kei rau sa yali na mata tagitagi kei na yalorarawa ka sa basika na matadredredre kei na veiwali. Ia na kena e tiko duadua e cake na vakanuinui—na vakanuinui ni na sega walega ni vakabulai nodrau bula vakawati ia ena yaco sara me dua na ka e rairai totoka ka vakalou na kena irairai.
Au raica rawa na kena o ya, ia e sega ni o ira kece na veiwatini vakaoqo era sotava na itinitini vata vaka o ya. E so na veiwatini ena tini koso ni sega ni rawa vei koya e vakayagataka tiko na iyaloyalo vakasisila me tosoya na nona itosotoso. Sega soti ni dua na ka kevaka me sega ni veitokoni ena ituvatuva vakaoqo o watina tagane, ia au sa vulica ni ivakasala me ra vukei talega na watina yalewa sa ka e veivakauqeti dina. Au sa nuitaka ni na sega ni dua na marama vakaoqo e nanuma ni sa guilecavi, sega ni kauwataki mai vei nona bisopi lewai se nanumi cala. Na bisopi e veivakasalataki ena idola e tiko vua ka na salamuria mai na kaukauwa ni Nona rawa ni veivakabulai na iVakabula me tara e dua na yalo—o ira sara mada ga era sa “vakamavoataki vaka ca” (Jekope 2:35).
E ra: E a lomaleqa o Kerri ni sa mai rogoca ni o watina e tiko na nona bolebole baleta na iyaloyalo vakasisila ia e tiko nona vakanuinui kei na veivakacegui kei na veivakabulai vei Jisu Karisito kei na Nona Veisorovaki.