iTukutuku ni Mataveiliutaki Taumada
Parofisai kei na iVakatakila Yadua
Mai vei Peresitedi Henry B. Eyring
Matai ni Daunivakasala ena Mataveiliutaki Taumada
Sa vakalesui mai na Lotu i Jisu Karisito dina ka sa tiko e vuravura edaidai. Na Lotu i Jisu Karisito ni Yalododonu Edaidai e sa dau liutaki tu ga mai vei ira na parofita kei na iapositolo, ka ra dau ciqoma tu ga na idusidusi mai lomalagi.
Na ituvatuva vakalou o ya sa ka dina sara mai na gauna makawa. Eda vulica mai na iVola Tabu: “E dina ena sega ni vakayacora e dua na ka na Turaga ko Jiova, ena vakaraitaka mada ga na nona vosa vuni vei ira na nona italatala na parofita” (Emosi 3:7).
Sa tekivu rogo tale na domo ni Kalou ena noda gauna, vua na Parofita o Josefa Simici. Sa vakatakila o Koya na taucoko ni kosipeli i Jisu Karisito kivei Josefa Simici. E a vakalesuya mai na Nona matabete tabu vata na kena idola kei na kena dodonu, kaukauwa, kei na itavi ni kaukauwa tabu ni matabete.
Ena noda gauna, sa vakadonui vei ira na parofita kei na iapositolo bula voli mera vosa, veivakavulici, ka veiliutaki ena dodonu ni lewa mai vua na Kalou na Tamada kei na Turaga o Jisu Karisito. A kaya na iVakabula kivua na Parofita, “Koi au na Turaga; raica na ka ga au sa tukuna au sa tukuna, kau na sega ni vakaiulubale kina; raica ena takali mada ko lomalagi kei vuravura, ia na noqu vosa ena sega ni takali, ena vakayacori vakaidina na vosa kau sa tukuna, se ra tukuna na noqu tamata” (V&V 1:38).
Ena koniferedi raraba ka dau caka vakarua ena veiyabaki, eda kalougata ni soli vei keda na madigi meda rogoca na vosa ni Turaga vei keda mai vei ira na Nona lumuti. O ya e dua na madigi ka sega na ilavo me sauma rawa. Ia na dina ni madigi o ya ena vakatau ena noda ciqoma na vosa ena veivakayarayarataki ni Yalo vataga era a soli kina vei ira na lumuti oya (raica na V&V 50:19–22). Me vaka ga noda ciqoma na ivakasala mai lomalagi, sa dodonu me vaka talega kina. O ya ena gadrevi kina me tiko vei keda na Yalo vataga o ya.
“Cakava Nomu Cakacaka e Vale”
Ena vica vata na yabaki sa oti e a kerei au kina e dua na lewe ni Kuoramu ni iApositolo Le Tinikarua meu wilika e dua na vosa ni koniferedi sa vakarautaka tiko me baleta na koniferedi raraba. Au a se lewe ni kuoramu vou kina. Au a vakavinavinaka ni yalodina vei au meu vukei koya ena vaqarai ni vosa me na vakadonuya na Turaga me tukuna. E a kaya mai ena matadredredre, “Oilei, qo sa ika 22 ni kena vakatovotovotaki tiko na vosa oqo.”
Au nanuma na ivakasala e a solia o Peresitedi Harold B. Lee (1899–1973) vei au ena vakatabataba: “Hal, kevaka o gadreva na ivakatakila, cakava nomu cakacaka e vale.”
Au a wilika, vakananuma vakatitobu, ka masulaka na ika 22 ni ilavelave. Au a vuli ena kena levu duadua ena veituberi ni Yalo Tabu. Ena gauna qai solia kina nona vosa na lewe ni kuoramu o ya, au sa cakava oti noqu cakacaka mai vale. Au sega ni vakadeitaka seu sa veivuke, ia au kila niu sa veisau ena gauna au qai rogoca kina na vosa. Na itukutuku e yaco mai vei au e levu cake sara mai na vosa au a wilika kei na kena au a rogoca ni a kaya mai. Na vosa a vakaibalebale sara vakalevu mai na kena au a wilika ena ilavelave. Na itukutuku sa baleti au sara ga ka sa sotava sara ga na veika au a gadreva voli mai.
O ira na italai ni Kalou era lolo ka masumasu mera ciqoma na itukutuku ena vinakata o Koya mera laki tukuna vei ira ka gadreva tu na ivakatakila kei na veidusimaki. Na ka au vulica mai na veika au a sotava o ya kei na vica tale au sa sotava oti sa ikoya meda sa na vakarau sara ga vakavinaka ena noda laki rogoci ira na parofita kei na iapositolo me rawa ni da rogoca ka kila na ivakatakila e baleti keda.
Na Turaga e lomana kecega na tamata era via rogoca na Nona itukutuku ka kila vinaka na lomadra kei na nodra ituvaki o ira kece e vaka tu o ya. E kila na veivakadodonutaki, na veivakatatacaketaki, kei na dina ni kosipeli cava ena vukea vinaka na tamata yadua me digitaka na nona sala ena salatu ni bula tawamudu.
O keda eda rogoca ka sarava na itukutuku ni koniferedi raraba eda dau qai vakasamataka tu e muri, “Na cava au se nanuma vinaka tu ga?” Sa nuitaka tu na Turaga ni noda dui isaunitaro ena vaka oqo: “Au na sega ni guilecava vakadua na gauna au vakila kina na domo ni Yalotabu ena noqu vakasama kei na yaloqu ka tukuna tiko vei au na ka au na rawa ni cakava meu vakalomavinakataka kina na Tamada Vakalomalagi kei na iVakabula.”
Eda rawa ni ciqoma na ivakatakila o ya ni da sa rogoci ira na parofita kei na iapositolo kei na noda cakacaka tiko ena vakabauta meda ciqoma me vaka ga e a kaya o Peresitedi Lee ni da na rawata. Au kila ni dina oya mai na veika o ni sa sotava kei na ivakadinadina ni Yalotabu.