Vakasaqarai ni iSolisoli Vakayalo

Mai vei Peresitedi George Q. Cannon (1822-1901)

Matai ni Daunivakasala ena Mataveiliutaki Taumada

Mai na Latter-day Saints Millennial Star, 23 ni Epereli 1894. 258-61; vakacokotaki ena kena ivakarau na panutueti kei na matanivola levu.

E vica vei kemuni sa vakasaqara tiko na isolisoli oqo ka sa yalataka oti tu na Kalou ni na solia?

Na tagane kei na yalewa kece ena Lotu i Karisito sa rawa ni nodra na isolisoli ni Yalo ni Kalou ka na soli ena itagede ni vakabauta kei na loma ni Kalou …

E vica vei kemuni … sa vakasaqara tiko na isolisoli ka sa yalataka oti tu na Kalou ni na solia? E vica vei kemuni ni sa cuva e matana na Tamada Vakalomalagi ena loma ni nomuni matavuvale se ena nomuni tikina vuni ena vakasaqara na isolisoli oqo me na soli vei kemuni? E lewe vica vei kemuni e kerea vua na Tamada ena yaca i Jisu me vakaraitaki koya vei kemuni ena kaukauwa oqo kei na isolisoli oqo? Se o ni lako tu ga ena veisiga me vaka e dua na katuba ena kena idi ka sega mada ga ni vakilai tu e dua na ka ni sega ni bulataki na vakabauta sa vinaka ni sa papitaiso ka sa lewena na Lotu ka mai vakacegu tu yani ena nanuma ni sa na rawa na veivakabulai baleta ni oqori na veika o sa cakava rawa. …

… Au kila ni Kalou sa tu vakarau me vakabula na tauvimate, sa tu vakarau talega me solia na isolisoli ni kila na veiyalo e so, na isolisoli ni vuku, ni kila ka kei na parofisai kei na so tale na isolisoli ena gadrevi. Kevaka e dua vei keda e tawadodonu, sa noda itavi meda masuta na isolisoli ka na vakavuna meda vinaka sara. E tiko li na noqu tawadodonu? E sinai tu oqo vei au Na cava noqu itavi? Meu masu vua na Kalou me solia vei au na isolisoli ni veivakadodonutaki. Kevaka meu dua na tamata cudrucudru, sa noqu itavi meu masuta na yalo ni dauloloma ka sa dau vosota vakadede ka yalovinaka. Au dua li na tamata dau vinakata na veika e so? Sa noqu itavi meu vakasaqara na yalo ni dauloloma ka sa sega ni daukocokoco. Sa vaka kina na isolisoli kece ni kosipeli Era sa nakiti oti mai mera mai vakayagataki ena veika oqo. Sega ni dodonu me kaya e dua na tamata, ‘Oi, au sa sega ni vosota rawa oqo; e sa matau vei au.’ E sega ni yalovakacegu kina okoya, ni vuna na Kalou e sa yalataka me solia na kaukauwa me vakadodonutaki kina na veika oqo, ka solia na isolisoli eso me na vaqeavutaki ira. Kevaka e dua na tamata sa sega vua na vuku sa nona itavi me kerea vua na Kalou na vuku. Sa vakakina na veika tale e so. Oya na ivakaro ni tatamusuki ni Kalou, baleta na Nona Lotu E vinakati ira na Nona Yalododonu mera na vakavinakataki ena veika dina. Oqo na inaki ni veisolisoli ka sa solia mai oqo vei ira era sa vakasaqara ena kena ituvatuva mera na rawata kina na bula sa vinaka sara ena delai vuravura ka sega ni namaki kina na nodra malumalumu baleta ni sa yalataka na Kalou ni na solia na isolisoli mera na vakavinakataki cake kina.