ព្រះវរបិតារបស់យើង អ្នកប្រៀនប្រដៅរបស់យើង

ដោយ ប្រធាន ឌៀថើរ អេស្វ អុជដូហ្វ

ទីប្រឹក្សាទីពីរក្នុងគណៈប្រធានទីមួយ

តើអ្នកធ្លាប់បើកប្រអប់មួយ ហើយទាញយកសេចក្តីណែនាំដំឡើងឧបករណ៍នោះ ហើយគិតថា « សេចក្តីណែនាំនេះមើលមិនយល់ទាល់តែសោះ ? »

ពេលខ្លះ ទោះបីជាយើងមានចេតនា និង មានទំនុកចិត្តក្នុងខ្លួនយ៉ាងល្អបំផុតក្តី យើងបានដកផ្នែកមួយចេញមក ហើយសួរថា « តើផ្នែកនេះសម្រាប់ធ្វើអ្វី ? » ឬ « តើដាក់យ៉ាងដូចម្តេចទើបត្រឹមត្រូវ ? »

យើងខកចិត្តខ្លាំងឡើងៗ នៅពេលយើងមើលប្រអប់នោះ ហើយឃើញថា មានក្រដាសព្រមានមួយដែលនិយាយថា « ការដំឡើងនេះតម្រូវឲ្យមនុស្ស—អាយុចាប់ពី ៨ឆ្នាំឡើងទៅ » ។ ដោយសារយើងនៅតែគ្មានតម្រុយ នោះសេចក្តីណែនាំនេះពុំបានបង្កើនទំនុកចិត្តរបស់យើង ឬ ការផ្តល់តម្លៃដល់ខ្លួនឯងឡើយ ។

ពេលខ្លះយើងមានបទពិសោធន៍ស្រដៀងគ្នានេះជាមួយដំណឹងល្អ ។ នៅពេលយើងក្រឡេកមើលទៅផ្នែកមួយចំនួននៃដំណឹងល្អ យើងប្រហែលជាយកដៃអេះក្បាលខ្លួន ហើយឆ្ងល់ថាតើផ្នែកនោះសម្រាប់អ្វី ។ ឬ នៅពេលយើងពិនិត្យមើលផ្នែកផ្សេងទៀត យើងអាចដឹងថា ទោះបីជាបន្ទាប់ពីការខំព្យាយាមយល់ពេញលេញពីវាក្តី យើងនៅតែពុំយល់ពីមូលហេតុដែលផ្នែកនោះត្រូវបានដាក់បញ្ចូលមកឡើយ ។

ព្រះវរបិតាសួគ៌របស់យើងគឺជាអ្នកប្រៀនប្រដៅយើង

សំណាងល្អ ព្រះវរបិតាសួគ៌របស់យើងបានប្រទាននូវសេចក្តីណែនាំដ៏អស្ចារ្យ សម្រាប់ការរៀបចំជីវិតរបស់យើង ហើយអាចប្រែកាន់តែល្អបំផុត ។ សេចក្តីណែនាំទាំងនោះដំណើរការទៅបានដោយគ្មានគិតពីអាយុ ឬ កាលៈទេសៈអ្វីឡើយ ។ ទ្រង់បានប្រទានដំណឹងល្អ និង សាសនាចក្រនៃព្រះយេស៊ូវគ្រីស្ទដល់ពួកយើង ។ ទ្រង់បានប្រទានផែនការប្រោសលោះ ផែនការនៃសេចក្តីសង្គ្រោះ ដែលជាផែនការនៃសុភមង្គល ។ ទ្រង់ពុំទុកយើងឲ្យនៅឯកោជាមួយនឹងភាពមិនប្រាកដប្រជា ឬ ឧបសគ្គនានានៃជីវិតនេះដោយមានបន្ទូលថា « ចូរឯងទៅចុះ ។ ចូរឲ្យមានសំណាងល្អ ។ ដោះស្រាយខ្លួនឯងចុះ » ។

ប្រសិនបើយើងគ្រាន់តែអត់ធ្មត់ ហើយមើលដោយមានចិត្តបន្ទាបខ្លួន ព្រមទាំងបើកគំនិត នោះយើងនឹងរកឃើញថាព្រះបានប្រទានឧបករណ៍ជាច្រើនដល់យើង ដើម្បីយល់បានកាន់តែប្រសើរឡើង អំពីសេចក្តីណែនាំដ៏ធំធេងរបស់ទ្រង់សម្រាប់សុភមង្គលរបស់យើងនៅក្នុងជីវិត ៖

ទ្រង់បានប្រទានដល់យើងនូវអំណោយទាននៃព្រះវិញ្ញាណបរិសុទ្ធដែលពុំអាចកាត់ថ្លៃបាន ដែលមានសក្តានុពលក្លាយជារបស់ផងយើង អ្នកណែនាំបង្រៀនពីសួគ៌ានៅពេលយើងសិក្សាព្រះបន្ទូលរបស់ព្រះ ហើយព្យាយាមពាំនាំគំនិត និង ទង្វើនានារបស់យើងឲ្យស្របទៅនឹងព្រះបន្ទូលរបស់ទ្រង់ ។
ទ្រង់បានប្រទានឱកាសនិយាយជាមួយទ្រង់២៤ម៉ោងក្នុងមួយថ្ងៃ ៧ ថ្ងៃក្នុងមួយសប្តាហ៍ តាមរយៈការអធិស្ឋានដោយសេចក្តីជំនឿ និង ការទូលអង្វរដោយស្មោះសរ ។
ទ្រង់បានប្រទានពួកសាវក និង ព្យាការីសម័យទំនើបនេះដល់ពួកយើង ដែលជាអ្នកបើកសម្តែងនូវព្រះបន្ទូលរបស់ព្រះនៅក្នុងសម័យយើងនេះ ហើយមានសិទ្ធិអំណាចចងភ្ជាប់ ឬ ផ្សារភ្ជាប់នៅលើផែនដី និង លើឋានសួគ៌ ។
ទ្រង់បានស្តារសាសនាចក្ររបស់ទ្រង់ឡើងវិញ—ដែលជាអង្គការមួយនៃពួកអ្នកជឿ ដែលធ្វើការរួមគ្នាដើម្បីជួយគ្នាទៅវិញទៅមក នៅពេលពួកគេធ្វើការសម្រាប់សេចក្តីសង្គ្រោះរបស់ខ្លួនដោយសេចក្តីភ័យខ្លាច ញាប់ញ័រ និង ដោយគ្មានក្តីអំណរ ។^១
ទ្រង់បានប្រទានព្រះគម្ពីរដ៏បរិសុទ្ធដល់យើង—ជាព្រះបន្ទូលរបស់ទ្រង់ដែលបានសរសេរទុកសម្រាប់យើង ។
ទ្រង់បានប្រទានធនធានជាច្រើននៃបច្ចេកវិទ្យាសម័យទំនើបនេះ ដើម្បីជួយយើងនៅក្នុងដំណើរនៃភាពជាសិស្សនេះ ។ ធនធានដ៏អស្ចារ្យជាច្រើនទាំងនេះអាចស្វែងរកបាននៅក្នុងគេហទំព័រ LDS.org ។

ហេតុអ្វីព្រះវរបិតាសួគ៌ប្រទានជំនួយយ៉ាងច្រើនដល់យើង ? ដោយសារទ្រង់ស្រឡាញ់ពួកយើង ។ ហើយដោយសារដូចដែលទ្រង់បានមានព្រះបន្ទូលដោយព្រះអង្គទ្រង់ថា « នេះហើយជាកិច្ចការរបស់យើងនិង សិរីល្អរបស់យើង—គឺដើម្បីនាំឲ្យមានអមតភាព និង ជីវិតដ៏នៅអស់កល្បជានិច្ចដល់មនុស្ស » ។^២

និយាយម្យ៉ាងទៀតថាព្រះវរបិតាសួគ៌គឺជាព្រះរបស់យើង ហើយព្រះគឺជាអ្នកប្រៀនប្រដៅយើង ។

ព្រះវរបិតាគង់នៅស្ថានសួគ៌ជ្រាបពីសេចក្តីត្រូវការរបស់កូនចៅទ្រង់ជាងអ្នកណាៗទាំងអស់ ។ វាគឺជាកិច្ចការ និង ជាសិរីល្អរបស់ទ្រង់ ដើម្បីជួយយើងជានិច្ច ដោយប្រទាននូវធនធានខាងសាច់ឈាម និង ខាងវិញ្ញាណដ៏អស្ចារ្យដល់ពួកយើង ដើម្បីជួយយើងនៅលើមាគ៌ាឆ្ពោះទៅកាន់ទ្រង់វិញ ។

ឪពុកគ្រប់រូបគឺជាអ្នកប្រៀនប្រដៅ

នៅប្រទេសមួយចំនួនទៀតលើពិភពលោក ឪពុកត្រូវបានគោរពពីសមាជិកគ្រួសារ និង សង្គមនៅក្នុងខែមិថុនា ។ វាតែងតែល្អជានិច្ចដើម្បីគោរពឪពុកម្តាយរបស់យើង ។ ឪពុកធ្វើកិច្ចការល្អជាច្រើនសម្រាប់គ្រួសារខ្លួន ហើយមានបុគ្គលិកលក្ខណៈគួរឲ្យកោតសរសើរជាច្រើន ។ តួនាទីសំខាន់បំផុតចំនួនពីរដែលឪពុកមាននៅក្នុងជីវិតរបស់កូនៗខ្លួននោះគឺធ្វើជាគំរូល្អ និង ជាអ្នកប្រៀនប្រដៅកូនដ៏ល្អម្នាក់ ។ ឪពុកធ្វើកិច្ចការនានាលើសពីការគ្រាន់តែប្រាប់ដល់កូនៗខ្លួនអំពីអ្វីដែលត្រឹមត្រូវ ឬ ខុសឆ្គងទៅទៀត ពួកគាត់ធ្វើកិច្ចការលើសពីការគ្រាន់តែបោះក្បួនសៀវភៅឲ្យកូន ហើយរំពឹងឲ្យពួកគេដោះស្រាយជីវិតដោយខ្លួនឯងទៅទៀត ។

ឪពុកប្រៀនប្រដៅកូនៗដ៏មានតម្លៃរបស់ខ្លួន ហើយបង្ហាញគំរូល្អរបស់ពួកគាត់តាមរយៈការរស់នៅដោយស្មោះត្រង់ក្នុងជីវិត ។ ឪពុកពុំចាកចេញពីកូនៗរបស់ខ្លួនឲ្យនៅឯកោឡើយ ប៉ុន្តែរហ័សនឹងជួយកូនៗ ជួយលើកកូនៗរបស់ខ្លួនឡើងភ្លាមនៅពេលណាពួកគេជំពប់ជើងដួល ។ ហើយកិច្ចការឆ្លៀសវៃដែលត្រូវធ្វើនោះ គឺឪពុកអនុញ្ញតឲ្យកូនជួបនូវការលំបាក ដោយដឹងថានេះអាចជាវិធីមួយដ៏ល្អបំផុត សម្រាប់ឲ្យពួកគេរៀន ។

យើងទាំងអស់គ្នាគឺជាអ្នកប្រៀនប្រដៅ

អំឡុងពេលដែលឪពុកនៅលើផែនដីនេះធ្វើកិច្ចការទាំងនេះចំពោះកូនៗរបស់ខ្លួន ស្មារតីនៃការប្រៀនប្រដៅ គឺជាអ្វីមួយដែលយើងចាំបាច់ត្រូវផ្តល់ឲ្យដល់កូនចៅទាំងអស់របស់ព្រះ ដោយមិនគិតពីអាយុ ទីកន្លែង ឬ កាលៈទេសៈណាឡើយ ។ ចូរចងចាំថា កូនចៅរបស់ព្រះគឺជាបងប្អូនប្រុសស្រីរបស់យើង យើងទាំងអស់គ្នាគឺជាគ្រួសារអស់កល្បជានិច្ចតែមួយជាមួយគ្នា ។

នៅក្នុងស្មារតីនេះ ចូរឲ្យយើងទាំងអស់គ្នាក្លាយជាអ្នកប្រៀនប្រដៅ—ដោយមានឆន្ទៈខ្នះខ្នែងជួយ និង ជួយគ្នាទៅវិញទៅមកដើម្បីបានខ្លាំងពូកែ ។ ដោយសារយើងគឺជាពូជពង្សរបស់ព្រះ នោះយើងមានសក្ដានុពលដើម្បីប្រែក្លាយដូចជាទ្រង់ ។ ការស្រឡាញ់ព្រះ និង បងប្អូនរបស់យើង ការគោរពព្រះបញ្ញត្តិរបស់ព្រះ និង ការធ្វើតាមគំរូរបស់ព្រះគ្រីស្ទគឺជាផ្លូវតូច ហើយចង្អៀត ព្រមទាំងជាផ្លូវដែលពោរពេញដោយក្តីអំណរត្រឡប់ទៅកាន់វត្តមានរបស់ព្រះមាតាបិតាសួគ៌របស់យើងវិញ ។

ប្រសិនបើព្រះនៃសកលលោកនេះខ្វល់ខ្វាយជាខ្លាំងអំពីយើងនោះ ទ្រង់គឺជាអ្នកប្រៀនប្រដៅយើង ប្រហែលជាយើងអាចឈោងដៃទៅជួយបងប្អូនរបស់យើង ដោយមិនគិតអំពីពណ៌សំបុរ ពូជសាសន៍ ស្ថានភាពសង្គមសេដ្ឋកិច្ច ភាសា ឬ សាសនាឡើយ ។ ចូរឲ្យយើងក្លាយជាអ្នកប្រៀនប្រដៅដ៏បំផុសគំនិត ហើយប្រទានពរដល់ជីវិតនៃមនុស្សដទៃទៀត—ពុំមែនគ្រាន់តែដល់កូនចៅរបស់យើងផ្ទាល់ប៉ុណ្ណោះនោះទេ ប៉ុន្តែថែមទាំងប្រទានពរដល់កូនចៅទាំងអស់របស់ព្រះនៅទូទាំងពិភពលោកផងដែរ ។

ការបង្រៀនចេញពីសារលិខិតនេះ

អ្នកអាចចាប់ផ្តើមដោយសួរដល់អស់អ្នកដែលអ្នកបង្រៀន ឲ្យគិតពីគ្រាមួយនៅពេលដែលព្រះវរបិតាសួគ៌បានប្រៀនប្រដៅពួកគេ ។ បន្ទាប់មក អ្នកអាចសុំឲ្យពួកគេគិតអំពីភាពស្រដៀងគ្នារវាងគ្រាទាំងនោះ ទៅនឹងគ្រាណាមួយ ដែលពួកគេមានអារម្មណ៍ថាឪពុករបស់ខ្លួន នៅលើផែនដីនេះបានប្រៀនប្រដៅពួកគេ ។ សូមអញ្ជើញពួកគេឲ្យសរសេរភាពស្រដៀងគ្នានោះនូវរបៀបដែលពួកគេត្រូវបានប្រៀនប្រដៅ ។ អ្នកអាចអញ្ជើញពួកគេឲ្យព្យាយាមត្រងត្រាប់តាមអ្វីៗ ដែលពួកគេបានសរសេរ ដើម្បីធ្វើជាគំរូកាន់តែប្រសើរឡើងដល់មនុស្សដទៃទៀត ។