របៀប ជួយអ្នកផ្សព្វផ្សាយសាសនា

អែលឌើរ ដេវីឌ អេ បែដណា

ក្នុងកូរ៉ុមនៃពួកសាវកដប់ពីរនាក់

ដកស្រង់ចេញពីសុន្ទរកថានៅក្នុងសន្និសីទទូទៅ ខែ មេសា ឆ្នាំ ២០០៨ ។

យើងអធិស្ឋានយ៉ាងត្រឹមត្រូវសម្រាប់សុវត្ថិភាព និងភាពជោគជ័យរបស់អ្នកផ្សព្វផ្សាយសាសនានៅទូទាំងពិភពលោក ។ ហើយរឿងធម្មតានៅក្នុងការអធិស្ឋានរបស់យើង គឺជាសំណូមពរឲ្យអ្នកផ្សព្វផ្សាយសាសនាត្រូវបានដឹកនាំទៅរកមនុស្ស និងក្រុមគ្រួសារដែល ត្រូវបានរៀបចំឲ្យទទួលសារលិខិតនៃការស្ដាឡើងវិញ ។ ប៉ុន្តែ នៅទីបំផុត វាគឺជាទំនួលខុសត្រូវរបស់ខ្ញុំ និងទំនួលខុសត្រូវរបស់អ្នកដើម្បីស្វែងរកមនុស្សសម្រាប់ឲ្យអ្នកផ្សព្វផ្សាយសាសនាបង្រៀន ។ ពួកអ្នកផ្សព្វផ្សាយសាសនា គឺជាគ្រូបង្រៀនពេញម៉ោង អ្នក និងខ្ញុំគឺជាអ្នកស្វែងរកពេញម៉ោង ។ ហើយអ្នក និងខ្ញុំក្នុងនាមជាអ្នកផ្សព្វផ្សាយសាសនាពេញមួយជីវិត ពុំគួរធ្វើការអធិស្ឋានសុំពួកឲ្យអ្នកផ្សព្វផ្សាយសាសនាធ្វើកិច្ចការឲ្យយើងនោះទេ !

ប្រសិនបើអ្នក និងខ្ញុំអធិស្ឋានដោយអស់ពីចិត្ត ហើយសុំដោយសេចក្ដីជំនឿ ដូចជា យ៉ូសែប ស្ម៊ីធ—បើយើងអធិស្ឋានដោយមានការរំពឹងទុកថានឹងធ្វើ មិនត្រឹមតែនិយាយ—នោះកិច្ចការប្រកាសដំណឹងល្អនឹងដំណើរការទៅមុខ គួរឲ្យកត់សម្គាល់ ។ ការអធិស្ឋានដោយសេចក្ដីជំនឿ អាចរួមបញ្ចូលចំណុចសំខាន់មួយចំនួនដូចខាងក្រោម ៖

ថ្លែងអំណរគុណដល់ព្រះវរបិតាសួគ៌ សម្រាប់គោលលទ្ធិ និងពិធីបរិសុទ្ធទាំងឡាយ នៃការស្ដារដំណឹងល្អនៃព្រះយេស៊ូវឡើងវិញ ដែលនឹងនាំមកនូវសេចក្ដីសង្ឃឹម និងសុភមង្គលនៅក្នុងជីវិតរបស់ពួកយើង ។
ចូរសុំភាពក្លាហាន និងភាពមោះមុត ដើម្បីបើកមាត់របស់យើង និងចែកចាយដំណឹងល្អជាមួយនឹងក្រុមគ្រួសារ និងមិត្តភក្ដិរបស់យើង ។
សូមទទូចអង្វរដល់ព្រះវរបិតាសួគ៌ឲ្យជួយយើង សម្គាល់ឃើញបុគ្គល និងក្រុមគ្រួសារដែលនឹងទទួលយកការអញ្ជើញរបស់យើង ដើម្បីរៀនជាមួយអ្នកផ្សព្វផ្សាយសាសនានៅក្នុងផ្ទះរបស់យើង ។
សូមប្ដេជ្ញាធ្វើផ្នែករបស់យើង ក្នុងថ្ងៃនេះ និងសប្ដាហ៍នេះ ហើយសូមជំនួយដើម្បីយកឈ្នះភាពអន្ទះសា ការភ័យខ្លាច និងការស្ទាក់ស្ទើរ ។
សូមស្វែងរកអំណោយទាននៃការវិនិច្ឆ័យ—ឲ្យភ្នែកមើលឃើញ និងត្រចៀកស្ដាប់ឮនៅពេលដែលមានឱកាសផ្សព្វផ្សាយសាសនា ។
អធិស្ឋានយ៉ាងក្លៀវក្លាសុំកម្លាំង ដើម្បីធ្វើអ្វីដែលយើងគួរធ្វើ ។

អំណរគុណនឹងត្រូវបានធ្វើឡើង ហើយពរជ័យផ្សេងទៀតអាចត្រូវបានសុំ នៅក្នុងការអធិស្ឋានបែបនេះ ដែលនឹងត្រូវបានបញ្ចប់ទៅក្នុងព្រះនាមនៃព្រះអង្គសង្គ្រោះ ។ ហើយបន្ទាប់មកកិច្ចការដែលបានតែងតាំងនៃការអធិស្ឋាននោះនឹងបន្ត ហើយចម្រើនឡើង ។

គំរូដូចគ្នានៃការប្រាស្រ័យទាក់ទងបរិសុទ្ធ និង កិច្ចការដែលបានតែងតាំង អាចត្រូវបានអនុវត្តនៅក្នុងការអធិស្ឋានរបស់យើងសម្រាប់អ្នកក្រីក្រ និង អ្នកកំសត់ទុគត៌ អ្នកឈឺ និងអ្នកដែលរងទុក្ខវេទនា សម្រាប់សមាជិកគ្រួសារ និង មិត្តិភក្តិដែលកំពុងមានវិបត្តិ និង សម្រាប់អ្នកទាំងឡាយណាដែលពុំបានចូលរួមក្នុងការប្រជុំសាសនាចក្រ ។

ខ្ញុំសូមថ្លែងទីបន្ទាល់ថា ការអធិស្ឋានកាន់តែមានអត្ថន័យ នៅពេលដែលយើងសុំដោយចិត្តជឿ ហើយធ្វើតាម ។ ខ្ញុំសូមអញ្ជើញយើងទាំងអស់គ្នាឲ្យអធិស្ឋានដោយសេចក្តីជំនឿ អំពីបទបញ្ញត្តិមកពីព្រះមកកាន់យើងទាំងអស់គ្នាថាយើងគប្បីចែកចាយដំណឹងល្អ ។ នៅពេលដែលយើងធ្វើដូច្នេះ ខ្ញុំសូមសន្យាថាទ្វារទាំងឡាយនឹងបើកឡើង ហើយយើងនឹងត្រូវបានប្រទានពរដើម្បីយល់ និង ធ្វើតាមឱកាសនានាដែលនឹងត្រូវបានផ្តល់ឲ្យ ។