ការចងចាំ ព្រះអង្គសង្គ្រោះ

ដោយ អ៊ីរិក ប៊ី ម៉ដុក

ទស្សនាវដ្តីសាសនាចក្រ

ពរជ័យដ៏មហិមាកើតមានឡើងនៅពេលយើងចងចាំព្រះយេស៊ូវគ្រីស្ទ តាមរយៈពិធីសាក្រាម៉ង់ ។

រៀងរាល់សប្តាហ៍ យើងមានពរឲ្យមានឱកាសទទួលទានសាក្រាម៉ង់នៅពេលចូលរួមព្រះវិហារ ។ ពិតណាស់ វាគឺជាមូលហេតុចម្បងមួយដែលពួកយើងទៅព្រះវិហារនៅថ្ងៃអាទិត្យ ។ ប៉ុន្តែតើអ្នកដឹងទេថាពិធីសាក្រម៉ង់មានសារៈសំខាន់ប៉ុណ្ណានោះ ? មានកិច្ចការមួយដែលយើងសន្យានឹងធ្វើ ដែលធ្វើឲ្យវាក្លាយជាពិធីបរិសុទ្ធដ៏សំខាន់ និង ពិសិដ្ឋបំផុតនៅក្នុងសាសនាចក្រ ៖ ចងចាំព្រះយេស៊ូវគ្រីស្ទ ។

ចូរគិតពីរឿងនេះ ៖ ចងចាំព្រះអង្គសង្គ្រោះគឺជាផ្នែកដ៏សំខាន់មួយនៃការអធិស្ឋានសាក្រាម៉ង់ ។ នៅក្នុងការអធិស្ឋាននោះយើងសន្យាថាយើងនឹង « ចងចាំទ្រង់ជានិច្ច » ( គ. និង ស. ២០:៧៧, ៧៩ ) ពុំមែនគ្រាន់តែថ្ងៃអាទិត្យឡើយ ប៉ុន្តែ ជានិច្ច ។ នៅពេលយើងចងចាំព្រះអង្គសង្គ្រោះជានិច្ច នោះជីវិតរបស់យើងនឹងគិតពីបទដ្ឋាន និង ការបង្រៀនរបស់ទ្រង់ ហើយយើងនឹងឃើញផងដែរពីព្រះចេស្តា និង ឥទ្ធិពលគាំទ្រនៅក្នុងជីវិតរបស់យើងផងដែរ ។

របៀបដែលការចងចាំបានជួយយុវជនមួយរូប

ឧទាហរណ៍ នៅពេលទេវតានៃព្រះបានហៅ អាលម៉ាជាកូនឲ្យប្រែចិត្ត នោះអាលម៉ាបានដួលទៅលើដី ហើយពុំអាចនិយាយ ឬ កម្រើកអស់ជាច្រើនថ្ងៃ ។ អំឡុងគ្រានោះ លោកត្រូវញាំញីដោយសេចក្តីទុក្ខវេទនាដោយការនឹកឃើញដល់អំពើបាបរបស់ខ្លួន ប៉ុន្តែក្រោយមកលោកបាន « នឹកឃើញ … ពីការព្យាកររបស់ឪពុក [ លោក ] … អំពីការយាងមកនៃព្រះយេស៊ូវគ្រីស្ទជាព្រះរាជបុត្រានៃព្រះដើម្បីមកធ្វើឲ្យធួននឹងអំពើបាបទាំងឡាយនៃមនុស្សលោក » ។ ក្រោយមកលោកមានប្រសាសន៍ ៖ « ឥឡូវនេះ នៅពេលដែលឪពុកនឹកគិតទៅលើរឿងនេះ នោះឪពុកបានយំនៅក្នុងចិត្ត ៖ ឱព្រះយេស៊ូវអើយ ព្រះអង្គជាព្រះរាជបុត្រានៃព្រះ សូមព្រះអង្គមានសេចក្ដីមេត្តាករុណាមកលើទូលបង្គំផង ដែលជាអ្នកនៅក្នុងប្រមាត់ល្វីងជូរចត់ ហើយកំពុងតែឡោមព័ទ្ធទៅដោយច្រវាក់ដ៏អស់កល្បជានិច្ចនៃសេចក្ដីស្លាប់ ។ ហើយឥឡូវនេះ មើលចុះ នៅពេលដែលឪពុកកំពុងតែគិតយ៉ាងនេះ នោះឪពុកក៏ឈប់នឹកឃើញការឈឺចាប់ទៀត មែនហើយ ឪពុកក៏អស់កើតទុក្ខដោយការនឹកឃើញអំពើបាបរបស់ខ្លួនទៀតទៅ » ( អាលម៉ា ៣៦:១៧–១៩ ) ។

តាមរយៈការគិតពីព្រះគ្រីស្ទ បាននាំអាលម៉ាឲ្យអធិស្ឋានទូលសុំក្តីមេត្តាករុណា ដកយកអារម្មណ៍ខុសឆ្គង បន្ធូរការឈឺចាប់របស់លោក ហើយជួយលោកឲ្យប្រែចិត្ត ។ ដូចជាអាលម៉ាដែល យើងអាចបង្វែរជីវិតរបស់យើងទៅកាន់ព្រះគ្រីស្ទ ហើយមានបទពិសោធន៍នៃក្តីអំណរដែលកើតឡើងពីការរស់នៅតាមដំណឹងល្អ ។ ដំណើរការនេះចាប់ផ្តើមដោយជម្រើសរបស់យើង ដើម្បីចងចាំព្រះយេស៊ូវគ្រីស្ទ និង អំណាចនៃដង្វាយធួនរបស់ទ្រង់ ។

នេះគឺជាពរជ័យប្រាំបន្ថែមទៀត ដែលកើតមានពីការគោរពការសន្យារបស់យើងឲ្យចងចាំព្រះអង្គសង្គ្រោះជានិច្ច ។

ព្រះវិញ្ញាណទ្រង់នឹងគង់នៅជាមួយយើង

នៅពេលអ្នកទទួលទានសាក្រាម៉ង់នៅថ្ងៃអាទិត្យ នោះអ្នករំឭកការសន្យាដែលថា ប្រសិនបើអ្នកចងចាំព្រះគ្រីស្ទ គោរពព្រះបញ្ញត្តិទាំងឡាយរបស់ទ្រង់ ហើយលើកដាក់លើខ្លួនអ្នកនូវព្រះនាមទ្រង់ នោះអ្នកនឹងមានព្រះវិញ្ញាណរបស់ទ្រង់គង់ជាមួយយើងជាដរាប ។ នៅក្នុងពិភពលោកដែលពោរពេញដោយឧបសគ្គនេះ វាងាយស្រួលនឹងវង្វេង ។ ប៉ុន្តែប្រសិនបើអ្នកមានព្រះវិញ្ញាណបរិសុទ្ធគង់នៅជាមួយអ្នកនោះ « ដោយព្រះចេស្តានៃព្រះវិញ្ញាណបរិសុទ្ធ នោះអ្នករាល់គ្នាអាចស្គាល់សេចក្តីពិតនៃគ្រប់ការណ៍ទាំងអស់ » ( មរ៉ូណៃ ១០:៥ ) ។ ព្រះវិញ្ញាណនៃព្រះអម្ចាស់អាចធ្វើជាអ្នកនាំផ្លូវអ្នក ហើយប្រទានពរដល់អ្នកនូវការប្រាប់ផ្លូវ ការណែនាំ និង ការការពារ ។
ទ្រង់អាចប្រទានកម្លាំងដល់យើងដើម្បីទប់ទល់នឹងការល្បួងនានា

ការការពារទប់ទល់នឹងការល្បួងដែលល្អ និង សំខាន់បំផុតនោះគឺជាសេចក្តីជំនឿរបស់យើងលើព្រះយេស៊ូវគ្រីស្ទ ( សូមមើល អាលម៉ា ៣៧:៣៣ ) ។ នៅពេលយើងផ្តោតចិត្តរបស់យើងលើព្រះគ្រីស្ទ នោះយើងអាចស្គាល់ការកុហករបស់សាតាំង ហើយចាប់យកការប៉ុនប៉ងរបស់វាដើម្បីបោកប្រាស់យើង ។ ដោយសារព្រះយេស៊ូវបានជួបនឹងការល្បួង ប៉ុន្តែពុំដែលចុះចាញ់ការល្បួងឡើយ យើងអាចពឹងផ្អែកលើទ្រង់ នៅពេលយើងជួបនឹងការល្បួង ។ នីហ្វៃបានបង្រៀនថា អស់អ្នកណាដែល « តោងជាប់តាម [ ព្រះបន្ទូលនៃព្រះ ] នោះនឹងមិនត្រូវវិនាសឡើយ សូម្បីតែការល្បួងទាំងឡាយ និងព្រួញភ្លើងទាំងឡាយរបស់មារសត្រូវក៏មិនអាចឈ្នះលើពួកគេដែរ » ( នីហ្វៃទី ១ ១៥:២៤ ) ។ នៅពេលយើងចងចាំព្រះអង្គសង្គ្រោះ និង ការបង្រៀនរបស់ទ្រង់ នោះទ្រង់អាចលើកយើងឡើង ហើយពង្រឹងយើងទប់ទល់នឹងការល្បួង ។
គំរូរបស់ទ្រង់នឹងដឹកនាំយើង

ព្រះយេស៊ូវពុំគ្រាន់តែប្រាប់យើងពីកន្លែងដែលត្រូវទៅដើម្បីទទួលបានជីវិតអស់កល្បជានិច្ចឡើយ ទ្រង់បានដឹកនាំផ្លូវទៀតផង ។ ទ្រង់បានមានព្រះបន្ទូលថា « ទ្រង់គឺជាផ្លូវ សេចក្ដីពិត និង ជីវិត » ( យ៉ូហាន ១៤:៦ ) ។ ព្រះគ្រីស្ទគឺជាគំរូដ៏ល្អឥតខ្ចោះរបស់យើង ។ អំឡុងពេលនៃការបម្រើក្នុងជីវិតរមែងស្លាប់របស់ទ្រង់ នោះព្រះយេស៊ូវបានបង្រៀន និង ធ្វើជាគំរូអំពីសេចក្តីស្រឡាញ់ ភាពទន់ទាប ការបន្ទាបខ្លួន និង សេចក្តីអាណិតអាសូរ ។ ទ្រង់បានចំណាយពេលវេលារបស់ទ្រង់ចំពោះការបង្រៀន ការបម្រើ និង ការស្រឡាញ់អ្នកដទៃ ។

គ្រប់កិច្ចការទាំងអស់ដែលទ្រង់បានធ្វើ គឺទ្រង់គោរពតាមព្រះឆន្ទៈរបស់ព្រះវរបិតាទ្រង់ ( សូមមើល យ៉ូហាន ៥:៣០ ) ។ ព្រះអង្គសង្គ្រោះបានធ្វើជាគំរូនៅក្នុងគ្រប់កិច្ចការទាំងអស់ ដូចជារបៀបដែលយើងគប្បីរស់នៅ ហើយទ្រង់អញ្ជើញយើងទាំងអស់គ្នាឲ្យធ្វើតាមគំរូទ្រង់ ។

ប្រសិនបើអ្នកធ្លាប់រកឃើញថាអ្នកពុំដឹងថាត្រូវទៅទីណា ឬ ត្រូវធ្វើអ្វី ចូរចងចាំព្រះអង្គសង្គ្រោះ ។ ទ្រង់មានបន្ទូលថា « ខ្ញុំជាពន្លឺលោកីយ៍ អ្នកណាដែលតាមខ្ញុំ នោះមិនដែលដើរក្នុងសេចក្តីងងឹតឡើយ គឺនឹងមានពន្លឺនៃជីវិតវិញ » ( យ៉ូហាន ៨:១២ ) ។
ទ្រង់អាចជួយយើងបម្រើមនុស្សដទៃ

ព្រះយេស៊ូវបានដាក់សេចក្តីត្រូវការរបស់មនុស្សដទៃលើសេចក្តីត្រូវការផ្ទាល់ខ្លួនរបស់ទ្រង់ជានិច្ច ។ ទ្រង់ « បានយាងចុះឡើងធ្វើកិច្ចការល្អ » ( កិច្ចការ ១០:៣៨ ) ។ ទ្រង់បានព្យាបាលអ្នកឈឺ ហើយបានជួយអស់អ្នកដែលនៅជុំវិញទ្រង់ ។ នៅពេលយើងចងចាំព្រះយេស៊ូវ នោះយើងចងចាំទង្វើនៃការបម្រើដោយមិនគិតពីខ្លួនឯងដែលបង្ហាញពីព្រះជន្មរបស់ទ្រង់ ។ យើងក៏ចងចាំដែរថា ទ្រង់បានសុំយើងឲ្យបម្រើទ្រង់ តាមរយៈការបម្រើមនុស្សដទៃ ។ « កាលណាអ្នករាល់គ្នានៅក្នុងការបម្រើដល់មនុស្សទូទៅ នោះអ្នករាល់គ្នាគ្រាន់តែនៅក្នុងការបម្រើ ដល់ព្រះរបស់អ្នកតែប៉ុណ្ណោះ » ( ម៉ូសាយ ២:១៧ ) ។

ព្រះអម្ចាស់នឹងបើកភ្នែករបស់អ្នកឲ្យមើលឃើញអស់អ្នកដែលនៅជុំវិញអ្នក ដែលអ្នកអាចជួយពួកគេ ។ អ្នកនឹងត្រូវបានដឹកនាំក្នុងរបៀបដែលអ្នកអាចបម្រើពួកគេដោយអស់ពីសមត្ថភាព ។ ជីវិតរបស់អ្នកនឹងកាន់តែសប្បាយ ហើយកាន់តែពេញលេញ នៅពេលអ្នកធ្វើការបម្រើតូចតាច និងសាមញ្ញ ។ ការបម្រើមនុស្សដទៃនឹងនាំឲ្យមានអារម្មណ៍នៃភាពសុខសាន្ត និង សេចក្តីអំណរទៅក្នុងជីវិតរបស់អ្នក ។
យើងអាចប្រែចិត្តបាន

យើងទាំងអស់គ្នាបរាជ័យក្នុងការកាន់តាមបទបញ្ញត្តិពេញលេញតាមអ្វីដែលរំពឹងទុក ទោះបីយើងព្យាយាមដោយស្មោះសរក្តី ប៉ុន្តែដោយសារព្រះជន្ម និង បេសកកម្មរបស់ព្រះយេស៊ូវគ្រីស្ទ នោះមានផ្លូវដើម្បីត្រឡប់មកវិញ ។

ការចងចាំព្រះយេស៊ូវគ្រីស្ទរំឭកយើងពីអំណោយទាននៃការប្រែចិត្ត ដែលបានប្រទានមកតាមរយៈដង្វាយធួនរបស់ទ្រង់ ។ ព្រះយេស៊ូវអញ្ជើញយើងទាំងអស់គ្នាឲ្យប្រែចិត្ត ហើយយើងមានបទពិសោធន៍នៃក្តីអំណរនៅពេលយើងបែរចេញឆ្ងាយពីអំពើបាប ហើយងាកទៅរកទ្រង់ ។ នៅពេលយើងមានបំណងស្មោះសរដើម្បីផ្លាស់ប្តូរ ហើយរក្សាបទបញ្ញត្តិ នោះព្រះអម្ចាស់សន្យាថា « អ្នកណាដែលប្រែចិត្តពីអំពើបាបទាំងឡាយរបស់ខ្លួន អ្នកនោះឈ្មោះថាបានអត់ទោសឲ្យហើយ ហើយយើងជាព្រះអម្ចាស់ មិនចាំពីអំពើបាបទាំងនោះទៀតទេ » ( គ. និង ស. ៥៨:៤២ ) ។

ពេលអ្នកទទួលទានសាក្រាម៉ង់ អ្នកធ្វើការតាំងចិត្តដើម្បីចងចាំព្រះអង្គសង្គ្រោះជានិច្ច ។ ដរាបណាអ្នកទុកព្រះគ្រីស្ទនៅក្នុងគំនិតអ្នក ដរាបនោះទ្រង់នឹងក្លាយជាអង្គដ៏សំខាន់នៃជីវិតរបស់អ្នក ហើយដរាបនោះទ្រង់នឹងដឹកនាំ ព្រមទាំងណែនាំអ្នកឲ្យទៅដល់សក្តានុពលដ៏ពោរពេញរបស់អ្នក ។ ការចងចាំព្រះអង្គសង្គ្រោះជានិច្ច នឹងប្រទានពរជ័យដល់អ្នកជាដរាប ។