យោបល់ ៣ យ៉ាងសម្រាប់រាត្រីជួបជុំក្រុមគ្រួសារ ដើម្បីបញ្ចូលថាមពលភ្លើងខាងវិញ្ញាណរបស់អ្នក
យើងទាំងអស់គ្នាត្រូវតែបញ្ចូលថាមពលភ្លើងខាងវិញ្ញាណរបស់យើងរៀងរាល់ថ្ងៃ ។ អែលឌើរ ដបុលយូ.ម៉ាក បាសេត ក្នុងពួកចិតសិបនាក់សរសេរអំពីតម្រូវការនេះនៅក្នុងអត្ថបទដែលមានចំណងជើងថា « សម្លឹងមើល ហើយរស់នៅ» (លីអាហូណា ខែ មករា ឆ្នាំ ២០១៨ ) ។ យោបល់នៃសកម្មភាពទាំងនេះដែលផ្អែកទៅលើអត្ថបទរបស់លោក អាចត្រូវបានកែសម្រួលដោយគ្រួសារដែលមានកុមារគ្រប់វ័យដើម្បីប្រើប្រាស់នៅក្នុងរាត្រីជួបជុំក្រុមគ្រួសារ ។
-
ដូចជាកូនចៅអ៊ីស្រាអែលដែរ យើងក៏ត្រូវការប្រមូល « នំម៉ាន៉ាខាងវិញ្ញាណ » រៀងរាល់ថ្ងៃ—យើងអធិស្ឋាន សិក្សាព្រះគម្ពីរ គោរពបទបញ្ញត្តិ និងបម្រើអ្នកដទៃទៀតដើម្បីរក្សាព្រះវិញ្ញាណឲ្យគង់នៅជាមួយពួកយើង ។ សូមស្វែងរកវត្ថុមួយដែលអ្នកអាចប្រើធ្វើជា « នំម៉ាន៉ា » ( ឡេវអាវ ប្រដាប់ប្រដាលេង ដុំក្រដាស ជាដើម ) ហើយដាក់ពង្រាយវាលើកម្រាលឥដ្ឋក្នុងផ្ទះរបស់អ្នក ។ សូមឲ្យកុមារប្រមូលនំម៉ាន៉ា ហើយដាក់វាក្នុងចានគោមមួយ ។ ( ដើម្បីធ្វើឲ្យការលេងល្បែងនេះលំបាកបន្តិច អ្នកអាចលាក់នំម៉ាន៉ាទាំងនោះ ) ។ គ្រប់ពេលដែលពួកគេដាក់នំម៉ាន៉ាមួយចូលទៅក្នុងចាន ពួកគេអាចផ្តល់ឧទាហរណ៍អំពីសកម្មភាពមួយដែលផ្តល់ការចិញ្ចឹមបីបាច់ខាងវិញ្ញាណ ។ សូមគិតពីការអាន និក្ខមនំ ១៦:១៩–២១ ហើយធ្វើការពិភាក្សាគ្នា ។ តើហេតុអ្វីវាសំខាន់ចំពោះពួកសាសន៍អ៊ីស្រាអែលប្រមូលនំម៉ាន៉ារៀងរាល់ថ្ងៃ ? ហើយតើហេតុអ្វីវាសំខាន់សម្រាប់ពួកយើង ?
-
ដូចជាម៉ាស៊ីនបង្កើតចរន្តឆ្លាស់របស់ឡានដែលត្រូវការបញ្ចូលថាមពលភ្លើងជាទៀងទាត់នៅក្នុងរឿងរបស់អែលឌើរ បាសេត ដែរ យើងក៏ត្រូវតែបញ្ចូលថាមពលភ្លើងខាងវិញ្ញាណផងដែរ ។ សូមស្វែងរកប្រដាប់លេង ឬវត្ថុដែលធ្វើចលនាបានដោយការផ្លុំ—ជាវត្ថុមួយដែលត្រូវតែផ្លុំ ឬបង្វិលទើបវាដំណើរការបាន ។ សូមបង្វិល ឬផ្លុំប្រដាប់លេងនោះពីរបីដង ។ តើការណ៍នេះទាក់ទងទៅនឹងរបៀបដែលយើងផ្តល់ថាមពលខាងវិញ្ញាណដល់ខ្លួនយើងយ៉ាងដូចម្តេច ? តើមានអ្វីកើតឡើង នៅពេលយើងឈប់បង្វិលប្រដាប់លេងនោះ ? ស្រដៀងនេះផងដែរ តើមានរឿងអ្វីកើតឡើង ប្រសិនបើយើងឈប់អធិស្ឋាន ឬឈប់ទៅព្រះវិហារនោះ ? អ្នកអាចចង់មើលវគ្គ « នំម៉ាន៉ាខាងវិញ្ញាណ » ក្នុងអត្ថបទរបស់អែលឌើរ បាសេត ។
-
ប្រសិនបើ « ថាមពលភ្លើងខាងវិញ្ញាណ » របស់យើងត្រូវបានបញ្ចូល ហើយរឹងមាំ នោះព្រះវិញ្ញាណបរិសុទ្ធអាចក្លាយជាគូកនរបស់យើងជានិច្ច ។ ពីមុនកម្មវិធីរាត្រីជួបជុំក្រុមគ្រួសារ សូមធ្វើបញ្ជីសកម្មភាពពីរ ៖ (១) អ្វីៗដែលធ្វើឲ្យថាមពលភ្លើងខាងវិញ្ញាណរបស់យើងចុះខ្សោយ ( ដូចជាការកុហក មានចិត្តអាក្រក់ដាក់បងប្អូនប្រុសស្រី ការខកខានពុំបានសិក្សាព្រះគម្ពីរ ) និង (២) អ្វីៗដែលបញ្ចូលថាមពលភ្លើងខាងវិញ្ញាណ ( ដូចជា ការថ្វាយដង្វាយមួយភាគក្នុងដប់ ការសួរសុខទុក្ខអ្នកឈឺ ការទទួលទានសាក្រាម៉ង់ ) ។ សូមអានចំណុចនីមួយៗឲ្យឮៗ ។ សូមឲ្យក្មេងៗទៅខាងឆ្វេងបន្ទប់ ប្រសិនបើសកម្មភាពនោះធ្វើឲ្យថាមពលភ្លើងខាងវិញ្ញាណរបស់យើងចុះខ្សោយ ហើយទៅខាងស្តាំបន្ទប់ ប្រសិនបើវាជាការបញ្ចូលថាមពលភ្លើងខាងវិញ្ញាណ ។ សូមលើកទឹកចិត្តពួកគេឲ្យជ្រើសរើសទៅខាងស្តាំបន្ទប់ ។