បាល់ទាត់ ថ្ងៃអាទិត្យ និងការឈឺចាប់ខាងវិញ្ញាណ
សម្រាប់ វៀល ការជ្រើសរើសពុំលេងបាល់ទាត់នៅថ្ងៃអាទិត្យ អាចមានន័យថាជាការជ្រើសរើសពុំលេងជាមួយក្រុមដ៏ល្អបំផុតមួយ ។
កាលខ្ញុំនៅក្មេងមិត្តភក្ដិរបស់ខ្ញុំ និងខ្ញុំបានលេងល្បែងមួយហៅថា « លោត ឬមុជចូលទឹក » ។ ប្រាកដណាស់ អ្នកទាំងអស់គ្នាត្រូវការអាងហែលទឹក ឬបឹងជ្រៅ និងអ្វីមួយដើម្បីលោតដូចជាក្តារលោតមុជទឹកជាដើម ។ ដើម្បីលេង អ្នកត្រូវលោតចេញពីក្តារលោតមុជទឹកនោះ ។ ពេលអ្នកកំពុងលោតនោះ អ្នកខ្លះស្រែកឡើងថា « លោត » មានន័យថា អ្នកត្រូវលោតដោយឲ្យជើងអ្នកចូលទៅក្នុងទឹកមុន ឬគេស្រែកថា « មុជចូលទឹក » ដែលមានន័យថា អ្នកត្រូវលោតជ្រមុជចូលទឹកដោយឲ្យដៃចូលទឹកមុន នៅពេលលោត ។
ពេលអ្នកកំពុងនៅលើអាកាស អ្នកតែងតែរៀបចំពត់ពែនបត់ខ្លួន ឬក៏លោតទៅដោយទ្រូងប៉ះនឹងទឹកដែលធ្វើឲ្យមានការឈឺចាប់ ។
ពុំត្រូវធ្វើជីវិតដូចជាល្បែង « លោត ឬមុជចូលទឹក » នោះទេ ។ អ្នកអាចធ្វើការសម្រេចចិត្តជាច្រើន មានពេលច្រើនជាមុន ហើយចៀសវាងពីការឈឺចាប់ខាងវិញ្ញាណដ៏ខ្លាំងក្លានោះ ។ យ៉ូស្វេ ព្យាការីក្នុងព្រះគម្ពីរសញ្ញាចាស់ពុំបានថ្លែងថា « ចូរជ្រើសរើសមុនវាហួសពេល » ឡើយ ។ លោកបានថ្លែងថា « ចូររើសយកព្រះណាដែលឯងចង់គោរពប្រតិបត្តិតាម នៅថ្ងៃនេះ ចុះ » ( យ៉ូស្វេ ២៤:១៥ ការគូសបញ្ជាក់បានបន្ថែម ) ។
វៀល ដ័បុលយូ អាយុ ១៤ ឆ្នាំ មកពីទីក្រុង សាន់ ហ្វ្រាន់ស៊ិស្កូ រដ្ឋកាលីហ្វូញ៉ា ស.រ.អា. ប្រហែលជាគ្មានការឈឺចាប់ខាងវិញ្ញាណច្រើនឡើយ ដោយសារគាត់ជឿលើការសម្រេចចិត្តពីមុនវាឈានដល់នាទីចុងក្រោយ ។
គាត់និយាយថា « ប្រសិនបើអ្នកជ្រើសរើសធ្វើ ឬពុំធ្វើអ្វីមួយពីមុនវាកើតមានឡើង នោះធ្វើឲ្យអ្វីៗទាំងអស់នឹងកាន់តែងាយស្រួលច្រើនជាង ។ ឧទាហរណ៍ពេលអ្នកទៅពិធីជប់លៀង ហើយមានគេឲ្យគ្រឿងស្រវឹងទៅអ្នកផឹក ។ ប្រសិនបើអ្នកជ្រើសរើសនៅពេលនោះថា តើផឹកវា ឬអត់ នោះអ្នកអាចត្រូវបានល្បួងឲ្យផឹកវាហើយ ។ ប៉ុន្តែប្រសិនបើអ្នកបានសម្រេចចិត្តតាំងពីយូរយារមក ដោយបដិសេធប្រសិនបើមាននរណាម្នាក់ឲ្យគ្រឿងស្រវឹងទៅអ្នកផឹក នោះអ្នកមានអារម្មណ៍កាន់តែប្រាកដច្បាស់ចំពោះខ្លួនឯង ។ អ្នកនឹងគ្មានពេលត្រូវបានល្បួងឡើយ ។ អ្នកបានបដិសេធ ដោយសារអ្នកបានសម្រេចចិត្តជាយូរយារណាស់មកហើយ » ។
បាវចនាម៉្ញូតឆលឆ្នាំ ២០១៨ ចែងថា « ចូររៀនអំពីយើង ហើយស្ដាប់តាមព្រះបន្ទូលទាំងឡាយរបស់យើងចុះ ចូរដើរក្នុងភាពស្លូតបូតនៃព្រះវិញ្ញាណរបស់យើង នោះអ្នកនឹងបានសេចក្ដីសុខសាន្ដក្នុងយើង » ( គោលលទ្ធិ និង សេចក្តីសញ្ញា ១៩:២៣ ) ។ សម្រាប់វៀល ភាពសុខសាន្តមានន័យថា ជាអារម្មណ៍មានទំនុកចិត្តពេលគាត់ជ្រើសរើសត្រូវ ហើយពុំបារម្ភអំពីការពោលពាក្យអវិជ្ជមានពីមនុស្សដទៃ ។ ភាពសុខសាន្តនោះកើតមានចំពោះ វៀល ដោយសារការសម្រេចចិត្តស្តាប់ — និងធ្វើតាម — ព្រះបន្ទូលព្រះយេស៊ូវគ្រីស្ទទុកជាមុន ។
គាត់និយាយថា « ជួនកាលក្មេងៗទាំងនោះឌឺដងដាក់ខ្ញុំចំពោះអ្វីដែលខ្ញុំធ្វើ ឬមិនធ្វើ ប៉ុន្តែវាពុំរំខានដល់ខ្ញុំឡើយ ដោយសារខ្ញុំបានសម្រេចចិត្តតាំងពីយូរមកហើយថា នោះគឺជារបៀបដែលខ្ញុំនឹងរស់នៅ » ។
អ្វីមួយដែល វៀល និងគ្រួសារគាត់សម្រេចចិត្តជាយូរយារមកហើយនោះគឺ រក្សាថ្ងៃឈប់សម្រាកឲ្យបរិសុទ្ធ ។ នោះមានការលំបាកបន្តិច ពេល វៀល ធ្វើជាវីរជនម្នាក់ ក្នុងក្រុមបាល់ទាត់នោះ ។ ប៉ុន្តែ ដូចនីហ្វៃ និងគ្រួសារលោកបានជឿថា « ព្រះអម្ចាស់ទ្រង់មិនចេញបញ្ជាដល់កូនចៅមនុស្សណាឡើយ លើកលែងតែទ្រង់នឹងរៀបចំផ្លូវ ដើម្បីឲ្យគេអាចសម្រេចនូវអ្វីៗដែលទ្រង់បានបញ្ជាដល់ពួកគេទុកជាមុនសិន » ( នីហ្វៃទី១ ៣:៧ ) ។
ចំពោះ វៀល បាល់ទាត់គឺជាអ្វីៗទាំងអស់សម្រាប់គាត់ ។ ដូចម្តាយរបស់គាត់និយាយថា « គាត់ស្រឡាញ់បាល់ទាត់ទាំងពេលហូប ពេលផឹក ពេលដេកគឺគាត់ស្រឡាញ់បាល់ទាត់ខ្លាំងណាស់ ។ វាជាចំណង់ចំណូលចិត្តគាត់ ហើយគាត់ពូកែលេងណាស់ » ។
ដូច្នេះពេល វៀល បានចូលក្នុងក្រុមដែលស្ថិតនៅក្នុងលំដាប់ខ្ពស់បំផុតនៅក្នុងតំបន់នេះ គាត់មានចិត្តរំភើបរីករាយណាស់ ។ បញ្ហាមួយគត់នោះគឺ ៖ ភាគច្រើនក្រុមបាល់ទាត់លេងបាល់នៅថ្ងៃអាទិត្យ ។ ភាគច្រើនក្រុមនានាពុំទទួលអ្នកលេងបាល់ដែលខកខានមិនលេងនៅថ្ងៃអាទិត្យឡើយ ។ ការជ្រើសរើសពុំលេងបាល់ទាត់នៅថ្ងៃអាទិត្យ អាចមានន័យថា ជាការបាត់បង់មុខងាររបស់គាត់នៅក្នុងក្រុម ។
ប៉ុន្តែ វៀល បានធ្វើការសម្រេចចិត្តនោះជាយូរយារណាស់មកហើយ ។ គាត់នឹងរក្សាថ្ងៃឈប់សម្រាកឲ្យបរិសុទ្ធ ។
វៀល និងគ្រួសារគាត់បានអធិស្ឋានជាមួយគ្នា ហើយបានទូលប្រាប់ព្រះវរបិតាសួគ៌អំពីបំណងប្រាថ្នារបស់ពួកគេ ក្នុងការគោរពតាមព្រះបញ្ញត្តិទ្រង់ ហើយទូលសូមជំនួយរបស់ទ្រង់ ។ បន្ទាប់មក វៀល និងម្តាយរបស់គាត់បាននិយាយជាមួយគ្រូបង្វឹករបស់ក្រុមអំពីជំនឿរបស់ពួកគេ ។ គួរឲ្យភ្ញាក់ផ្អើលណាស់ គ្រូបង្វឹកចង់ឲ្យ វៀល នៅក្នុងក្រុមនោះ ទោះបីជាគាត់ពុំលេងបាល់នៅថ្ងៃអាទិត្យក្តី !
វៀល និយាយថា « ខ្ញុំដឹងថា ពេលខ្ញុំគោរពថ្ងៃឈប់សម្រាក នោះខ្ញុំនឹងទទួលបានពរ ។ ប្រហែលខ្ញុំពុំបានប្រកួតច្រើនដូចកីឡាករផ្សេងទៀតឡើយ ប៉ុន្តែខ្ញុំបានឃើញពរជ័យ ដូចជាការប្រកួតនៅថ្ងៃអាទិត្យស្រាប់តែត្រូវបានប្តូរទៅប្រកួតថ្ងៃផ្សេងជាដើម ។ ខ្ញុំក៏គិតផងដែរថា ខ្ញុំលេងបានល្អប្រសើរ ដោយសារខ្ញុំមានថ្ងៃឈប់សម្រាក ។
វាធ្វើឲ្យរឿងនេះកាន់តែប្រសើរឡើង ។ មិនយូរប៉ុន្មាន វៀល បានឃើញថា មិត្តរួមក្រុមរបស់គាត់ម្នាក់ក៏ជាសមាជិកសាសនាចក្រផងដែរ ។ បន្ទាប់ពីលេងបាល់ជាមួយគ្នាអស់ពីរបីខែមក ក្មេងប្រុសម្នាក់នោះបានធ្វើតាមគំរូរបស់ វៀល ហើយឈប់លេងបាល់នៅថ្ងៃអាទិត្យផងដែរ ។
ប្រសិនបើអ្នកមានអារម្មណ៍ថា អ្នកពុំទទួលបានពរជ័យមកពីការគោរពប្រតិបត្តិ នោះ អាចមកពីអ្នកពុំអាចឃើញអ្វីៗទាំងអស់ដែលព្រះវរបិតាសួគ៌បានរៀបចំទុកសម្រាប់អ្នក ។ ការសម្រេចចិត្តស្តាប់តាមព្រះបន្ទូលព្រះគ្រីស្ទ ហើយបម្រើព្រះអម្ចាស់គឺជាការសម្រេចចិត្តត្រឹមត្រូវជានិច្ច ដូច្នេះចូរធ្វើវាភ្លាមទៅ !
ប្រធាន ថូម៉ាស អេស ម៉នសុន បានមានប្រសាសន៍ថា « ខ្ញុំសូមអង្វរអ្នកឲ្យធ្វើការសម្រេចចិត្តភ្លាម ក្នុងពេលនេះ ដោយមិនត្រូវងាកចេញពីផ្លូវដែលនឹងនាំអ្នកទៅដល់គោលដៅរបស់យើង ៖ គឺជីវិតដ៏នៅអស់កល្បជានិច្ចជាមួយព្រះវរបិតាយើងដែលគង់នៅស្ថានសួគ៌ » ( « The Three Rs of Choice » Liahona, ខែ វិច្ឆិកា ឆ្នាំ ២០១០ ទំព័រ ៦៨ ) ។
សូមកុំធ្វើឲ្យជីវិតអ្នកដូចជាល្បែង « លោត ឬមុជចូលទឹក » នោះឡើយ ។ សូមកុំប្រថុយប្រថាននឹងការឈឺចាប់ខាងវិញ្ញាណ ឬការឈឺចាប់ណាផ្សេងទៀតឡើយ ។ សូមសម្រេចចិត្តក្នុងពេលឥឡូវនេះ ដើម្បីធ្វើតាមព្រះយេស៊ូវគ្រីស្ទ ហើយរីករាយនឹងភាពសុខសាន្ត ដែលទ្រង់ប្រទានមកក្នុងជីវិតអ្នក ។