សិក្សា ព្រះបន្ទូលរបស់ព្រះអង្គសង្គ្រោះ
ដោយប្រធាន រ័សុល អិម ណិលសុន
ប្រធានកូរ៉ុមនៃពួកសាវកដប់ពីរនាក់
ដកស្រង់ពីអត្ថបទមួយនៅលើគេហទំព័រ lds.org/blog ។
ឥឡូវនេះខ្ញុំមិនគ្រាន់តែមានទីបន្ទាល់កាន់តែប្រសើរឡើង អំពីព្រះអម្ចាស់ និងព្រះអង្គសង្គ្រោះគឺព្រះយេស៊ូវគ្រីស្ទប៉ុណ្ណោះទេ ខ្ញុំថែមទាំងមានការបញ្ជាក់អំពីជំនឿស៊ប់របស់ខ្ញុំថា ប្រព័ន្ធដែលយ៉ូសែប ស្ម៊ីធ មានសម្រាប់ការបកប្រែព្រះគម្ពីរមរមននោះគឺជាអំណោយទានមកពីព្រះ ។
អំឡុងការប្រជុំធម្មនិដ្ឋានទូទាំងពិភពលោកសម្រាប់យុវមជ្ឈិមវ័យនៅលីវខែមករាឆ្នាំ ២០១៧ ខ្ញុំបានអញ្ជើញអស់អ្នកដែលទស្សនាការប្រជុំនោះ ឲ្យបង្កើនទីបន្ទាល់របស់ពួកគេអំពីព្រះអង្គសង្គ្រោះ តាមរយៈការឆ្លៀតពេលរៀងរាល់សប្តាហ៍ដើម្បី ៖
-
សិក្សាអ្វីៗគ្រប់យ៉ាងដែលព្រះយេស៊ូវបានមានព្រះបន្ទូល និងធ្វើដូចដែលបានកត់ត្រានៅក្នុងព្រះគម្ពីរសញ្ញាចាស់ ។
-
សិក្សាពីក្រឹត្យវិន័យទ្រង់ដូចបានកត់ត្រានៅក្នុងព្រះគម្ពីរសញ្ញាថ្មី ។
-
សិក្សាពីគោលលទ្ធិទ្រង់ដូចបានកត់ត្រានៅក្នុងព្រះគម្ពីរមរមន ។
-
សិក្សាពីព្រះបន្ទូលទ្រង់ដូចបានកត់ត្រានៅក្នុងព្រះគម្ពីរគោលលទ្ធិ និងសេចក្ដីសញ្ញា ។
ខ្ញុំបានសន្យានឹងអ្នកស្តាប់ទាំងនោះថា ប្រសិនបើពួកគេចាប់ផ្តើមរៀនអ្វីៗគ្រប់យ៉ាង ដែលពួកគេអាចធ្វើបានអំពីព្រះយេស៊ូវគ្រីស្ទ នោះសេចក្តីស្រឡាញ់របស់ពួកគេចំពោះទ្រង់ និងក្រឹត្យវិន័យរបស់ព្រះនឹងរីកចម្រើនឡើងលើសពីអ្វីដែលពួកគេគិតដល់នាពេលបច្ចុប្បន្ននេះទៅទៀត ។
អ្វីដែលខ្ញុំពុំបាននិយាយនៅក្នុងអំឡុងពេលសុន្ទរកថានោះគឺថា ខ្ញុំបានដឹងថា ការសន្យានោះគឺពិត ដោយសារខ្ញុំកំពុងនៅចំពាក់កណ្តាលនៃការបំពេញកិច្ចការដូចគ្នាទាំងនេះសម្រាប់ខ្លួនខ្ញុំជាលើកដំបូង ។
នៅថ្ងៃទី ១ ខែ ធ្នូ ឆ្នាំ ២០១៦ ខ្ញុំបានទទួលព្រះគម្ពីរថ្មីមួយឈុត ហើយបានចាប់ផ្តើមការចាត់តាំងដូចគ្នានេះ ដែលក្រោយមកខ្ញុំបានអញ្ជើញដល់ពួកយុវមជ្ឈិមវ័យឲ្យធ្វើវានៅខែមករា ។ ពេលខ្ញុំបានបញ្ចប់ការចាត់តាំងនោះនៅប្រាំមួយសប្តាហ៍ក្រោយមក ខ្ញុំបានមើល ហើយគូសចំណាំសេចក្តីស្រង់ជាង ២២០០ មកពីព្រះគម្ពីរទាំងបួននោះ ។១
សម្រាប់ខ្ញុំ ការដែលអាចបញ្ចប់ការចាត់តាំងនេះគឺជារឿងដ៏រំភើបរីករាយបំផុត !
អ្វីមួយដែលខ្ញុំបានរកឃើញដែលជាការយល់ដឹងដ៏សំខាន់បំផុតនោះគឺថា ព្រះអង្គសង្គ្រោះបានប្រាប់យើងអំពីអង្គទ្រង់ តាមរយៈសម័យកាលនានាទាំងនេះ — ព្រះគម្ពីរសញ្ញាចាស់ ព្រះគម្ពីរសញ្ញាថ្មី សម័យកាលនៃការស្តារឡើងវិញ និងជំនាន់របស់យើងនេះ ។ នៅក្នុងព្រះគម្ពីរទាំងអស់ រឿងគឺដូចគ្នា ហើយអ្នកប្រាប់រឿងនោះក៏ដូចគ្នាផងដែរ ។
ខ្ញុំបានលះបង់រយៈពេលស្ទើរតែ ៩៣ ឆ្នាំនៃជីវិតខ្ញុំ ក្នុងការរៀនសូត្រអំពីព្រះអង្គសង្គ្រោះ ប៉ុន្តែកម្រមានឱកាសណាដែលខ្ញុំអាចបានរៀនច្រើនដូចខ្ញុំបានរៀនក្នុងរយៈពេលសិក្សាប្រាំមួយសប្តាហ៍នេះឡើយ ។ ប្រាកដណាស់ ខ្ញុំបានរៀនច្រើនអំពីទ្រង់ចេញពីការសិក្សានេះ ដែលខ្ញុំមានគម្រោងចែកចាយច្រើនអំពីរឿងនេះនៅក្នុងសុន្ទរកថាផ្សេងនាពេលខាងមុខ ដែលខ្ញុំកំពុងតែរៀបចំនាពេលបច្ចុប្បន្ននេះ ។២
នៅពេលចាប់ផ្តើមការចាត់តាំងនេះ ខ្ញុំពុំបានរំពឹងថា ការសិក្សានេះនឹងជួយខ្ញុំឲ្យទទួលបានទីបន្ទាល់ថ្មីអំពីទេវភាពនៃកិច្ចការរបស់យ៉ូសែប ស្ម៊ីធឡើយ — ប៉ុន្តែវាបានជួយពិតប្រាកដមែន ! វិវរណៈដែលបានកត់ត្រាដោយយ៉ូសែប ស្ម៊ីធ និងការយល់ដឹងដែលមាននៅក្នុងព្រះគម្ពីរប៊ីបគឺចុះសម្រុងគ្នាយ៉ាងអស្ចារ្យ ។ វាបំភ្លឺដល់ខ្ញុំយ៉ាងខ្លាំង ឲ្យមើលឃើញពីចំណុចនេះនៅក្នុងការសិក្សារបស់ខ្ញុំ ។
យ៉ូសែប ស៊្មីធ ពុំអាចមានពេលក្នុងការធ្វើទំនាក់ទំនង និងធ្វើបទគម្ពីរយោងជាមួយព្រះគម្ពីរប៊ីបនៅក្នុងរយៈពេលដ៏លឿននោះ ដែលលោកកំពុងមានក្នុងការបកប្រែព្រះគម្ពីរមរមនឡើយ — ប៉ុន្តែអ្វីៗទាំងនោះមាននៅទីនេះទាំងអស់ !
ដូច្នេះ ឥឡូវនេះខ្ញុំមិនគ្រាន់តែមានទីបន្ទាល់កាន់តែប្រសើរឡើង អំពីព្រះអម្ចាស់ និងព្រះអង្គសង្គ្រោះគឺព្រះយេស៊ូវគ្រីស្ទប៉ុណ្ណោះទេ ខ្ញុំថែមទាំងមានការបញ្ជាក់អំពីជំនឿស៊ប់របស់ខ្ញុំថា ប្រព័ន្ធដែលយ៉ូសែប ស្ម៊ីធ មានសម្រាប់ការបកប្រែព្រះគម្ពីរមរមននោះគឺជាអំណោយទានមកពីព្រះ ។
ឥឡូវ ខ្ញុំដឹងថា បងប្អូនមួយចំនួនប្រហែលជាកំពុងគិតក្នុងចិត្តអ្នកថា អ្នកពុំអាចមានពេលដើម្បីបញ្ចប់ការចាត់តាំងដូចនេះបានឡើយ ។
ខ្ញុំដឹងថា អ្នកមានអារម្មណ៍យ៉ាងណាហើយ ។ ខ្ញុំបានគិតរឿងដូចគ្នានេះចំពោះខ្លួនខ្ញុំផងដែរ — ថាគ្មានផ្លូវដែលខ្ញុំអាចមានពេលធ្វើកិច្ចការទាំងអស់នេះឡើយ ។ ខ្ញុំចាំបាច់ត្រូវរំឭកខ្លួនខ្ញុំនូវពាក្យពេចន៍ដូចជា នេះពុំមែនជាពាក្យជំរុញឲ្យមានសេចក្តីជំនឿឡើយ ។ ពាក្យជំរុញឲ្យមានសេចក្តីជំនឿគឺ « ខ្ញុំដឹងថា ខ្ញុំគ្មានពេលសម្រាប់ធ្វើរឿងនេះឡើយ ប៉ុន្តែខ្ញុំនឹងរកពេលធ្វើវា ។ ហើយខ្ញុំនឹងបំពេញកិច្ចការនេះជាមួយនឹងពេលវេលាដែលខ្ញុំមាន » ។
យើងម្នាក់ៗដែលទទួលការអញ្ជើញនេះនឹងបញ្ចប់វានៅក្នុងអំឡុងពេលផ្ទាល់ខ្លួនរបស់អ្នក ។ សម្រាប់ខ្ញុំ អំណរដ៏ខ្លាំងក្លាកើតមកពីការធ្វើកិច្ចការនេះចប់សព្វគ្រប់ ក្នុងរយៈពេលតែប្រាំមួយសប្តាហ៍ប៉ុណ្ណោះ ។ គោលបំណងនៃការសិក្សានេះក្នុងរយៈពេលខ្លី ធ្វើឲ្យខ្ញុំមានអំណរគុណចំពោះភាពចុះសម្រុងនឹងគ្នានៃការរៀនសូត្រដែលមាននៅក្នុងព្រះគម្ពីរសញ្ញាចាស់ ព្រះគម្ពីរមរមន ព្រះគម្ពីរសញ្ញាថ្មី និងព្រះគម្ពីរគោលលទ្ធិ និងសេចក្តីសញ្ញា ។
ចំពោះអស់អ្នកដែលមានអារម្មណ៍ថាគ្មានពេល ប្រសិនបើអ្នកលះបង់ នោះអ្នកនឹងទទួលបានរង្វាន់ដ៏អស្ចារ្យ ហើយមានអំណរគុណយ៉ាងខ្លាំងចំពោះការផ្លាស់ប្តូរទស្សនវិស័យ បង្កើនចំណេះដឹង និងធ្វើឲ្យការប្រែចិត្តជឿរបស់អ្នកកាន់តែរឹងមាំថែមទៀត ។ ខ្ញុំដឹងថានេះគឺជាការពិត ដោយសារខ្ញុំបានឃើញរង្វាន់ដូចគ្នានេះនៅក្នុងជីវិតខ្ញុំផ្ទាល់ ។
ដូចខ្ញុំបាននិយាយនៅក្នុងការប្រជុំធម្មនិដ្ឋាន នាថ្ងៃខាងមុខ អ្នកនឹងបង្ហាញខ្លួនអ្នកនៅចំពោះព្រះភក្ត្រព្រះអង្គសង្គ្រោះ ។ អ្នកនឹងរំជួលចិត្តរហូតដល់អ្នកយំដែលបាននៅក្នុងទីវត្តមានដ៏បរិសុទ្ធរបស់ទ្រង់ ។ អ្នកនឹងពិបាកក្នុងការរកពាក្យថ្លែងអំណរគុណទ្រង់សម្រាប់ការបង់ថ្លៃអំពើបាបរបស់អ្នក សម្រាប់ការអភ័យទោសដល់អ្នកដែលអ្នកពុំបានធ្វើល្អចំពោះអ្នកដទៃ សម្រាប់ការព្យាបាលអ្នកពីរបួស និងភាពអយុត្តិធម៌នានានៃជីវិតនេះ ។
អ្នកនឹងថ្លែងអំណរគុណទ្រង់សម្រាប់ការពង្រឹងអ្នកឲ្យធ្វើកិច្ចការដែលពុំអាចធ្វើបាន សម្រាប់ការបង្វែរភាពទន់ខ្សោយរបស់អ្នកឲ្យទៅជាភាពខ្លាំងវិញ និងសម្រាប់ធ្វើឲ្យអ្នកអាចរស់នៅជាមួយទ្រង់ និងគ្រួសាររបស់អ្នកជារៀងរហូត ។ អត្តសញ្ញាណរបស់ទ្រង់ ដង្វាយធួនរបស់ទ្រង់ និងលក្ខណៈរបស់ទ្រង់នឹងប្រែជារឿងផ្ទាល់ខ្លួន និងពិតជាក់ស្តែងចំពោះអ្នក ។
ប៉ុន្តែអ្នកពុំត្រូវរង់ចាំរហូតដល់ពេលនោះទេ ។ សូមជ្រើសរើសធ្វើជាសិស្សដ៏ពិតរបស់ទ្រង់ក្នុងពេលឥឡូវនេះ ។ ធ្វើជាសិស្សម្នាក់ដែលពិតជាស្រឡាញ់ទ្រង់ ដែលពិតជាចង់បម្រើ និងដឹកនាំដូចទ្រង់បានធ្វើ ។ ខ្ញុំសូមសន្យានឹងអ្នកថា ប្រសិនបើអ្នកនឹងសិក្សាព្រះបន្ទូលរបស់ទ្រង់ នោះសមត្ថភាពរបស់អ្នកដើម្បីប្រែក្លាយដូចជាទ្រង់នឹងកើនឡើង ។ ខ្ញុំដឹងថារឿងនេះពិត ។