ការស្វែងរកភាពសុខសាន្ត ៖ របៀប ៤ យ៉ាង ( បន្ថែមទៀត ) ដើម្បីប្រើប្រាស់បាវចនាម៉្ញូតឆលឆ្នាំ ២០១៨
បាវចនាម៉្ញូតឆលឆ្នាំ ២០១៨ បង្រៀនយុវវ័យអំពីភាពសុខសាន្តដែលពួកគេអាចទទួលបានពីព្រះយេស៊ូវគ្រីស្ទ ។ បាវចនានេះដកស្រង់ចេញពី គោលលទ្ធិ និង សេចក្តីសញ្ញា ១៩:២៣ ជាទីដែលព្រះអម្ចាស់អញ្ជើញឲ្យ « រៀនអំពីយើង ហើយស្ដាប់តាមព្រះបន្ទូលទាំងឡាយរបស់យើងចុះ ចូរដើរក្នុងភាពស្លូតបូតនៃព្រះវិញ្ញាណរបស់យើង នោះអ្នកនឹងបានសេចក្ដីសុខសាន្តក្នុងយើង » ។ វាជាសារលិខិតដ៏គួរឲ្យរំភើប ! នេះជារបៀបសប្បាយៗបួនយ៉ាងក្នុងការប្រើប្រាស់បាវចនាម៉្ញូតឆល ដើម្បីពង្រឹងយុវវ័យតាមរយៈការអញ្ជើញឲ្យធ្វើកិច្ចការនានា ៖
១. ពេលបើកកម្មវិធី
តាមរយៈការបញ្ចូលបាវចនានេះនៅពេលចាប់ផ្តើមកម្មវិធីម៉្ញូតឆល នោះអ្នកអាចធ្វើឲ្យសកម្មភាពទាំងមូលទទួលបានភាពរីករាយ ។ ពីមុនចាប់ផ្តើមសកម្មភាពនីមួយៗ អ្នកអាចចាត់ឲ្យយុវជន ឬយុវនារីម្នាក់រើសយកខគម្ពីរមួយដែលទាក់ទងនឹង គោលលទ្ធិ និង សេចក្តីសញ្ញា ១៩:២៣ ហើយបង្ហាញខគម្ពីរនេះដល់ក្រុម ។ អ្នកក៏អាចឆ្លៀតពេលអំឡុងពេលបើកកម្មវិធី ដើម្បីសិក្សាខគម្ពីរនៅជុំវិញខទី ២៣ នោះដើម្បីយល់អំពីបរិបទរបស់វា ។
២. « ស្ដាប់តាមព្រះបន្ទូលទាំងឡាយរបស់យើងចុះ »
សកម្មភាពនេះផ្តល់ភាពរីករាយ ដោយការអញ្ជើញឲ្យចម្អិនម្ហូបតាមរបៀបថ្មីមួយដែលមាននៅក្នុង «អ្នក យុវវ័យ និងបាវចនាម៉្ញូតឆល» (Ensign ឬ លីអាហូណា ខែ មករា ឆ្នាំ ២០១៨ ) ។ សូមរើសយករូបមន្តធ្វើម្ហូបមួយ ហើយសូមឲ្យមនុស្សម្នាក់អានរូបមន្តនេះ ខណៈដែលយុវវ័យគ្រប់គ្នាស្តាប់ និងធ្វើតាមការណែនាំនៃរបៀបធ្វើម្ហូបនោះ ។ បន្ទាប់មកចាក់តន្ត្រីឲ្យឮយូរៗម្តង ពេលអ្នកអានកំពុងអាន ដើម្បីធ្វើឲ្យអ្នកស្តាប់ពិបាកស្តាប់ឮការណែនាំនោះ ។ សូមលើកទឹកចិត្តឲ្យអ្នកអានបន្តអានរូបមន្តធ្វើម្ហូបនោះ ហើយកុំឲ្យអានឡើងវិញឡើយ ។ បន្ទាប់ពីសកម្មភាពមក សូមនិយាយអំពីការដែលអនុញ្ញាតឲ្យពិភពលោកបង្វែរយើងចេញពីព្រះបន្ទូលនៃព្រះគ្រីស្ទ ដែលធ្វើឲ្យការធ្វើតាមទ្រង់កាន់តែមានការលំបាក ។
៣. « ចូររៀនអំពីយើង »
សកម្មភាពនេះនឹងបង្រៀនពួកយុវវ័យអំពីរបៀបស្វែងរកភាពសុខសាន្តដោយការសិក្សាពីជីវប្រវត្តិរបស់ព្រះគ្រីស្ទនៅក្នុងរបៀបគួរឲ្យចាប់អារម្មណ៍ខាងវិញ្ញាណ ។ នៅលើផ្លូវដើរនៅសាលាប្រជុំក្នុងវួដរបស់អ្នក ( ឬនៅទីតាំងសមរម្យណាផ្សេងទៀត ) សូមរៀបចំស្ថានីយផ្សេងៗ ជាកន្លែងដែលអ្នកមានរូបថត/វត្ថុនានាដែលតំណាងឲ្យអ្វីៗដែលធ្វើឲ្យមានភាពតានតឹងនៅក្នុងជីវិតរបស់ពួកយុវវ័យ—អ្វីៗទាំងនោះមានដូចជា កិច្ចការមកពីសាលារៀន សង្គ្រាម/ពាក្យចចាមអារាមអំពីសង្គ្រាម មនុស្សចិត្តអាក្រក់ ជាដើម ។ ស្ថានីយនីមួយៗគួរតែនៅកន្លែងផ្លូវដើរខាងក្រៅបន្ទប់រៀនរបស់អ្នក ។ នៅស្ថានីយនីមួយៗ សូមទុកឲ្យពួកយុវវ័យពិភាក្សាគ្នាអំពីអារម្មណ៍ និងបទពិសោធន៍មួយចំនួនរបស់ពួកគេ ស្តីពីរបៀបដែលអ្វីៗដែលធ្វើឲ្យតានតឹងចិត្តនោះនឹងជះឥទ្ធិពលដល់ពួកគេ ។ បន្ទាប់មក សូមបើកទ្វារទៅកាន់បន្ទប់ដែលមានស្ថានីយនៅខាងក្រៅនោះ ។ ( នៅលើទ្វារបន្ទប់នោះគួរតែមានដាក់ព្យួររូបគំនូរព្រះគ្រីស្ទ ) ។ នៅក្នុងបន្ទប់ គួរតែមានស្ថានីយមួយផ្សេងទៀតដែលរៀបចំដោយមានវីដេអូ/ព្រះគម្ពីរ/សារលិខិតស្តីពីផ្នែកណាមួយនៃជីវប្រវត្តិរបស់ព្រះគ្រីស្ទ និងការបង្រៀននានា ដែលនឹងជួយផ្តល់ភាពសុខសាន្តនៅក្នុងទំនាក់ទំនងទៅនឹងអ្វីៗដែលធ្វើឲ្យមានភាពតានតឹងចិត្តមកពីផ្លូវដើរនោះ ។ ស្ថានីយបីដែលមានពីរផ្នែកនៅក្នុងនោះ ( មួយផ្នែកនៅលើផ្លូវដើរ និងមួយផ្នែកទៀតនៅក្នុងថ្នាក់រៀន ) គួរតែធំល្មមសម្រាប់ធ្វើសកម្មភាពទាំងមូលនេះបានហើយ ។
៤. « អ្នកនឹងបានសេចក្ដីសុខសាន្តក្នុងយើង »
ទៅ « ច្រៀងចម្រៀងសម្រាប់ភាពសុខសាន្ត » ជាក្រុមម៉្ញូតឆល ។ ជាទូទៅទោះបីចម្រៀងទាំងនោះទុកសម្រាប់រដូវកាលបុណ្យគ្រីស្ទម៉ាស់ក្តី វាគឺជាសកម្មភាពដ៏អស្ចារ្យមួយសម្រាប់ពេលណាក៏បាននៅក្នុងឆ្នាំ ។ សូមស្វែងរកគ្រួសារមួយចំនួនដែលអ្នកស្គាល់ ដែលអាចប្រើដើម្បីលើកស្ទួយខាងវិញ្ញាណ បន្ទាប់មកបង្ហាញខ្លួននៅមុខទ្វារផ្ទះដោយមាននំ និងទំនុកតម្កើងមួយចំនួនដែលអ្នកអាចច្រៀងបាន ។ ទំនុកតម្កើងយាងអញ្ជើញព្រះវិញ្ញាណ ហើយក៏នាំឲ្យមានភាពសុខសាន្តជាច្រើនបន្ថែមទៀត ។