មួយបន្ទាត់ម្តងៗ
គោលលទ្ធិ និង សេចក្តីសញ្ញា ១៩:២៣
ព្រះអម្ចាស់បើកសម្ដែងដល់ យ៉ូសែប ស៊្មីធ នូវគន្លឹះមួយចំនួន ដើម្បីទទួលបានក្តីសុខក្នុងព្រះយេស៊ូវគ្រីស្ទ ។
២៣ ចូររៀនអំពីយើង ហើយស្ដាប់តាមព្រះបន្ទូលទាំងឡាយរបស់យើងចុះ ចូរដើរក្នុងភាពស្លូតបូតនៃព្រះវិញ្ញាណរបស់យើង នោះអ្នកនឹងបានសេចក្ដីសុខសាន្ដក្នុងយើង ។
ចូររៀនអំពីយើង
« យើងស្គាល់ខគម្ពីរនេះ ‹ លោកជាគ្រូមកពីព្រះ [យ៉ូហាន ៣:២] គឺលើសពីគ្រូបង្រៀនទៅទៀត ។ ទ្រង់ដែលបានបង្រៀនយើងឲ្យស្រឡាញ់ព្រះអម្ចាស់ដែលជាព្រះរបស់យើងឲ្យអស់ពីចិត្តអស់ពីព្រលឹង អស់ពីគំនិត ហើយអស់ពីកម្លាំងរបស់យើង និង ស្រឡាញ់អ្នកជិតខាងខ្លួនដូចខ្លួនយើងព្រះអង្គគឺជាគ្រូបង្រៀនដ៏ឆ្នើម និងជាគំរូនៃជីវិតដ៏ល្អឥតខ្ចោះ ។ …
ពេលយើងឆ្លើយតបចំពោះការអញ្ជើញដ៏ទន់ភ្លន់របស់ព្រះអម្ចាស់ ចូរ ‹ រៀននឹងខ្ញុំចុះ › នោះយើងចាប់ផ្តើមទទួលទាននូវអំណាចដ៏ទេវភាពរបស់ទ្រង់ » ។
ប្រធាន ថូម៉ាស អេស ម៉នសុន « Learn of Me » Liahona, ខែ មិនា ឆ្នាំ ២០១៦ ទំព័រ ៤, ៦ ។
ស្ដាប់តាមព្រះបន្ទូលទាំងឡាយរបស់យើងចុះ
ការស្តាប់គឺជារឿងសំខាន់មួយក្នុងការអភិវឌ្ឍសេចក្ដីជំនឿលើព្រះយេស៊ូវគ្រីស្ទ ។ « សេចក្តីជំនឿកើតឡើងដោយឮ ហើយដែលឮនោះ គឺដោយសារព្រះបន្ទូលនៃព្រះ » ( រ៉ូម ១០:១៧ ) ។
« កូនចៅរបស់ព្រះគប្បីរៀនស្តាប់ បន្ទាប់មកស្តាប់ដើម្បីរៀនពីព្រះអម្ចាស់ » ( ប្រធាន រ័សុល អិម ណិលសុន ប្រធានកូរ៉ុមនៃពួកសាវកដប់ពីរនាក់ « Listen to Learn » Ensign, ខែ ឧសភា ឆ្នាំ ១៩៩១ ទំព័រ ២៤ ) ។
ចូរដើរ
ការរៀន និងការស្តាប់ពិតជាចាំបាច់ចំពោះការធ្វើតាមព្រះយេស៊ូវគ្រីស្ទ ។ ប៉ុន្តែវាពុំទាន់គ្រប់គ្រាន់នៅឡើយទេ ។ យើងត្រូវតែដើរ ឬអនុវត្តតាមឲ្យស្របតាមអ្វីដែលយើងបានរៀន និងស្តាប់ឮ ។
« ការដើរនៅលើផ្លូវរបស់ទ្រង់គឺជារឿងត្រឹមត្រូវជានិច្ច ។ វាមិនដែលយឺតពេលឡើយ » ( ប្រធាន ឌៀថើរ អេហ្វ អុជដូហ្វ ទីប្រឹក្សាទីពីរ នៅក្នុងគណៈប្រធានទីមួយ « The Way of the Disciple » Liahona, ខែ ឧសភា ឆ្នាំ ២០០៩ ទំព័រ ៧៨ ) ។
ភាពស្លូតបូត
ភាពស្លូតបូតរួមមាន « ការចេះអត់ធន់ចំពោះការរងទុក្ខ » ( សេចក្ដីណែនាំដល់បទគម្ពីរទាំងឡាយ «ស្លូតបូត, ភាពស្លូតបូត » scriptures.lds.org ) ។ ប្រសិនបើយើងស៊ូទ្រាំនឹងការសាកល្បងរបស់យើងដោយភាពស្លូតបូត ដោយពុំអាក់អន់ចិត្តនឹងព្រះ យើងមិនត្រឹមតែប្រែចិត្តជឿប៉ុណ្ណោះទេ ទ្រង់ថែមទាំងព្យាបាលយើងផងដែរ ( សូមមើល គ. និង ស. ១១២:១៣ ) ។
ព្រះវិញ្ញាណរបស់យើង
ភាពស្លូតបូតនាំមកនូវ « វត្តមាននៃព្រះវិញ្ញាណបរិសុទ្ធ » ( មរ៉ូណៃ ៨:២៦ ) ហើយវាគឺជា « ផលផ្លែនៃព្រះវិញ្ញាណ » ( សូមមើល កាឡាទី ៥:២២–២៣ ) ។
សេចក្ដីសុខសាន្តក្នុងយើង
« ភាពសុខសាន្តពុំមែនរកបានតាមរយៈការទទួលបានទ្រព្យសម្បត្តិមហាសាល អំណាច ឬកេរ្តិ៍ឈ្មោះល្បីល្បាញនោះទេ ។ ភាពសុខសាន្តពុំមែនរកបានតាមការធ្វើតាមចំណង់ ការកម្សាន្ត ឬលំហែកាយនោះទេ ។ ទោះបីជាបានទទួលយ៉ាងច្រើនលើសលប់នូវអ្វីៗទាំងនោះក្តី វាពុំអាចបង្កើតសុភមង្គល ឬភាពសុខសាន្តយូរអង្វែងបានឡើយ ។
… ព្រះអង្គសង្គ្រោះ … ទ្រង់ជាប្រភព ហើយជាព្រះនៃក្ដីសុខសាន្ត ។ ទ្រង់ជា ‹ ម្ចាស់នៃមេត្រីភាព › [ អេសាយ ៩:៦ ] » ។
អែលឌើរ ឃ្វីនថិន អិល ឃុក ក្នុងកូរ៉ុមនៃពួកសាវកដប់ពីរនាក់ « Personal Peace: The Reward of Righteousness » Liahona, ខែ ឧសភា ឆ្នាំ ២០១៣ ទំព័រ ៣៤ ។