បាវចនាម៉្ញូតឆលឆ្នាំ ២០១៨
ក្ដីសុខក្នុងទ្រង់
ទោះបីជាអ្នកមានស្ថានភាពបែបណាក្តី អ្នកអាចរកឃើញក្ដីសុខក្នុងព្រះយេស៊ូវគ្រីស្ទជានិច្ច ។
នៅក្នុងពិភពលោកមួយដែលពោរពេញទៅដោយការរំជើបរំជួលខ្លាំង ឧត្តមគតិផ្សេងៗគ្នា ការល្បួង និងទស្សនៈដ៏ច្របូកច្របល់ នោះការស្វែងរកក្តីសុខពុំមែនជារឿងងាយស្រួលជានិច្ចនោះឡើយ ។ ប៉ុន្តែការសន្យារបស់ព្រះអង្គសង្គ្រោះដែលមាននៅក្នុង គោលលទ្ធិ និង សេចក្តីសញ្ញា ១៩:២៣ ( បាវចនាម៉្ញូតឆលឆ្នាំ ២០១៨ ) ផ្តល់ផ្លូវជាក់លាក់មួយទៅរកក្ដីសុខ ៖ « រៀនអំពីយើង ហើយស្ដាប់តាមព្រះបន្ទូលទាំងឡាយរបស់យើងចុះ ចូរដើរក្នុងភាពស្លូតបូតនៃព្រះវិញ្ញាណរបស់យើង នោះអ្នកនឹងបានសេចក្ដីសុខសាន្តក្នុងយើង » ។
ក្នុងនាមជាគណៈប្រធានយុវជន និងយុវនារីទូទៅ ពួកយើងសូមថ្លែងទីបន្ទាល់ថា ការសន្យានោះគឺជាការពិត ។ ពួកយើងបានឃើញការណ៍នេះកើតមានឡើងក្នុងជីវិតរបស់យើងផ្ទាល់ ហើយប្រសិនបើអ្នកធ្វើតាមលំនាំនេះ នោះព្រះនឹងបំពេញការសន្យារបស់ទ្រង់ក្នុងការប្រទានក្តីសុខដល់ជីវិតអ្នកផងដែរ ។
អ្នកទាំងអស់គ្នាជាច្រើនអាចនឹងមានអារម្មណ៍ភ័យព្រួយ និងខ្វល់ខ្វាយអំពីអនាគតរបស់អ្នក ។ អ្នកទាំងអស់គ្នាជាច្រើនមានចម្ងល់អំពីរូបរាងកាយ សមត្ថភាព និងសក្តានុពលរបស់អ្នក ។ ប៉ុន្តែទោះបីជាអ្នកជួបនឹងរឿងអ្វីក៏ដោយ អ្នកអាចរកឃើញក្តីសុខបាន ។ នោះពុំមែនមានន័យថា គ្រប់សំណួរ ឬកង្វល់ទាំងនឹងត្រូវបានដោះស្រាយចេញរួចភ្លាមៗនោះទេ ប៉ុន្តែអ្នកអាចទទួលអារម្មណ៍បញ្ជាក់ដ៏ស្ងប់ស្ងាត់ថា រឿងទាំងឡាយនឹងដំណើរការទៅយ៉ាងរលូន ។ អ្វីដែលសំខាន់បំផុតនោះគឺថា អ្នកអាចទទួលអារម្មណ៍សេចក្តីស្រឡាញ់របស់ព្រះយេស៊ូវគ្រីស្ទចំពោះអ្នក ដោយផ្ទាល់ ហើយការណ៍នោះនាំមកនូវក្តីសុខដ៏ធំមហិមា ។
ចូរយើងនិយាយអំពីធាតុនីមួយៗដែលមាននៅក្នុង ខគម្ពីរនេះ ។
ចូររៀនអំពីយើង
ការស្គាល់ព្រះវរបិតាសួគ៌ និងព្រះយេស៊ូវគ្រីស្ទកាន់តែច្បាស់ គឺជាផ្នែកមួយដ៏សំខាន់នៃដំណើរជីវិតរបស់អ្នក ។ ព្រះអម្ចាស់បានមានបន្ទូលថា « នេះជាជីវិតដ៏អស់កល្បជានិច្ច គឺឲ្យគេបានស្គាល់ដល់ទ្រង់ដ៏ជាព្រះពិតតែមួយ និងព្រះយេស៊ូវគ្រីស្ទដែលទ្រង់បានចាត់ឲ្យមកផង » ( យ៉ូហាន ១៧:៣ ) ។ នៅពេលអ្នកស្គាល់ព្រះគ្រីស្ទកាន់តែច្បាស់ នោះអ្នកអាចយល់ថាតើទ្រង់មានសេចក្តីល្អ ព្រះប្រាជ្ញាញាណ សេចក្តីសប្បុរស និងសេចក្តីស្រឡាញ់ធំធេងប៉ុណ្ណា ។ សេចក្តីជំនឿរបស់អ្នកទៅលើទ្រង់នឹងរីកចម្រើនឡើង ហើយអ្នកនឹងមានបំណងប្រាថ្នាកាន់តែខ្លាំងឡើង ដើម្បីធ្វើតាមទ្រង់ និងព្រះវរបិតាសួគ៌ ។
ស្ដាប់តាមព្រះបន្ទូលទាំងឡាយរបស់យើងចុះ
ព្រះយេស៊ូវគ្រីស្ទមានបន្ទូលមកកាន់ពួកយើងតាមរយៈព្រះគម្ពីរ ពួកព្យាការីដែលនៅរស់ និងព្រះវិញ្ញាណបរិសុទ្ធ ។ យើងត្រូវតែទទួលទាន ពិចារណា ហើយអនុវត្តព្រះបន្ទូលទាំងនោះនៅក្នុងជីវិតរបស់យើង ។ នៅក្នុងការសិក្សារបស់អ្នកអំពីព្រះបន្ទូលរបស់ព្រះអង្គសង្គ្រោះ សូមផ្តោតទៅលើព្រះគម្ពីរមរមន ដោយសារយ៉ូសែប ស៊្មីធ បានបង្រៀនថា ព្រះគម្ពីរនេះ « គឺជាគម្ពីរដ៏ត្រឹមត្រូវបំផុតជាងគម្ពីរនានាទាំងអស់នៅលើផែនដីនេះ ហើយជាមូលដ្ឋាននៃសាសនាចក្ររបស់យើង ហើយបុគ្គលម្នាក់ៗអាចចូលទៅជិតព្រះបាន ដោយសារធ្វើតាមសិក្ខាបទទាំងឡាយនៃគម្ពីរនេះ ជាជាងគម្ពីរដទៃទាំងអស់ » ។១ ការអញ្ជើញដ៏មានអានុភាពរបស់ប្រធាន ថូម៉ាស អេស ម៉នសុនចំពោះយើង នៅក្នុងសន្និសីទទូទៅខែមេសា ឆ្នាំ ២០១៧ គឺឲ្យយើងអានព្រះគម្ពីរមរមនរៀងរាល់ថ្ងៃ វានឹងជួយយើងឲ្យស្តាប់ និងយល់ព្រះបន្ទូលនៃព្រះគ្រីស្ទ ។២
ដើរក្នុងភាពស្លូតបូតនៃព្រះវិញ្ញាណរបស់យើង
ការស្តាប់តាមព្រះបន្ទូលរបស់ព្រះអង្គសង្គ្រោះចាប់ផ្តើមផ្លាស់ប្តូរយើង នៅពេលយើងមានឆន្ទៈគោរពធ្វើតាមព្រះបន្ទូលទាំងនោះតែប៉ុណ្ណោះ ។ ការណ៍នេះតម្រូវឲ្យយើងមានភាពស្លូតបូត ។ វាតម្រូវឲ្យយើងបោះបង់ផ្លូវផ្ទាល់របស់យើង ហើយដើរលើផ្លូវរបស់ទ្រង់វិញ ។ ជួនកាលយើងគិតថា ផ្លូវរបស់យើងវាមានភាពប្រសើរជាង ។ ប៉ុន្តែនៅពេលយើងស្លូតបូត ហើយធ្វើតាមទ្រង់ ទោះជាទ្រង់ដឹកនាំយើងទៅទីណាក្តី នោះយើងនឹងស្ថិតនៅលើផ្លូវដ៏ល្អបំផុតជានិច្ច ។
អ្នកនឹងបានសេចក្ដីសុខសាន្តក្នុងយើង
នេះគឺជាការសន្យាដ៏អស្ចារ្យ ៖ ប្រសិនបើអ្នកនឹងធ្វើចំណុចទាំងបីនេះ — រៀន ស្តាប់ និងដើរជាមួយព្រះអង្គសង្គ្រោះ — នោះអ្នកនឹងមានក្ដីសុខនៅក្នុងជីវិតរបស់អ្នក ។ អ្នកនឹងមានការបញ្ជាក់ក្នុងចិត្តថា ព្រះគង់នៅក្បែរអ្នក ហើយថាទ្រង់នឹងមើលថែអ្នក ទោះបីជាអ្នកមានការភ័យខ្លាច ភាពមិនប្រាកដប្រជា ឬភាពទន់ខ្សោយក្តី ។ អ្នកអាចមានទំនុកចិត្ត — ពុំមែនគ្រាន់តែចំពោះខ្លួនឯងប៉ុណ្ណោះទេ ប៉ុន្តែទៅលើព្រះយេស៊ូវគ្រីស្ទ ព្រមទាំងសេចក្តីស្រឡាញ់ និងព្រះចេស្តារបស់ទ្រង់ផងដែរ ។
យើងអញ្ជើញពួកយុវវ័យទាំងអស់នៃសាសនាចក្រឲ្យទន្ទេញចាំខគម្ពីរនេះ ។ សូមប្រើប្រាស់វាជាអ្នកនាំផ្លូវនៅក្នុងជីវិតរបស់អ្នក ។ នៅពេលអ័ព្ទនៃសេចក្តីងងឹតហ៊ុមព័ទ្ធអ្នក ហើយហាក់ដូចជាច្រើនលើសលុប នោះអ្នកអាចគិតអំពីខគម្ពីរនេះក្នុងចិត្ត ធ្វើតាមលំនាំរបស់ខគម្ពីរនេះ ហើយភ្ជាប់ខ្លួនអ្នកទៅនឹងគ្រឹះដ៏រឹងមាំ និងពិតប្រាកដរបស់ព្រះយេស៊ូវគ្រីស្ទ ។