សារលិខិតគណៈប្រធានទីមួយ
អំណោយទាននៃការប្រែចិត្ត
ដោយប្រធាន ថូម៉ាស អេស ម៉នសុន
រូបភាពដកស្រង់មកពី Beside Still Waters ដោយ ស៊ីម៉ូន ឌីវី
ប្រធាន ថូម៉ាស អេស ម៉នសុន បានបង្រៀនថា « ការទទួលខុសត្រូវរបស់យើងគឺ ត្រូវក្រោកចេញពីអសមត្ថភាពទៅកាន់សមត្ថភាព ក្រោកចេញពីភាពបរាជ័យទៅកាន់សមិទ្ធិផលវិញ ។ ភារកិច្ចរបស់យើងគឺត្រូវក្លាយជាមនុស្សដ៏ល្អបំផុតចំពោះខ្លួនឯង ។ អំណោយទានមួយដ៏មហិមាបំផុតពីព្រះចំពោះយើងគឺ អំណរក្នុងការព្យាយាមសារជាថ្មី ដ្បិតបរាជ័យនឹងត្រូវសាបសូន្យទៅ » ។១
ជាញឹកញាប់ យើងភ្ជាប់ព្រឹត្តិការណ៍នៃឆ្នាំថ្មីជាមួយនឹងការតាំងចិត្ត និងគោលដៅនានា ។ យើងបានតាំងចិត្តថា កែលម្អខ្លួន ផ្លាស់ប្តូរ និងព្យាយាមសារជាថ្មី ។ ប្រហែលរបៀបមួយដ៏សំខាន់បំផុត ដែលយើងអាចព្យាយាមសារជាថ្មីនោះគឺ ការទទួលយកនូវអ្វីដែលប្រធាន ម៉នសុន ហៅថា « អំណោយទាននៃការប្រែចិត្ត » ។២
នៅក្នុងការដកស្រង់ដូចតទៅនេះមកពីការបង្រៀនរបស់លោក ចាប់តាំងពីលោកបានក្លាយជាប្រធានសាសនាមក ប្រធាន ម៉នសុន ទូន្មានយើងឲ្យ « អនុវត្ដព្រះលោហិតដ៏ធួននៃព្រះគ្រីស្ទ ដើម្បីឲ្យយើងអាចបានទទួលនូវការអភ័យទោសចំពោះអំពើបាបទាំងឡាយរបស់យើង ហើយដើម្បីឲ្យចិត្តយើងអាចបានជ្រះបរិសុទ្ធផងចុះ » ។៣
អព្ភូតហេតុនៃការអភ័យទោស
« យើងទាំងអស់គ្នាធ្លាប់ជ្រើសរើសខុស ។ ប្រសិនបើយើងពុំទាន់បានកែប្រែជម្រើសទាំងនោះទេ ខ្ញុំអះអាងនឹងអ្នកថា មានរបៀបមួយដើម្បីធ្វើដូច្នោះ ។ ដំណើរការនោះត្រូវបានហៅថាការប្រែចិត្ត ។ ខ្ញុំសូមទទូចឲ្យអ្នកកែប្រែកំហុសរបស់អ្នក ។ ព្រះអង្គសង្គ្រោះរបស់យើងបានសុគតដើម្បីប្រទានឲ្យអ្នក និងខ្ញុំនូវអំណោយទានដ៏មានពរនោះ ។ ទោះបីជាផ្លូវនោះពុំងាយស្រួលក្តី ការសន្យានេះគឺពិត ៖ ‹ ទោះបើអំពើបាបរបស់ឯងដូចជាពណ៌ក្រហមទែងក៏ដោយ គង់តែនឹងបានសដូចហិមៈ › [ អេសាយ ១:១៨ ] ។ ‹ ហើយយើងជាព្រះអម្ចាស់មិនចាំពីអំពើបាបទាំងនោះទៀតទេ › [ គ. និង ស. ៥៨:៤២ ] ។ ចូរកុំដាក់ជីវិតដ៏អស់កល្បជានិច្ចរបស់អ្នកក្នុងភាពគ្រោះថ្នាក់ឡើយ ។ ប្រសិនបើអ្នកមានបាប កាលណាអ្នកត្រឡប់មករកផ្លូវវិញកាន់តែឆាប់ នោះអ្នកនឹងរកឃើញនូវភាពសុខសាន្ដដ៏ផ្អែមល្ហែម និងអំណរដែលកើតមានមកជាមួយនឹងអព្ភូតហេតុនៃការអភ័យទោស » ។៤
ត្រឡប់ទៅលើផ្លូវវិញ
« ទោះជាវាសំខាន់ដែលយើងត្រូវជ្រើសរើសដោយឈ្លាសវៃក្ដី ពេលខ្លះយើងក៏នឹងធ្វើការជ្រើសរើសដ៏ល្ងិតល្ងង់ដែរ ។ អំណោយទាននៃការប្រែចិត្ត ដែលព្រះអង្គសង្គ្រោះប្រទានឲ្យយើង អាចធ្វើឲ្យយើងកែប្រែជីវិតរស់នៅរបស់យើង ដើម្បីយើងអាចត្រឡប់ទៅកាន់ផ្លូវដែលនឹងដឹកនាំយើង ទៅកាន់សិរីល្អសេឡេស្ទាលដែលយើងស្វែងរកនោះ » ។៥
ផ្លូវត្រឡប់មកវិញ
« ប្រសិនបើអ្នកបានជំពប់ដួលក្នុងដំណើររបស់ខ្លួន ខ្ញុំអះអាងនឹងអ្នកថា អ្នកមានផ្លូវត្រឡប់មកវិញបាន ។ ដំណើរការនោះត្រូវបានហៅថាការប្រែចិត្ត ។ ទោះបីជាផ្លូវនោះលំបាកក្តី ប៉ុន្តែសេចក្ដីសង្គ្រោះដ៏អស់កល្បជានិច្ចរបស់អ្នកអាស្រ័យនៅលើវា ។ តើអាចមានអ្វីខ្លះដែលសក្ដិសមជាងការខិតខំរបស់អ្នកនោះ ? ខ្ញុំសូមអង្វរដល់អ្នកឲ្យតាំងចិត្តទីនេះ និងឥឡូវនេះ ដើម្បីបោះជំហានដែលចាំបាច់ ក្នុងការប្រែចិត្តឲ្យពេញលេញ ។ កាលណាអ្នកធ្វើវាបានកាន់តែឆាប់ នោះអ្នកនឹងអាចទទួលបទពិសោធន៍នៃភាពសុខសាន្ដ ភាពស្ងប់សុខ និងការអះអាងដែលបានថ្លែងដោយអេសាយកាន់តែឆាប់ផងដែរ [ សូមមើល អេសាយ ១:១៨ ] » ។៦
មនុស្សអាចផ្លាស់ប្តូរបាន
« យើងត្រូវចាំថា មនុស្សអាចផ្លាស់ប្ដូរបាន ។ ពួកគេអាចទម្លាក់ចោលទម្លាប់អាក្រក់ ។ ពួកគេអាចប្រែចិត្តពីការរំលង ។ ពួកគេអាចកាន់បព្វជិតភាពដោយសក្ដិសម ។ ហើយពួកគេអាចបម្រើព្រះអម្ចាស់ដោយឧស្សាហ៍ព្យាយាម » ។៧
ប្រែជាជ្រះស្អាតម្តងទៀត
« ប្រសិនបើមានអ្វីមួយដែលមិនត្រឹមត្រូវនៅក្នុងជីវិតរបស់អ្នក នោះអ្នកអាចមានផ្លូវដែលយកឈ្នះវាបាន ។ ចូរបញ្ឈប់អ្វីៗគ្រប់យ៉ាងដែលឥតសុចរិត ។ ពិភាក្សាជាមួយប៊ីស្សពរបស់អ្នក ។ ទោះបីវាជាបញ្ហាអ្វីក៏ដោយ វាអាចមានដំណោះស្រាយបាន តាមរយៈការប្រែចិត្តត្រឹមត្រូវ ។ អ្នកអាចប្រែជាជ្រះស្អាតម្តងទៀត » ។៨
តួនាទីដ៏ចាំបាច់របស់ព្រះអង្គសង្គ្រោះ
« ព្រះអង្គសង្គ្រោះរបស់យើងព្រះយេស៊ូវគ្រីស្ទ គឺជាផ្នែកដ៏ចាំបាច់នៃផែនការ [ នៃសេចក្តីសង្គ្រោះ ] ។ បើគ្មានពលិកម្មធួនរបស់ទ្រង់ទេ នោះមនុស្សទាំងអស់នឹងត្រូវបាត់បង់ ។ ទោះជាយ៉ាងណាក្តី វាពុំគ្រប់គ្រាន់ទេ បើគ្រាន់តែជឿទៅលើទ្រង់ និងបេសកកម្មរបស់ទ្រង់នោះ ។ យើងចាំបាច់ត្រូវធ្វើការ ហើយរៀន ស្រាវជ្រាវ ហើយអធិស្ឋាន ប្រែចិត្ត ហើយកែលម្អ ។ យើងចាំបាច់ត្រូវស្គាល់ក្រឹត្យវិន័យរបស់ព្រះ ហើយរស់នៅតាមវា ។ យើងចាំបាច់ត្រូវទទួលនូវពិធីបរិសុទ្ធសង្គ្រោះរបស់ទ្រង់ ។ មានតែការធ្វើដូច្នេះទេ ទើបយើងនឹងទទួលបានសេចក្តីពិត ទទួលបានសុភមង្គលដ៏អស់កល្បជានិច្ច » ។៩