អ្នកជិតខាងដ៏ចម្លែក របស់ខ្ញុំ
អ្នកនិពន្ធរស់នៅ វ៉ិចតូរីយ៉ា ប្រទេស អូស្ត្រាលី ។
ខ្ញុំកំពុងស្ថិតក្នុងស្ថានភាពមានទុក្ខលំបាក ប៉ុន្តែការទៅព្រះវិហារជាមួយអ្នកជិតខាងរបស់ខ្ញុំបានផ្លាស់ប្តូរអ្វីៗគ្រប់យ៉ាង ។
រចនារូបភាពដោយ រ៉ាហ្វែល ម៉ាយ៉ានី
ពីរបីឆ្នាំកន្លងទៅ ខ្ញុំបានបាក់ទឹកចិត្តដោយសារខ្ញុំមានអារម្មណ៍ថា ខ្ញុំពុំចង់និយាយរកនរណាម្នាក់ឡើយ ។ គ្រួសាររបស់ខ្ញុំរស់នៅឆ្ងាយ ហើយខ្ញុំគ្មានមិត្តភក្តិឡើយ ដូច្នេះខ្ញុំយល់ឃើញថាគ្មានហេតុផលនឹងរស់នៅទៀតឡើយ ។
ខ្ញុំរស់នៅជាមួយម្តាយមីង និងឪពុកមាខ្ញុំ ហើយអ្វីមួយដែលពួកគាត់បានប្រាប់ខ្ញុំកុំឲ្យធ្វើនោះគឺ ពុំត្រូវនិយាយជាមួយអ្នកជិតខាងយើងឡើយ ។ ពួកគាត់អះអាងថា អ្នកជិតខាងនោះជាជនចម្លែក ហើយពួកគាត់បង្កើតរឿងក្លែងក្លាយអំពីបុរសនោះដើម្បីបន្លាចខ្ញុំ ។
ប៉ុន្តែ នៅថ្ងៃសៅរ៍មួយបុរសនោះ និងក្មេងស្រីជំទង់ពីរនាក់អាយុដំណាលខ្ញុំ បានសូមជំនួយពីខ្ញុំក្នុងការធ្វើរបង ។ ខ្ញុំបានយល់ព្រម ហើយទៅធ្វើការនោះ ។
បន្ទាប់ពីការអង្កេតមើលក្មេងស្រីទាំងពីរនាក់នោះ ខ្ញុំបានដឹងថា ពួកគេមានចិត្តល្អ ដូច្នេះខ្ញុំបានចាប់ផ្តើមនិយាយជាមួយពួកគេ ដែលនាំឆ្ពោះទៅកាន់ការសន្ទនាអំពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ខ្ញុំមានសំណួរជាច្រើនដែលពួកគេបានឆ្លើយ ។ ខ្ញុំមានចិត្តរំភើបយ៉ាងខ្លាំង ។ អ្នកជិតខាងរបស់ខ្ញុំបានអញ្ជើញខ្ញុំឲ្យទៅព្រះវិហារជាមួយគាត់នាថ្ងៃបន្ទាប់ ដើម្បីដឹងថាតើខ្ញុំចូលចិត្តព្រះវិហារឬទេ ។ ខ្ញុំកំពុងស្ថិតក្នុងស្ថានភាពមានទុក្ខលំបាក ដូច្នេះខ្ញុំបានដឹងថា ខ្ញុំគ្មានអ្វីត្រូវខាតឡើយ ។
ការដើរឆ្លងកាត់ទ្វារព្រះវិហារទាំងនោះនៅព្រឹកបន្ទាប់នោះ ធ្វើឲ្យខ្ញុំមានអារម្មណ៍សុខសាន្តជាប់ក្នុងចិត្ត ជាអារម្មណ៍ដែលខ្ញុំពុំយល់ ប៉ុន្តែខ្ញុំបានដឹងថា ព្រះវិហារជាកន្លែងដែលខ្ញុំធ្លាប់បាននៅ ។ ខ្ញុំត្រូវបានណែនាំឲ្យស្គាល់អ្នកផ្សព្វផ្សាយសាសនានាព្រឹកនោះ ហើយខ្ញុំបានឃើញអំពីរបៀបដែលពួកគេ បានដឹង ថាសាសនាចក្រនេះពិត ។
ខ្ញុំបានចាប់ផ្ដើមស្តាប់មេរៀនជាច្រើនពីអ្នកផ្សព្វផ្សាយសាសនា ។គ្មានពេលណាល្អជាងពេលនេះឡើយ ដែលព្រះវរបិតាសួគ៌បានបញ្ជូនអ្នកផ្សព្វផ្សាយសាសនាពីរនាក់ដែលពេញដោយក្តីស្រឡាញ់ ការយកចិត្តទុក និងពេញដោយខាងវិញ្ញាណ ។ តាមរយៈជំនួយរបស់ពួកគេខ្ញុំបានទទួលចំណេះដឹងដែលពួកគេមានអំពីដំណឹងល្អ ។
បន្ទាប់ពីស្តាប់ពួកគេចែកចាយអំពីចំណេះដឹងផ្ទាល់របស់ពួកគេអំពីព្រះវរបិតាសួគ៌បានជួយពួកគេឆ្លងកាត់ការសាកល្បងនានា នោះខ្ញុំមានអារម្មណ៍ចង់អធិស្ឋានដើម្បីដឹងថា អ្វីដែលពួកគេបាននិយាយនោះពិតឬទេ ។ បន្ទាប់ពីអធិស្ឋាន ខ្ញុំទទួលអារម្មណ៍នៃសុភមង្គល ភាពសុខសាន្ត និងភាពស្ងប់នៅក្នុងចិត្តខ្ញុំ ។ ខ្ញុំបានដឹងថា ខ្ញុំបានទទួលចម្លើយនាយប់នោះតាមរយៈព្រះវិញ្ញាណបរិសុទ្ធ ។
ការមានចំណេះដឹងអំពីរឿងនេះ ទីបន្ទាល់ខ្ញុំបានរីកចម្រើនយ៉ាងលឿន ។ ចាប់តាំងពីចួលរួមសាសនាចក្រក្នុងឆ្នាំ ២០១៣ មក ខ្ញុំពិតជាបានឃើញពរជ័យដែលចំណេះដឹងអំពីព្រះវរបិតាសួគ៌បានប្រទានដល់ខ្ញុំ ។ ខ្ញុំមានអំណរគុណដល់អ្នកផ្សព្វផ្សាយសាសនា ហើយសម្រាប់អ្នកជិតខាងខ្ញុំក្នុងការអញ្ជើញខ្ញុំឲ្យមករកព្រះគ្រីស្ទ ។