O E Aoaoina se Mea Fou i Aso Uma?

O lenei tusiga sa muai faasalalauina i le Self-Reliance Services Blog.

O le faalauteleina o lou mafaufau e ala i le aoaoina o mea fou e lelei lea mo lou soifua manuia faalemafaufau.

Afai e te aluese mai mea e te masani ona fai ma aoao se mea fou, e faapei o le faaaogaina o se maso sa e le faaaogaina mo se taimi umi lava. E ui ina foliga e faigata i le amataga, a o e faataitai ona aoao se mea fou i aso taitasi, o le a e lelei atili ai lava i lena mea, o le a fetuunai e lou mafaufau luitau o aso taitasi, o le a faatupulaia lou mautinoa o oe lava i mea ua mafai ona fai, ma, o se mea sili ona taua, o le a avea le aoaoga ma se mea fiafia.

O le mea ua e aoaoina e le sili lona taua nai lo le auala lava ia na aoaoina ai. Faatasi ai ma komepiuta ma telefoni feaveai ma faamatalaga uma ua i ou aao, ua sili atu ona faigofie. O loo i ai foi polokalama e auina atu ia te oe “mea fou e aoao ai” i aso taitasi.

Ma e te le tau faia foi se sailiiliga auiliili i le Google po o le faitau atoa o tusiga i le Wikipedia. O le faaaogaina o lou mafaufau i ni alafou i aso taitasi e mafai ona faigofie e pei o le faitauina o se tusi, taulotoina o se tauloto puupuu, po o le aoaoina o se faiga fou o se kuka. Pe o le mafai ona e faia o se mea faaumiumi: aoao ona ta se mea faifaaili, iloa se taaloga po o se faamalositino fou, po o le malaga i ni nofoaga fou ma asiasi i tagatanuu.

O nisi la nei o faamanuiaga e ala i le uunaia o oe lava e aoao i ni mea fou:

E tetee atu i le faapaie.
O le a avea oe o se tagata lelei ma o le a fiafia e talanoa iai.
O le a maua ni au uo fou (ona o le mea e 2 i luga).
Ua e aoao tomai e pulea lelei ai ou taimi.
Ua e faatuina se faataitaiga lelei mo lau fanau—o le a latou iloa le fiafia e aoao ma faataitai ni mea fou.

Ua tatou i ai uma iinei i le lalolagi mo le ola atiae o le tagata lava ia. Afai tatou te aoao le ala e aoao ai o le a faateleina le televave o le ala tatou te ola ai. O lenei mea e mafai ona faaleleia lo tatou matua faalemafaufau, lo tatou agavaa e tutumau ai i ni galuega fai, ma lo tatou onosai i isi.

E tele naua mafuaaga e aoao ai se mea fou i aso taitasi. O se tasi o mafuaaga sili e mai ia Alex Blackwell, na faapea mai o le aoaoina o se mea fou i aso taitasi e “fesoasoani e te iloa ai le taua o mea o loo siomia ai oe. O nisi o taimi ua na o sina vaaiga itiiti lava tatou te manaomia e maua ai le agaga faafetai sili ma le lagona o le taua mo mea o loo siomia ai i tatou” (“The Benefits of Trying New Things,” Everyday Inspiration, Beliefnet, Mar. 2014).

O le vaega faigata o le amataga, o le togafiti lea e amata ai: Fesili i se tamaitiiti e fa tausaga le matua po o le a le mea ua latou vaai atu i ai. O le mea moni, tau lava ina fesili. Atonu o le a latou tilotilo mai ia te oe, pe tilotilo solo, tilotilo i luga o le lagi po o lalo i le palapala. Saili i le Google le mea ua fai mai pe vaai i ai le tamaitiiti maelega. Aoao mea uma e mafai ai e uiga i lena mea e tasi. Mo se faataitaiga, afai e ta’ua e le tamaitiiti laulaau o se laau, saili po o le a le ituaiga o laau, le lapoa e ola ai, ma le mea e afua mai ai. O le a e fiafia e te sailiili solo, ma o le a fiafia ia te oe lou mafaufau ona o lea.

Ia ave laia o lena lava mataupu faavae ma ola ai i lou soifuaga faaleagaga. A o e faitau i tusitusiga paia, taofi mo sina taimi ma fesili ifo ia te oe lava, “O le a tonu lava le uiga o lena mea?” Mulimuli i mau uiga tutusa. Mafaufau loloto i le uiga. Tatalo ia malamalama. Afai tatou te taofi mo sina taimi ma faafilemu o tatou mafaufau, o le taimi lena e aoao ai i tatou e le Agaga, e masani ai o ni nai auala laiti, o lea fuaiupu ma lea fuaiupu.

A o ola atiiae o tatou mafaufau ma agaga i aso taitasi, o le a e maua le fiafia ma lelei tele mea e te faia.