Ola ai i O’u Tulaga Faatonuina
Saunia e Becky Craven
Fesoasoani Lua i le Au Peresitene o Tamaitai Talavou
“Tutu o ni molimau a le Atua i taimi uma ma i mea uma” (Mosaea 18:9).
O loʻu tama sa i ai i le militeli, o lea sa matou fesiitai solo ai ao o’u laitiiti. O se tasi o mea sili ona faigata e uiga i le siitia ese o le tuua o a’u uo. Sa faigata ia te au le faia o ni uo fou aua sa ou matamuli. O le mea e faafetai ai, o tagata sa masani ona faauogofie i le aʻoga ma le Peraimeri. I le lotu e le afaina pe na faapefea ona eseese i matou. Sa matou uo uma.
O se tasi auala na ou faatoilaloina ai loʻu matamuli o le fesoasoani lea i le lotu. Na amata i le Peraimeri. Sa ou faasoaina atu se mau i le taimi o fetufaaiga. Sa ou faitau leotele i le vasega. O sina mea itiiti i lea taimi ma lea taimi, na ou lagona atili ai le to’a. Na fesoasoani lenei mea ia te aʻu e tu atu ai mo oʻu talitonuga.
A o ou i ai i le vasega fa po o le vasega lima, sa nonofo lou aiga i Maryland, ISA. E le tele ni tagata o le Ekalesia i laʻu aoga. Sa i ai ni aʻu uo o e na avea ma tagata o le Ekalesia ma uo e le auai.
A o ou talavou, na faia e nisi o aʻu uo ni mea e le talafeagai ma oʻu tulaga faatonuina. Ae latou te leʻi taumafai e tulei aʻu e faia. Ou te faafetai ona sa faaaloalo au uo i oʻu talitonuga. O nisi taimi ou te lagona ai le tuuatoatasi ona ua le mafai ona ou faia mea uma na faia e a’u uo aʻoga. Ae ou te lagona pea le lelei e uiga i le mulimuli i oʻu tulaga faatonuina. Sa ou filifili o le a ou ola i le talalelei, e tusa lava po o le a. Na tuputupu ae malosi lau molimau i le Peraimeri ma le afiafi faaleaiga. Na ou iloa o au o se atalii o le Atua.
I tausaga mulimuli ane, na ou iloaina ai e toalua aʻu uo aoga na auai i le Ekalesia. Sa matuai o’u fiafia lava! Sa latou fai mai ia te aʻu o le vaavaai mai ia te au o ola i le talalelei ao matou laiti na fesoasoani ia i latou e filifili ai e faalogo i faifeautalai.
Au uo talavou pele, o outou o alo o le tatou Tama Faalelagi. Afai e te manatua lenei upumoni taua i aso uma, o le ola ai i le talalelei o le a faigofie atu.