Faatoilaloina o Loʻu Fefe i le Mauaina o Fanau

Saunia e Christina Crosland

E alaala le tusitala i Texas, ISA.

O le mauaina o ni fanau e le o se suiga o le olaga sa ou fiafia e oo i ai.

O tamaiti e le o se sa ou fiafia i ai. O au o le uii o lo matou aiga, leai se poto masani i pepe, ma sa ou fefe pe a tilotilo mai se tamaitiiti laitiiti ia te au. O lea ina ua ou muai faaipoipo, o le mauaina o ni fanau o se suiga lea o le olaga sa ou le fiafia tele i ai.

Sa naunau lou toalua e amataina se aiga mai lava i le aso muamua, ae sa ou tauanau atu e ma te faatali. I na muai masina e lua, “Sei ta talanoa ai pe a tusa ma le tausaga” atonu o la’u mautau’ave lena.

E ui atonu e le o le mafuaaga lenei mo i latou uma o tauivi ma le faaiuga e faia ni fanau, sa ou iloa le mea na taofia ai au: o le fefe ma le manatu faapito, manino ma le faigofie. Ina ua ou manatu ane e faapea o se tina, sa le faatumulia lou mafaufau i ni foliga ataata aulelei ma le matagofie. Ae peitai, sa ou manatu i le leai o se moe i le po ma le utiuti o taimi paganoa. Ae le ta’ua ai le tiga ma le le maua o se toafilemu. Ou te manatua pea le taimi muamua sa ou faalogo ai e tusa ai ma le fanauina o se pepe. Sa ou manatu ai i le taimi lava lena o le a ou vaetamaina ni fanau.

I lo’u olaga atoa, sa ou le maua se toafimalie i le i ai o tamaiti, o lea a ou mafaufau i le mauaina o ni a’u lava fanau, sa ou le iloa pe faapefea ona fai. E faapefea ona ou mafai ona fa’amatu’u atu mea uma mo i latou?

O le ulua’i valu po o le iva masina o lo ma’ua aiga sa te’a atu e aunoa ma ni suiga tele. Sa i ai i lo’u toalua le tala malie faifaipea i soo se taimi lava ou te fesili atu ai, “Ma te mai la?” o lana tali, “Ua e maitaga!” E faasesepa ou mata ma faaauau pea, ma le tele o ‘alofaga i mafuaaga o le a le maua ai ni fanau i se taimi vave mai.

Ia aua nei malamalama sese ia te a’u, ou te lei lagona le mamafatu e maua ni fanau. Sa faia e maua ma lou toalua ni talanoaga ma malilie ai e faifai malie mai lea taimi i lea taimi. Ae i lou mafaufau, o le mauaina o fanau o le a le tupu mo se taimi umi lava.

E ui lava, sa ou iloa e sili atu le silafia e le Tama Faalelagi e uiga i le auala e mafai ona oo i ai lou olaga. O le ala lea, e ui i lau tautinoga mausali e ao ona faatali le mauaina o ni fanau, sa faaauau pea ona ou tatalo e uiga i le faaiuga a au lava ia faapea foi ma lou toalua. Sa ma tau atu i le Tama Faalelagi la ma ua fuafuaga ae sa tautino atu ma te talia se fuafuaga ese mai pe afai Lona finagalo lea. O se laasaga taua lena i le suia o le loto na faagasolo ona oo lemu mai ia te au.

O lena suiga sa lei tupu i le taimi e tasi. O le mea moni, sa ou le manatua lava le taimi tonu na amataina ai. Ae faifaimalie lava, sa amata ai ona faaitiitia lou tetee i le manatu o le amataina o se aiga. Sa amata ona ou manatunatu lava i ai, aemaise ua oo i le iuga alofaga sa ou faia. Sa ou manao e faatali seia maea le aoga— toeitiiti lava ou faauu. Sa ou manao e iloa le mea o le a ma i ai i le tausaga fou—ua maua e lou toalua se ofa mai se galuega. Sa faifaimalie ae mautinoa, sa amata ai loa ona fetaui mea uma.

Sa ou manatu faapea o se taufaamatau, ua leai ni alofaga sa ou tumau i ai mo se taimi umi lava. Ae ui i lea, na pau ai lava lena. Sa ou le fefe. O le fefe sa taofia i totonu ia te au mo le sefulu tausaga ua tuanai sa le toe iai. A le o lea, sa i ai faatasi ma le filemu malosi lava na aveesea ai.

O lea la i le taimi ua oo e faamanatu ai le tausaga muamua talu ona ma faatasi, sa leai sou alofaga e tali atu ai e leai i le amatalia ai o se aiga. Ua liua e le Alii lou loto ma faafilemuina ou popolega

Mulimuli ane, ua fesili mai se uo ia te au pe faapefea ona ou iloa o le taimi sao lea. Ou te tautino atu e le o le oo mai o se lagona sili ese o le lototele po o le alofa mo tamaiti, po o le mu o le loto. Ua na o le ala mai i le leai o se fefe E faapei ona folafola mai e le Atua i uluai Au Paia o Aso e Gata Ai: “Afai ua saunia outou o le a outou le matatau ai lava” (MF&F 38:30). Ia te au, o le leai o sou fefe o le tali lea mai le Alii ua faapea mai, “Ioe, ua e saunia.”

O se mea matagofie lava, o lena taimi muamua ua ou ataata ai ma faapea atu ioe i le tali a lou toalua, “Ua e maitaga!”

O lea ua ou i ai nei ma sapaia se pepe laiitiiti i ou lima. O loo ou aoao pea le avea ma se tina, ma ou te lei iloa lava le mea e fai i le i ai faatasi ma fanau a isi. Ae ou te iloa po o le a lava ou vaivaiga o i ai ae a oo loa i tamaiti, o loo tapuai mai le Tama Faalelagi mo au. Sa saunia e Ia au mo le taimi lenei. Sa ou lagona Lana fesoasoani paia, e ui i lagona le mautonu ma le popole. O le le maua o se moe i le po ma le utiuti o taimi paganoa ua na o ni osigataulaga laiti mo le olioli na oo mai ia te au ma lou aiga. Ou te iloa o loo silafia e le Tama Faalelagi o tatou popolega ma o tatou tulaga. Ma afai tatou te saili Lana fesoasoani, e mafai ona Ia fesoasoani e foia o tatou popolega ma agai i luma i le faatuatua.