Autalavou Matutua
O Le Fuafuaga Atoatoa
O le a le taimi mulimuli na le taunuu ai au fuafuaga? Vaiaso ua tea? Na tupu ia te a’u. Pe o le a lava le atoatoa o a tatou fuafuaga, o fegauiaiga ma pioga e le’i mafaufauina i le olaga e foliga mai o se mea moni o le olaga faitino. Ou te lei fuafua e fafano ni o’u maitaga se fa i le va o laʻu fanau e toalua, ae na tupu. Pe a faateia i tatou i fuafuaga na faataatitia ma le agaga tatalo i ni auala e lei mafaufauina–pe touulu faatasi mai i lalo—o le a le mea tatou te faia? I lenei lomiga, o loo faasoaina mai e le autalavou matutua mai tulaga eseese ni tali na latou maua i lenei fesili ina ua le o gatasi o latou aiga fuafuaina ma fuafuaga.
Mo aʻu ma loʻu toalua, na taofia e le fafano o o’u maitaga o ma’ua auala ma nuti ai o ma’ua fatu (tagai itulau 44). Mo Katerina ma lana tane, o le faavasegaina o manatu o le alalafaga e saili ai le siufofoga o le Alii na faamaonia ai se faalavelave i lo la ala (tagai itulau 48).
I nisi tusiga faaopoopo i luga o le initoneti, na faʻaalia ai e Christina ona popolega ma le le mautonu e uiga i le avea ma se tina, ma faamatalaina e Brian pe na faʻapefea ona suia fuafuaga a le la aiga ma lona toalua talu ai lona malaga atu e tautua i le militeli. Ua tuuina mai e Katie, o se talavou nofofua matutua, se malamalamaaga i le natura e faavavau o lo tatou faasinomaga o ni matua.
Pe o e faatalitali mo tamaiti e faamanuia lou fale, ia maua nisi tamaiti e sili atu tamaiti nai lo le mea na e fuafuaina muamua, pe o loo faatalitali mo le faaipoipoga, o le mea e tasi e mautinoa: O le Tama Faalelagi e i ai le fuafuaga atoatoa, ma o loo Ia taialaina ma lagolagoina i tatou i tulaga patino i le tagata lava ia, ao tatou saili e faaogatusa o tatou loto ma Lona finagalo.
E tusa lava po o le a le taunuuga, o le manao e aumai fanau i lenei lalolagi o le a faamanuiaina ai i tatou i se vaaiga loloto atu o le fuafuaga sili o le fiafia a le Tama Faalelagi. Po o fea lava o e i ai i lau malaga o le faatupuina o lou aiga, ao e faitauina a matou tala, ou te faamoemoe moni o le a taiala oe e le Agaga Paia i malamalamaaga po o tali atonu e fesoasoani ia te oe ao e agai i lau lava ala.
Manuia le faitauga!
Marianne von Bracht