Fugalaau ma le Saogalemu Tautupe

Saunia e Mechel Wall

E alaala le tusitala i Arkansas, ISA.

Ua faateleina e le Alii loʻu malosi, faateleina ou tomai, ma na Ia faia ia sili atu lo’u tulaga nai lo o le mea e mafai ona faia e a’u lava.

Ata

overturned tractor

Ata na tusia e David Green

O le mea moni na avea ma faalavelave i taimi uma ia te au lo’u le faauu mai le kolisi. Sa ou iloa afai e i ai se mea e tupu i loʻu toalua, ou te leʻi saunia i le itu tautupe e tausi ai lo matou aiga.

Ona tupu lea o se mea e le’i mafaufauina. Na ou mauaina se valaau taufaamatau, ma suia ai le olaga mai le telefoni.

“Vili le 911!” o le ee lea a lo’u toalua atuatuvale. “O loo ou mau i lalo o le palau!”

Na ou valaau mo le fesoasoani ma na vave lava ona ou taunuu i le fanua sa ia faamamaina, pasia ai le laina umi o taavale faalavelave faafuasei i luga o le auala maa agai atu i le matou fanua i Pea Ridge, Arkansas, ISA. Na ola Barry, ae e moi sa mau o ia i lalo o le afi o le palau lea na mafuli.

I le faaaogaina o meafaigaluega mo le laveaʻiina, na sii i luga e le aufaigaluega o faalavelave faafuaseʻi le palau ma toso ese Barry. O ona vae, susu i le suauu tiso, na foliga mai na gau solo. Sa faanatinati atu o ia i se nofoaga tutotonu mo ma’i tigaina, lea na ia mauaina ai se faamanuiaga faaleperisitua ao lei faia lana faata mo ona vae.

Na matou maofa ona e leai se ponaivi na gaui, ae o le pito i tua o se tasi o vae o Barry na matua mu i le suauu tiso. O le faalavelave lea na omia ai na amata ai foi ona aafia ona fatuga’o. Na tulaga faaletonu lona ola.

Ina ua mavae ona faaaluina e Barry ni aso tuga e lima i le falema’i, na amata ona pau i lalo le aofai o vaega oona i ona fatuga’o. Na mulimuli mai ai masina e tele o le suiga o fusiga, sosooga o le pau, taotoga, ma le togafitiga e faaaoga ai le okesene [hyperbaric oxygen therapy]. Ina ua amata ona ia faalogoina ua malosi, na toe faaauau le galuega faatau oloa a Barry mai le fale.

“E Leai Se Isi e Faafaigaluegaina A’u”

O lenei aafiaga na avea ma se valaau ua fafaguina ai a’u. A o oʻu faaaluina le tele o tausaga o mafaufau i mea e mafai ona ou faia pe a leai Barry, sa ou faia ni galuega volenitia, auai i vasega, ma saili ni galuega faavaitaimi. Ae e leai ni ou tomai faapitoa tau-maketi, ma e leai se isi na te faafaigaluegaina aʻu.

Matou te nonofo i se faatoaga, faatasi ai ma fanua lafumanu mo nai manu, o lea na amata ai ona ou suʻesuʻe i le olaga faifaatoaga. I se tasi aso na oo mai ai se manatu ia te a’u: fugalaau. Ina ua mae’a ona ou suesue e faatatau i le faiga o fugalaau, na ou filifili loa e faataitai. Sa ou alu i se konafesi mo tagata faitogalaau ma sauniuni mo le fesuiaiga mai le fai lafumanu i le faitogalaau. O lea, ia Novema 2016, sa ou lesitala ai mo se vasega o le Auaunaga mo le Ola Tutoatasi i le auala e amata ai ma faola ai laʻu lava pisinisi.

O La Matou Lava Faleoloa Fugalaau

O le kosi 12-vaiaso o le mea tonu lava lea na ou manaomiaina. Sa i ai laʻu fuafuaga faapisinisi ma le tele o manatu malie, ae sa leai saʻu faatulagaga. Na i ai ni manatu na oo mai i le taimi o le vasega ou te le’i mafaufauina muamua. Sa ou galue i vaega taitasi. A o oʻu faigaluega i lena tausaga muamua i le totoina ma le faatauina atu o fugalaau, o fautuaga ma mataupu faavae sa ou aoaoina i le vasega na amata ona aoga:

Sa ou maua se nonogatupe faapisinisi e maualalo le tului.
Sa ou faalauteleina laʻu maketi e aofia ai maketi faatau a le aufaifaatoaga ma faleoloa mo fugalaau.
Na ou faatonuina ni nai gaoioiga i la matou faatoaga o se faalautelega o aʻu auaunaga.

I le taufaaiuiuga o le 2017, ina ua mavae loʻu tausaga muamua o le faifaatoaga, na ou iloa ai o le faatau atu i faleoloa o fugalaau na tele le taimi na alu ai. “Ae a pe afai ou te tatalaina laʻu lava faleoloa mo fugalaau?” O lo’u mafaufau lea. Ua tapunia le faleoloa fugalaau i le lotoifale, ma ua avea le fale ma faatiga mata. O lea na ma faatauina ai ma loʻu toalua, toe faaleleia, ma tatala se faleoloa mo fugalaau lea e faatau atu ai foi faatufugaga ma meataulima mai le lotoifale. E le gata i lea, na ou tatalaina se pisinisi laau mautotogi ma le teuina o totonu o fale i laau.

Ou te faatauina atu aʻu fugalaau e ala i la matou faleoloa ma i fale fai kofe, faleoloa mo lavalava, ma se faleoloa i le malaevaalele mo le lotoifale. O aso taitasi, ou te selesele ai mea ou te manaomia.

E Alofa le Alii

E i ai laʻu molimau e alofa le Alii i laʻu pisinisi. Na fesoasoani mai o ia ia te au e faatuina le saogalemu mo aʻu lava ma galuega faavaitaimi mo le tele o tamaitai o e mananao e galulue i ni taimi fetuutuunai ma mo tamaiti o loo faigaluega ma aooga. O se tasi o le ma fanau teine e pulea le faatoaga fugalaau, ma o le ma fanau tama e toalua o loo faia le tele o galuega o le faatoaga, e aofia ai le fesoasoani i le fausiaina o se fale faasao mo laau. O Barry e fesoasoani i afiafi ma faaiuga o vaiaso, i le faiga o galuega mamafa.

Matou te lagolagoina uma le tasi ma galulue faatasi. Ua avea o se faamanuiaga mo tagata uma o aofia ai. Ou te pisi lava ae o loo i ai pea le taimi mo loʻu aiga, valaauga o le Ekalesia, tiute faale-auaunaga, ma galuega volenitia.

O le galue mai le taimi ou te totoina ai se fatu po o se tama’i laau i le taimi ou te tuuina atu ai se fugalaau i se tagata faatau ou te maua ai se lagona maoae o le ausiaina. E leai so’u masalosalo ua faateleina e le Alii oʻu tomai, ma na Ia faia ia sili atu lo’u tulaga nai lo o le mea e mafai ona faia e a’u lava.