Suiga o Loto, Suiga o Uo

Ua taofia le igoa

Kalefonia, ISA

I le avea ai ma se talavou, sa ou matua tetee lava, ma sa ou amio i ni auala na feteenai ma le auala na ou ola a’e ai. Sa amata ona ou inupia ina ua 13 oʻu tausaga, ma i loʻu tausaga mulimuli i le aoga maualuga, ua ou inu i le faaiuga o vaiaso uma.

Sa ou auai i le lotu i nisi taimi e faaitiitia ai feeseeseaiga ma ou matua, ae ou te moe i le sauniga faamanatuga ona ou agai atu ai lea i le matafaga ao lei amataina le Aoga Sa. O le fai atu sa le fiafia oʻu matua i laʻu amio o se faamatalaga mama [understatement]. E tatau ona viia i la’ua, ona sa la amanaiaina loʻu faitalia ao faaauau pea ona uunaia au e ola i le talalelei. Ae, e leai soʻu faamoemoe e tumau ai loʻu toaga i le Lotu, ma na mautinoa lava ou te lei vaai i se misiona i loʻu lumanai.

Ina ua maea le aoga maualuga, sa ou auai i le kolisi o le itumalo ma faaauau ai pea oʻu ala fouvale. Ae i le leva o se tasi po, ou te manatua le taoto i luga o loʻu nofoa ma mafaufau e uiga i loʻu lumanai. O le a le ituaiga tamaitai o le a ou faaipoipo i ai? Afai e fuli loʻu tua i le Alii, pe mafai ea ona ou toe foi mai? E pei lava ona taua nei faaiuga, e le’i uunaia ai au e sui.

I se taimi puupuu mulimuli ane, sa ou auai ai i se pati a se uo i tua o lana fale na i ai le ava malosi ma se afi mumu. Ina ua uma ni tausuaga ma aʻu uo, sa ou laa ese mo sina minute ma moeiini oʻu mata.

Ina ua toe pupula oʻu mata, sa ou maua sina taimi o le manino. Sa ou vaaia au uo o faia ni faatinoga valea ma na amata ona ou lagona e le tatau ona ou auai i lena vaega. Na ou alu ma filifili e taofi le inupia ma le alu i pati. O lona uiga o le a manaomia ona ou suia laʻu vaega o uo, lea sa le faigofie. Ae na ou faia.

O na filifiliga sa faamanuiaina ai lo’u olaga. Na iu lava ina ou auauna atu i se misiona ma faataunuuina le tele o valaauga. O le mea sili ona taua, sa ou faaipoipo i se tamaitai lelei i totonu o le malumalu. O lenei mea na taitai atu ai i faamanuiaga silisili o loʻu olaga.

Talu ai nei na ou faitau ai e uiga i le liuaina o Alema ma atalii o Mosaea (tagai Mosaea 27) ma pe na faapefea ona latou mauaina se suiga tele o le loto (tagai Alema 5:12-14), na aumaia i se vaega o tatalo faamaoni a le tama o Alema. Ona ou mafaufau lea i ou matua ma iloa ai, i le silia ma le 30 tausaga mulimuli ane, o loʻu aafiaga iloga i lena pati o se taunuuga tuusaʻo o a la tatalo.

I le taimi nei, i le avea ai o se matua o se tamaitiiti o loo tauivi ma faigata, ua ou maua ai foi i se tulaga talitutusa e pei o le tama o Alema ma oʻu foi matua. Ae i le faatusaina o tusitusiga paia ia te au lava ia, ou te faatuatua ma faamoemoe o le a i ai se aso o le a oo ai foi i lo’u atalii se suiga o le loto.