O Aposetolo i le salafa o le Lalolagi

Ua Asiasi Elder Cook i Pasila

Elder Cook Visits Brazil

Na malaga Elder Quentin L. Cook ma Sister Mary Cook i Pasila e asiasi i tagata o le Ekalesia. Na la o atu e aoao ma faasoa atu le alofa o Iesu Keriso.

Sa la asiasia le aai tele o Belo Horizonte. O le igoa o lena aai o lona uiga o le “tafailagi matagofie.” Na fai mai Elder Cook o loo i ai la goto aupito sili ona matagofie na ia vaaia!

E toatele tagata na o mai e faalogologo ia Elder Cook o lauga i se konafesi faalesiteki. Na ia valaauliaina tagata uma ia avea ma malamalama. O lona uiga o le avea ma se faataitaiga lelei ma fesoasoani i isi, e pei na faia e Iesu.

Sa matuai fiafia tamaiti ina ua feiloai ma se Aposetolo a le Atua!

Na asiasi atu Elder ma Sister Cook i se nofoaga autu e aoao ai faifeautalai. E faasoa atu e faifeautalai le malamalama o Iesu Keriso i aso uma!

E faapefea ona avea oe ma se malamalama i le fale, i lou tuaoi, ma i le aʻoga?

A avea i tatou o se malamalama, tatou te uunaia le lalolagi mo le lelei. -Elder Quentin L. Cook

Fai se Moli Pepa

ipu pepa

faapu pepa po o se penitala ma’ai

moli uila po o se moli susulu [glow stick]

1. Faʻaaoga le faapu pepa po o le penitala e faapupu faataamilo ai le ipu. Tui foi pu i le pito i lalo pe oti ese atoa (talosaga atu i se tagata matua mo se fesoasoani).

2. E pule lava oe i le teuteuina o lau ipu. Ona tuu lea o le moli po o le moli susulu i lalo o le ipu.

3. Tape moli ma vaai i le susulu o lau moli pepa!

Fautuaga: Afai e leai ni au ipu pepa, e mafai ona taai se fasi pepa ma faapipii faatasi pito.

Matamata i le Goto o le La

Faaalu se taimi e matamata ai ma fiafia i le goto o le la e pei ona faia e Elder Cook. Tusi se ata o le la goto na e vaʻaia. Ona mafaufau lea i se tagata o le vasega, tuaoi, po o se tagata o le aiga e mafai ona ia faaaogaina se uo. Ia faafiafiaina le latou aso i le faasoa atu o lau ata.