O Le Malamalama i le Ata o le Faaolataga na Aumaia ia te A’u le Filemu
E alala le tusitala i Filipaina.
Ina ua maua loʻu tina i le kanesa, e na o le faanoanoa na ou vaai ai i loʻu lumanaʻi. Ona ia tuuina mai lea o lana molimau e uiga i le ata o le faaolataga.
I ni nai tausaga ua mavae, i le aso o le faamanatuga o tausaga talu ona faaipoipo oʻu matua, na maua ai loʻu tina i le laasaga 4 o le kanesa o le atepili [pancreas]. O taunuuga o lana faata na faaalia ai o lona kanesa e lamatia ai le ola ma ua amata ona faaleagaina ai lona tino. O le taimi lena na ou iloa ai e le toe umi le soifua o loʻu tina.
Ou te lei sauni mo lena mea. Sa ou vaʻai pe o le a le olaga e aunoa ma loʻu tina. Na pogisa, faavauvau, ma faanoanoa mea uma. Sa le toe i ai le fiafia po o le ata--ma sa leai ni fusi mafanafana mai loʻu tina o le a faamafanafanaina ai aʻu. Na foliga mai ua le o toe i ai se ola.
Na mavae atu masina ma ua faaauau pea ona vaivai le tino o loʻu tina. Ae o le mea na sili ona ou maofa ai o lona manao lea e alu i le lotu, auai i suesuega o tusitusiga paia i aso taitasi, tuuina mai ni lesona ia matou afiafi faaleaiga, ma talie faatasi ma i matou.
I se tasi aso, na ou fesili ai ia te ia, “E te lei fesiligia le Tama Faalelagi? E te le o mafaufau pe aisea e te maua ai i le kanesa?” Ona ia tuuina mai lea o lana molimau e uiga i le ata o le faaolataga. Sa ia fai mai ia te au e manaomia ona ou malamalama i le ata o le faaolataga ina ia ou lagonaina le fiafia moni o loo aumaia ai. Na fai mai o ia pe a ou malamalama i le mea na tatou o mai ai, o le a lo tatou faamoemoega i lenei olaga, ma o fea tatou te o i ai, o le a ou malamalama o le a matou faatasi pea, o le a le mafai lava ona leiloa o ia ia te a’u. Sa ia uunaia au e faaauau ona sauniuni mo se misiona ma faasoa atu le talalelei a Iesu Keriso ma le ata o le faaolataga faatasi ma isi ina ia latou maua faamanuiaga o le mafanafana ma le fiafia.
Na ou iloa e sao lo’u tina. Aisea o le a ou fefe ai i le toesea o ia mai iinei i le lalolagi pe a ou iloa afai lava ou te tausia aʻu feagaiga ma faamaea le finagalo o le Tama o le a ou vaai ia te ia i le olaga a sau? Sa ou lagona le filemu.
I sina taimi mulimuli ane, na maliu loʻu tina. I le taimi o le falelauasiga a loʻu tina—o se aso faamanatu o lona olaga na matou faia ao lei teuina o ia—e ui lava sa faigata ma sa ou faanoanoa, na foliga mai ua filemu mea uma, ma na mafai lava ona ou lagonaina le i ai o loʻu tina. E oo lava i tagata na siomia au na foliga mai na faagaeetia. Sa ou iloaina sa ou lagonaina le faamanuiaga moni o le malamalama i le fuafuaga paia a le Atua.
Mulimuli ane, ina ua oo i le taimi e ave ai loʻu tina i le fanuatanu, na sau se tamaitiiti laitiiti ia te au ma fesili mai pe aisea ua ou le tagi ai. Na ou manatua le auala na ou mafaufau muamua ai i le maliu o loʻu tina ma pe na faapefea ona ou vaaia le tele o le faanoanoa ma le faavauvau. Sa ou ataata ma tootuli ifo i ona autafa. Sa ou fai atu ia te ia, “Ou te iloa o le a ou toe vaai i loʻu tina pe afai ou te faaauau pea ona mulimuli i poloaiga a le Atua.” Sa ataata foi le tamaitiiti, ma na ou iloa na ia lagonaina le filemu lava lea sa ou lagonaina.
Ua leai loʻu tina, ae o le pogisa, faavauvau, ma le faanoanoa sa ou manatu o le a faatumulia ai loʻu olaga ua le o i ai. Sa ou faatofa atu ia te ia ma taʻu atu ia te ia o le a ma feiloai i le isi olaga. Sa ou lagonaina le mafanafana e ui lava ua leai le matou tina. O se faamanuiaga na oo mai i le malamalama i le ata o le faaolataga.