Atatosi o le Faatuatua
Rodrigo Quintanilla
Valparaíso, Chile
“O Rodrigo o se tagata e ese le lelei, ou te mafaufau pe aisea na tupu ai lenei faalavelave ia te ia,” o le tala lea a Paola, o loo pueata faatasi mai ma Rodrigo ma le afafine laitiiti [granddaughter] a Rodrigo o Emily. “Ae i le taimi, ua matou malamalama ai i le ala na tali mai ai le Tama Faalelagi ia matou tatalo.”
“Sa tatau ona ou toe faatulagaina aʻu lava i le tulaga tau galuega, o lea sa ou tatalo ai mo le taitaiga a le Agaga,” o le tala lea a Rodrigo. “Na tali mai le Atua ia te a’u.”
“Sa ou ta’u pea ia Rodrigo ou te faamemelo ia te ia mo lona malosi,” o le tala lea a Paola, ma lana tama teine laitiiti [granddaughter] o Emily. “Ou te manatu ailoga e mafai ona ou lototele e pei o ia.”
“Ia tumau i le talalelei,” o le tala lea a Rodrigo ia i latou na feagai ma se faalavelave po o se mea na tupu na suia ai le olaga. E sili atu ona faigata le olaga e aunoa ma le talalelei.”
Faatasi ai ma le taitaiga mai le Agaga Paia ma le fesoasoani mai lona aiga, na amata ai e Rodrigo se pisinisi faamanuiaina i le aiga.
Ina ua le mafai ona savali talu ai se faalavelave tau galuega, na le mafai ai e Rodrigo Quintanilla ona toe galue o se tagata uelo—pe faia foi le tele o isi mea. Ae na ia filifili e agai i luma ma le faatuatua, faalagolago i le fuafuaga a le Tama Faalelagi mo ia ma lona aiga.
Leslie Nilsson, tagata pueata
A tupu se mea matua leaga ia i tatou, e mafai ona tatou tali atu i se tasi o auala e lua. E mafai ona tatou ita i le Atua ma o ese mai le Ekalesia, e le toe manao e i ai se sootaga i ai. Pe mafai foi ona tatou tootutuli, tatalo, ma faaauau pea ona tuputupu ae.
Sa le’i leiloa loʻu faatuatua, ou te le’i fesili ifo foi ia te a’u lava, “Aisea na tupu ai lenei mea ia te a’u?” Sa ou musu e alu i lalo i lena auala.
Pe a oo mai se tofotofoga ia i tatou, ou te iloa ua saunia e lo tatou Tama oi le Lagi se auala e sao ai mai lena tofotofoga. A o ou toe malosi, o le i ai o le mafutaga a le Agaga Paia sa taua. Sa tatau ona ou toe faatulagaina aʻu lava i le tulaga tau galuega, o lea sa ou tatalo ai mo le taitaiga a le Agaga. Na tali mai le Atua ia te a’u.
Sa ou faaaluina le tausaga muamua ina ua mavae loʻu laveaga ina ia toe malosi ma faamaloloina. Sa ou faaaluina le tausaga lona lua e fuafua ai le mea e fai. Sa manaomia ona ou maua se mea o le a mafai ona totogi ai manaoga autu o loʻu aiga--o se galuega e le manaomia se malosi tele ma e mafai ona ou faia mai se nofoafaatavalevale.
Faatasi ai ma le fesoasoani mai o loʻu toalua, o Paola, ma laʻu fanau, o Ricardo ma Nicol, na amata ai laʻu pisinisi i le-fale. Na matou amata e ala i le ofoina atu o se auaunaga tau kopiina o ki. Na faaopoopo lemu isi auaunaga. Sa ou aoina mai le malamalama mai i ma o. Sa ou aoao i le faataitai i ai. I le taimi nei, iva tausaga mulimuli ane, ua i ai le matou faleoloa fai ki ma se fale kopi pepa ma le auaunaga faamalopepa [laminating services].
Ae ou te lei lavea, na matou manatu o le a lusi le matou fale. Na mananao tagata o le aiga o e onaina le fale e faatau ese atu, peitai matou te leʻi mananao e me’i ese. Matou te fiafia i lo matou uarota.
Ina ua mavae loʻu laveaga, na fai mai loʻu tinamatua, “O le a ou tuuina atu laʻu vaega o le fale mo oe.” Na faapena foi loʻu tama. O se tasi o o’u aunt ma nisi o o’u uso ma tuafafine na latou foaia foi a latou aia tatau i le fale. Na latou faapea mai, “E mafai ona e nofo ii po o le a lava le umi e te manao i ai.” O se faamanuiaga lenei mai lo tatou Tama Faalelagi.
Ia i latou o e na mafatia i le faalavelave po o se mea na tupu na suia ai le olaga, ou te faapea atu, “E mafai ona faigata le olaga, ae ia tumau i le Ekalesia. Tumau i le talalelei. E sili atu ona faigata le olaga e aunoa ma le talalelei. Tuu atu le tele o taumafaiga e te mafaia, ma o le a faia e le Tama Faalelagi mea o totoe.”