Ua Na’o Tusiga Faatekinolosi
Ua I’u Lava Na Ou O’o i le Malumalu
I le ola ai i se motu itiiti i Keripiane ua fai ma mea faigata ona asiasi ai i le malumalu.
E alaala le tusitala i Barbados.
I ni nai tausaga ua mavae atu, sa ou le faalogo lava e uiga i malumalu. Ina ua tuanai ona maua le Ekalesia e tusa ma le tolu tausaga talu ai, sa foliga mai pea malumalu ua na o ni mafaufauga faamisionare. I si ou motu laiitiiti o Barbados i le Keripiane, o le manatu o se malumalu i le lalolagi e foliga mai o se tala faafagogo ofoofogia e masalomia lona faamaoni. Afai ua uigaese lava i latou, aisea la e leai ai se malumalu o Barbados?
I le tausaga talu ona auai i le Ekalesia, sa ou maua mulimuli ane le malamalamaaga sili i le matafaioi o malumalu i o tatou olaga o ni sui o le Ekalesia moni a le Tama Faalelagi. Sa uunaia au i se naunautaiga malosi lava e asiasi i le malumalu sili ona latalata ane i lou motu laitiiti—o le Malumalu o Santo Domingo Dominican Republic.
Faafitauli ma Sauniuniga
O le tau o le pasese o le vaalele i Dominican Republic sa sili ae nai lo nai tala sa i ai i lau tusitupe. O lea faafitauli ma lea faafitauli na foliga ua uunaia au mamao ese mai le manatu o se sini e le gafatia o le asiasiga i le malumalu. Ae sa ou fai ma au amio masani le le faagaloina o upu nei na sii ma ia Peresitene Thomas S. Monson (1927-2018): “Ia i ai pea lava pea le malumalu i lau vaai. Aua lava nei faia se mea o le a taofia ai oe mai le ulufale atu i ona faitotoa ma talisua ai i faamanuiaga paia ma le faavavau iina” (“O Le Malumalu Paia—O Se Sulu Ta’iala i le Lalolagi,” Liahona, Me 2011, 93).
O se tasi o fiafiaga sili i lenei olaga o le olioli e aumai e le malumalu. O le faalogo i faifeautalai o talanoa i le olioli ma le lagona silisili o le filemu e faatumulia ai pea i latou pe a latou asiasi i le malumalu e masani ona oo mai ai se mata’ua itiiti aua e ui ina ou tumau faamaoni i au feagaiga, sa ou le faamanuiaina e faapei o i latou, ona o le mafai ona savali pe tietie i le malumalu latalata ane. Ona o le mamao ese o le malumalu o le Dominican Republic, sa amata ona foliga e faapea o le a le mafai lava ona ou maua faamanuiaga o loo faatali mai mo au iina.
I lea lava taimi sa leai ai sou faamoemoe e toe asiasi i le malumalu, sa avea le malaga a le autalavou matutua a le Barbados Bridgetown Mission i le Dominican Republic ma taunuuga o au miti i le malumalu. O sauniuniga o le ki. O le ulufale i le malumalu e le o se gaoioiga itiiti pe le taua, o lea i le amataga o le tausaga, sa ou faia ai ni suiga e faamaualugaina ma faateleina ai lou faaleagaga. Sa ou talia ma le faamaoni le faamanatuga, sa amata ona taulai latalata i taimi o sauniga faamanatuga, sa tuuina atu lau molimau pe a maua lou avanoa, ma sa ou taofia le avea o tekinolosi ma faalavelave ia te au ma manatu ai e tuuina atu i le atoatoa ou itula o le lotu e sailia ai nisi o auala se tele e lagonaina ai i le atoatoa le Agaga.
Mulimuli ane …
O le saunia faaleagaga ma le agavaa a o lei ulufale i le malumalu e faamaonia ai o le a tatou maua faamanuiaga o loo faapolopolo e le Tama Faalelagi mo i tatou. Ina ua mavae masina o faigata, tofotofoga, e oo lava i le maliu o lou tina matua faapelepele, e leai ni upu e mafai ona faamatalaina sao ai mea sa ou lagonaina ina ua ou faia na sitepu muamua i lotoa o le Malumalu o le Dominican Republic. A o o’u tu ai iina ma loimata i ou mata, sa ou lagona le Agaga ou te lei maua lava i se taimi muamua.
I le tele o au asiasiga i le malumalu i lena malaga, sa ou tatala pea lava pea lau Tusi a Mamona i se mau faapitoa. O se tasi o mau sa masani ona ou faitauina i lou tina matua, e ui e le o ia o se tagata o le Ekalesia a o lei maliu o ia. E maua mai le 1 Nifae 3:7, e faitauina e faapea “Ma sa oo ina fai atu au, o Nifae, i lou tamā: O le a ou alu ma fai mea ua poloaiina e le Alii, aua ua ou iloa e lē tuuina mai e le Alii ni poloaiga i le fanauga a tagata, vagana o le a saunia e ia se ala mo i latou ina ia mafai ai ona latou faataunuuina o le mea ua ia poloaiina ai i latou.”
Ou te iloa ma le faamaoni uma lava sa saunia e le Tama Faalelagi se auala mo au e taunuu ai i le malumalu ma e auala mai Lana fetuunaiga paia sa mulimuli ane ua mafai ona ou oo ai iina. Soo se mea e i ai le faafeagai ma le tetee e taofia ai lo tatou ala, o le a saunia e le Tama Faalelagi le auala mo i tatou e agai ai i luma, e ui o lo tatou auala e foliga mai e pogisa. O le malumalu e faamaonia o se nofoaga paia e mafai ai ona tatou lagona le alofa o le Tama Faalelagi mo i tatou i lenei lalolagi.