O Le Avea ma Soo o le Taitaiga Faalelagi
Saunia e Epikopo Dean M. Davies
Fesoasoani Muamua i le Au Epikopo Pulefaamalumalu
Mai se saunoaga i le faigalotu, “God Will Use You, God Will Bless You,” na tuuina atu i le Iunivesite o Polika Iaga i le aso 3 o Novema, 2015.
Afai o le a e saili e avea ma soo moni o lo tatou Faaola pele, o le a taitaia ou ala e Alii le Atua o le lagi.
Ata na tusia e Kelley Morris
Ou te fia tautala i ni fesili se lua sa ou manaomia le taliina a’o ou laitiiti.
Muamua, afai e te tuuto atu lou olaga i le auaunaga a le Atua, mata o le a Ia taitaia ou laasaga ma faaaoga oe mo Ana fuafuaga amiotonu? Lua, afai e te filifili e mulimuli i le Faaola ma savali i le ala o le avea ma soo, mata o le a puipuia oe e le Alii, taiala oe, faamanuia oe, ma faatumuina oe i se agaga o le olioli ma le faamalieina ao Ia faaaogaina oe mo Ona faamoemoega?
Ou uso e ma tuafafine pele, afai tou te tuuina atu o outou loto i le Faaola ma taumafai e savavali i le faatuatua ma le agaalofa i le ala ua Ia poloaiina, ou te iloa o le a faaaogaina oe e le Alii i auala e le mafai ona e mafaufauina.
“Ae e le o a’u o se tagata faapitoa,” o la’u tala lea. “E pei lava a’u o isi tagata i tulaga uma, Ou te le o atamai tele, malualii, laei lelei, pe amio lelei foi. E faapefea ona faaaoga a’u e le Atua?”
Talu mai le amataga o taimi, sa aapa atu lo tatou Tama Faalelagi ia i latou o e tulaga tutusa ma isi ma faaaogaina i latou mo Ona faamoemoega. Na tusi atu le Aposetolo o Paulo ia te outou i le aso, e pei lava ona ia faia i tagata Korinito anamua:
“Ua filifilia e le Atua mea valea a le lalolagi ina ia faamaina e popoto; ma mea vaivai a le lalolagi ua filifilia ia e le Atua e faamaina ai mea malolosi;
“Ma mea a tagata nuu, ma mea faatauvaa a le lalolagi, ua filifilia ia e le Atua, atoa ma mea e leai, ina ia faaleaogaina e ia mea o i ai:
“Ina ne’i mitamita se tagata e toatasi i ona luma” (1 Korinito 1:27–29).
Ina ua oo mai le taimi mo lo tatou Faaola e toefuatai mai ai Lana Ekalesia i le lalolagi, aisea e te manatu ai na Ia filifilia se tamaitiiti faatauvaa e le’i tele sona aoaoina aloaia?
O le a sou manatu aisea na taʻu atu ai e le Atua ia Kitiona, o se faifaatoʻaga, e auina atu pea fitafita i le fale seia oʻo ina na o le 300 alii na totoe e feagai ma le fili le mafaitaulia? (tagai Faamasino 7:1–25).
Aisea e te manatu ai na filifilia e lo tatou Faaola se faifaiva e avea ma Ana Aposetolo sili ma taitai le Ekalesia ina ua mavae atu o Ia? (tagai Mataio 16:18).
Muamua, talu ai “e le vaai Ieova pei o le vaai o tagata; aua e vaai tagata i le tino, a e vaai Ieova i le loto” (1 Samuelu 16:7).
Lona lua, aua e mafai e le Atua ona ave le eleʻele sili ona faatauvaa ma faia ai o se mea sili ona matagofie. E moni, “afai ua au ma i tatou le Atua, o ai se e faasagatau mai?” (Roma 8:31).
Lona tolu, e filifilia e le Atua ē vaivai ina ia leai se tasi e mafai ona mitamita ma fai mai, “Ua ou faia lenei mea mai loʻu lava atamai.”
Pe a ave e Peteru, o se faifaiva faatauvaa, se vaega toaitiiti o tagata talitonu ona ia leoleo lea oi latou i totonu o se Ekalesia malosi, e sii e tagata o latou leo ma faafetai atu i le Atua.
A osofaia se autau o le faitau afe o tagata e se vaega o le 300, e viia e tagata le Atua.
Ina ua tuua e se tama faifaatoaga le suotosina ma faaliliu le tusitusiga aupito sili ona musuia ma suia ai le olaga talu mai le Tusi Paia, e le viia tagata i le atamai o le tagata ae i le mana o le Atua.
E le manaomia oe e le Tama Faalelagi ia e malosi, atamai, pe tautala lelei. Na te manaomia oe e liliu atu lou loto ia te Ia ma saili e faamamalu o Ia e ala i le auauna atu ia te Ia ma aapa atu ma le agaalofa ia i latou o siomia oe.
Auaunaga a le Agaga Paia
O le mea lona lua ou te manao e faamamafa atu ia te oe, afai o le a e mulimuli i le Atua i le moni ma le malosi, o le a Ia faamanuiaina oe i auala e le mafai ona e malamalama i ai.
I le 2006, na fuafua ai e Peresitene Gordon B. Hinckley (1910–2008) ma le Au Peresitene Sili e tatau ona i ai se malumalu e fuafuaina mo San Salvador, El Salvador. Sa matou asiasi i le tele o fanua, e aofia ai le poloka atoa o le aai o loʻo i totonu o le ogatotonu o le taulaga. A o matou tietie atu mai lea fanua i lea fanua, e leai se mea na foliga mai e lelei.
Mulimuli ane, na matou pasia se eria ua amata ona atinae i le itu i sisifo o le aai. Sa ou lagonaina se mea i lena eria ma savalivali solo i ni nai poloka. O le tasi fanua na siosiomia e se puipui na tulagaese mai lava. Sa ou aapa atu i tagata e onaina ma mauaina le tala e le o avanoa le fanua, o lea na ou alu ai i le fale.
Ae na fai mai le perofeta o le a fausia se malumalu i San Salvador, o lea na ou toe foi ai e matamata i isi fanua. Na toe tosoina atu aʻu i le fanua ma le puipui, ma ou toe faafesootaʻia. Sa latou toe fai mai e le o avanoa le fanua.
Na ou toe foi i le fale ae sa le mafai lava ona luluesea le lagona faapea o le nofoaga lenei e tatau ona i ai le malumalu. Sa ou faafesootaia le aiga ma talosagaina pe mafai ona latou feiloai ia te aʻu. Sa latou malie i ai. O lea, sa ou toe malaga i San Salvador, faatasi ai ma Robert Fox, o se uo ma se tagata faigaluega i le vaega o meatotino a le Ekalesia. O lena taeao na ma tootutuli ai i le tatalo i totonu o loʻu potu ae leʻi amataina le aso ma ole atu mo le fesoasoani a le Alii.
A o matou tietie e ui atu i le pa e agai atu i le fale, sa toetoe lava e pei o ulufale atu i se togalaau paia. Sa i ai laau ma fugalaau, ma o le pisapisao mai le pisi i fafo atu na gata i le pa. Na faatalia mai i ma’ua e le susuga ia Miguel Dueñas, lona uso, ma atalii e toalua a Miguel. Sa latou faafeiloaia i ma’ua ma avatu i ma’ua i le fale o o latou augatuaa—lea e tele ma lautele.
Sa ma taʻu atu ia i latou sa ma i ai iina ona o se valaauga mai le peresitene o la matou Ekalesia ma sa manao o ia e faamanuia le atunuu ma tagata o le Ekalesia e ala i le fausiaina o se malumalu iina. Sa ou faaali atu ata o isi malumalu. Sa ou fai atu sa ma lagona o lo latou fanua, o le fale o o latou augatuaa, o le nofoaga saʻo lea.
Sa le o se mea na faateia ai ina ua latou toe teenaina, ae e tatau ona ma faia se taumafaiga. Ma o lea mo le toeitiiti atoa le itula na matou taumafai ai i auala uma lava, e pei o se faatau saʻo, se fesuiaiga o meatotino, ma isi filifiliga uma e mafai ona ma mafaufau i ai. Ae na latou mausali lava i le latou faaiuga ma fai mai leai i ofo uma.
Sa ma faia mea uma e mafai ona ma faia. Sa ma saunia. Sa ma faia le mea sili i auala sa ma iloa. Ae sa le’i lava lea.
Sa tumu loʻu loto i se tatalo faanatinati: “Tama, faamolemole fesoasoani mai ia i maua ia iloa upu e fai atu po o le mea e fai.”
Na iu lava ina manino mai ua le manuia le ma malaga. Na foliga mai e leai se mea e suia o latou mafaufau. Ae a o amata ona ma sauni e o ese, na i ai se mea na tupu. Na ulufale atu le Agaga o le Alii i totonu o le potu. O se mea mautinoa. Na lagona e tagata uma i le potu. O se tasi lea o aafiaga sili ona mamana faaleagaga na ou lagonaina.
O Miguel Dueñas, e le o se tagata o le Ekalesia, na amata ona tagi. Na faliu Mr. Dueñas i lona uso ma fai atu, “Afai e le mafai ona faatau atu le fale o o tatou augatuaa, pe le mafai ea ona tatou faatauina atu le vaega pito sili ona lelei o le fanua o loo i le isi itu o le auala?”
Na tali lelei mai lona uso. Ona matou talanoa lea e uiga i le isi fanua. Sa latou umiaina le ta’i selau eka i le isi itu o le auala autu mai le fale a o latou augatuaa, ma o le ogatotonu o le fanua o loo osooso ese atu ina ia mafai ai e taavale uma e malaga i le auala ona vaai i le malumalu.
O le fanua lena na latou ofoina atu mo le malumalu o le Alii. Sa avea moni lava ma se vavega. Mai lena taimi e agai mai i luma, na i ai faamanuiaga a le Alii i le faagasologa. I le aso 21 o Aokuso, 2011, na faapaiaina ai e Peresitene Henry B. Eyring, ao Fesoasoani Muamua i lena taimi i le Au Peresitene Sili, le malumalu mo le auaunaga a le Alii.
Ou te molimau atu o loo tu se malumalu matagofie i atumauga o San Salvador ma e le o se taunuuga o se upu po o se mea na faia e Uso Fox po o a’u. O loo tu ai iina i aso nei ona o le auaunaga mamana a le Agaga Paia a lo tatou Atua Silisiliese.
O Lo Tatou Tama Alofa
Afai e popole tele le Alii e auina mai Lona Agaga ma faaavanoaina se nofoaga mo se malumalu, e te le o manatu ea o le a Ia auina mai Lona Agaga ma saunia lou loto ma taiala ou ala?
E le mafaamatalaina le sili atu o lou taua nai lo se fasi fanua. O oe o se atalii/afafine faapelepele o le Atua. O oe o le fanau a le Atua o le atulaulau!
E te le manatu e silafia oe e Ia? E te le manatu o le a Ia faaaogaina oe ma faamanuia oe i auala sili atu ona mamalu nai lo mea e mafai e oe ona mafaufau i ai?
Ua taʻu mai e tusitusiga paia ia i tatou afai tatou te “faatuatua ia Ieova ma o [tatou] loto atoa; ae aua le faalagolago i le [tatou] lava atamai,” afai o tatou ala uma tatou te “manatua o ia, … ona faatonuina ai lea e ia lava [o tatou] ala” (Faataoto 3:5–6).
O le Tupu o Peniamina na aoteleina atoatoa le savali lea ou te manao e tuu atu mo outou. Na ia faapea mai: “Ou te manao ia outou manatunatu i le tulaga manuia ma le fiafia o i latou o e e tausi i poloaiga a le Atua. Aua faauta, e faamanuiaina i latou i mea uma, i mea uma faaletino ma faaleagaga; ma afai latou te tutumau i le faamaoni e oo i le iuga, e talia i latou i le lagi, ina ia mafai ona latou mau faatasi ma le Atua i se tulaga o le fiafia e lē gata” (Mosaea 2:41).
Ou te sii aʻe loʻu leo i le viiga ma molimauina lenei mea moni. Ou te molimau atu ua ou vaai i faamanuiaga folafolaina a le Atua na faataunuuina i loʻu lava olaga ma olaga o le tele o isi.
Ou te folafola atu afai o le a outou tosina atu o outou loto i lo outou Tama oi le Lagi, afai o le a outou taumafai i aso taitasi e alolofa ma mulimuli ia Iesu Keriso ia sili atu ona atoatoa, afai o le a outou faasoa atu avega i le agaalofa ma le agalelei ma sii i luga lima oi latou o siomia outou o loo tauivi, afai o le a e saili e avea ma soo moni o lo tatou Faaola pele, o le Alii le Atua o le lagi, o le a taitaia ou ala. O le a ia faaaogaina oe mo Ona faamoemoega mamalu. O le a Ia faamanuiaina oe i auala e le mafai ona e mafaufauina.