E Mafai e La Tatou Auaunaga Ona Fesoasoani e Faamaloloina Isi?

I se tasi Aso Sa, sa ou saofai i le sauniga faamanatuga ma mafaufau loloto ina ua ou faitau i a’u tusitusiga paia faapea e tatau ona tatou faia galuega na faia e le Faaola (tagai 3 Nifae 27:21). Sa ou manatu ia te au lava ia, “O a galuega a Keriso i luga o le fogaeleele?” Sa ou mafaufau muamua i mea e lua: auaunaga ma le faamalologa. O le auaunaga e mafai ona ou faia, ae o le faamalologa?

O le mataupu o le faamalologa o se tasi o mea na ou mafaufau loloto i ai i le tele o taimi. I lo’u olaga sa faia ni oʻu taotoga e 16 ma sa manaomia ona faia le tele o faamalologa! Ae sa ou mafaufau pe mafai faapefea ona ou pei o Iesu Keriso ma fesoasoani i isi ia faamaloloina. E mautinoa lava sa le i ai ia te aʻu mana faamalolo sa ia te Ia. E faapefea la ona finagalo o Ia ou te faia Ana galuega o le faamalologa i luga o le fogaeleele? O le a se mea e mafai ona ou faia?

A o ou mafaufau loloto i auala na fesoasoani ai isi ia te au e faamalolo, na tatalaina loʻu mafaufau i galuega ofoofogia o le faamalologa–faamafanafana, auauna atu, ma auaunaga–na faia e isi mo au i loʻu olaga. Faatasi ai ma le taulaʻi atu i le auaunaga i isi i auala e finagalo ai le Faaola, o lenei mataupu o le fesoasoani i isi e faamaloloina o se mea mamana. O i tatou uma lava o mafatia i le taimi o la tatou malaga faaletino i luga o le fogaeleele. E tele naua i latou e i ai maʻi o le tino po o le mafaufau pe o loo mafatia faaleagaga. O i tatou uma lava e manaomia le faamalologa. E pei ona ou faamalamalama atu i laʻu tusiga (itulau 20) ma e pei ona aoao mai e Elder Neil L. Andersen i lana tusiga (itulau 12), o i tatou uma lava e mafai ona auai i le auaunaga i isi i auala o le a fesoasoani e faamaloloina ai i latou.

Ma le faamaoni lava,

Merrilee Boyack