Taxco, Mekisiko

O Taxco de Alarcon, Guerrero, Mekisiko, sa avea ma se aai e eli ai maina, ua lauiloa i le taimi nei o se tasi o pueblos magicos (aai maoa’e), tautaua mo lona gaosiga o meataulima siliva, fausaga o fale koloniolo faa-Sipaniolo, ma le matagofie o laufanua lata ane. O loo taoto le aai i luga o laufanua gaoa ma o auala e tifato ma e le saʻo. O lona nofoaga autu o le falesa Santa Prisca mai le seneturi lona 18.

O Taxco foi e i ai le Paranesi a Taxco O Le Ekalesia a Iesu Keriso o le Au Paia o Aso e Gata Ai, lea e feiloai i Aso Sa taitasi i se fale i avenida de los Plateros. O le paranesi, o se vaega o le Siteki a Iguala Mekisiko, o se tasi o le 1,987 faapotopotoga a le Au Paia o Aso e Gata Ai i Mekisiko, lea e silia ma le 1.4 miliona tagata o le ekalesia, 34 misiona, ma malumalu e 13. O Mekisiko o loo i ai foi le Nofoaga Autu mo le Aoaoina o Faifeautalai i le Aai o Mekisiko, o le NAF aupito tele lona lua i totonu o le Ekalesia. O le nofoaga autu e mafai ona faofale ai le silia ma le 1,000 faifeautalai i le taimi.

O tagata muamua o le ekalesia e toalima i Mekisiko na papatisoina i le 1876.
O Mekisiko o le uluai atunuu i fafo atu o le Iunaite Setete e i ai ni siteki e 100.
O le Malumalu o le Aai o Mekisiko i Mekisiko, o le uluai [malumalu] lea i Mekisiko, na faapaiaina i le 1983. O le malumalu na faapaiaina talu ai nei o le Malumalu o Tijuana Mekisiko, na faapaiaina i le 2015. Na faasilasilaina le Malumalu o Puebla Mekisiko ia Oketopa 2018.
Ina ua asiasi Peresitene Howard W. Hunter (1907-95) i Mekisiko i le 1994, sa ia faatuina le Siteki a le Aai o Mekisiko Contreras, o le siteki lona 2000 a le Ekalesia.