Ua I’u Ina Faataunuuina La’u Miti Faafaifeautala’i

Jean Daniel Daroy

Onitario, Kanata

Mo le tele o tausaga, na ou moemiti e auauna atu o se faifeautalai faamisiona. Ae ina ua ou fo’i mai i le fale ua maea ona faauu mai i le iunivesite, sa ou vaaia le manaomia tele o a’u e lo’u aiga. Sa luitauina le soifua maloloina o loʻu tama, ma na manaomia e le aiga le fesoasoani tautupe. I le avea ai ma ulumatua o le fanau e toafa, sa ou lagona e tatau ona ou nofo i le fale ma fesoasoani. Na faamanuiaina aʻu e le Tama Faalelagi i se galuega lelei. E ui ina e le tele se totogi, ae na lava lelei.

Soo se taimi lava e fesiligia ai aʻu e uiga i le auauna atu i se misiona talai, na ou tali atu o le a ou faia. O taimi uma lava ou te fai atu ai lenei mea, peitai, e tilotilo mai loʻu tina ia te au i se vaaiga fefiloi o le fiafia ma le faanoanoa i ona mata. Sa ou iloa afai ou te talosaga atu ou te alu, o le a ia fai mai ioe ma teuina ma le filemu i totonu o lona loto lona popole i le leai o ni tupe maua a le aiga.

Na mavae ni nai tausaga, ma sa fai mai se tasi o alii agavaa o umiaina le perisitua ou te faaipoipo ia te ia i le malumalu. Sa ou ioe i ai, ma mulimuli ane faamanuiaina i maua i se fanau e toatolu—toalua teine ma le tama e toatasi. O se tasi o ma fiafiaga sili o le taimi na alu ai le ma atalii mo lana misiona. O se agaga o le mafanafana ma le filemu na faatumulia ai lo matou fale. Na foliga mai ia te au o se vaega o loʻu moomoo e auauna atu i se misiona ua faatumulia.

Sa ou fiafia ina ua fai mai la’u tama teine matua e manao foi e auauna atu i se misiona. O vaiaso uma i totonu o le misiona, na ia auina mai ia te au tala o lana galuega. O lana molimau na musuia ai aʻu ma faatumulia au i le agaga faafaifeautalai. Sa ou tatalo mo avanoa faafaifeautalai i aso uma.

I se tasi aso, sa musuia aʻu e fesili i se uo e ala i se savali patino i luga o faasalalauga faaagafesootai pe mata e fiafia o ia e feiloai ma faifeautalai. Sa fai mai o ia “Ioe!” Sa ou faatumuina se pepa faafesootai i le initoneti i luga o le LDS.org, ma e lei umi ae amata ona aoaoina o ia e faifeautalai. I le tolu masina ua auai o ia i le Ekalesia. Na sosoo ai ma lana fanau i nai masina mulimuli ane. E pei ona taitaiina au e le Agaga, sa ou valaauliaina isi uo e faalogo i faifeautalai. Ina ua foi mai laʻu tama teine i le fale, sa ou lagonaina foi ua maea la’u 18 masina o le galuega faafaifeautalai.

Na silafia e le Tama Faalelagi manaoga o loʻu loto ma mea sili mo loʻu aiga ma au. Ou te faafetai na Ia faatagaina loʻu manao e auauna atu o se faifeautalai, lea sa i ai i lo’u loto mo se taimi umi.