O Maturo ma La’u Molimau
Sunju Kim Muir
Maryland, ISA
Ata na tusia e Allen Garns
Sa ou le talitonu ina ua aoao au e faifeautalai e uiga ia Iosefa Samita ma le Tusi a Mamona. O loʻu manatu muamua o Iosefa Samita, e pei o le tele o isi tagata ua taʻua o “perofeta,” atonu na aumaia se tusi sese i le lalolagi e saili ai e avea ma mauoa, lauiloa, po o le lototoa.
Sa leai soʻu faamoemoe e faitau le Tusi a Mamona. Ae i le aluga o taimi o le faauoga a faifeautalai ma lo latou naunautai mo le talalelei, na mafai ai ona tuputupu a’e lo’u fia iloa e uiga i le latou savali.
A o ou faitauina ia fuaiupu na tuuina mai e faifeautalai ia te aʻu i le Tusi a Mamona, na ou maua ai le valaaulia a Moronae e ole atu i le Atua ma se loto faamaoni, manatu moni, ma le faatuatua ia Keriso pe moni le Tusi a Mamona (tagai Moronae 10:4–5). Sa ou mafaufau, “O ai, i le iloaina o le tusi e le moni, o le a mafai ona luitauina i tatou e ole atu i le Atua ma le loto faamaoni ma le faamaoni pe moni le Tusi a Mamona?”
Ona oo lea i se tasi aso na faamalamalama mai ai e faifeautalai o Iosefa Samita ma lona uso, o Ailama, na maliu faamaturo mo la molimau. Na faafuasei lava ona oo mai se manatu ia te au la te le ofoina o laua lava ola mo se mea la te iloa e sese. I lena taimi, o se lagona mafanafana, e pei o se afi mumu, na sosolo i totonu o a’u. O se molimau a le Agaga Paia na faamautu mai i loʻu loto o Iosefa Samita o se perofeta moni. Faatasi ai ma lenei molimau, sa papatisoina ma faamauina a’u.
Na faamanatu mai ia te au lenei aafiaga i le 25 tausaga mulimuli ane ina ua ou faitauina se lauga mai ia Elder Jeffrey R. Holland o le Korama a Aposetolo e Toasefululua. I lana lauga, na fesili ai Elder Holland, i le taimi taua o lo laua faamaturoina, pe o le a faaauau pea e Iosefa ma Ailama ona upu leaga i luma o le Atua e ala i le faatulagaina o o laua ola, lo laua mamalu, ma lo laua faaolataga e faavavau i luga o se tusi la te iloa e sese.
“O le a la le faia lava lena mea!” sa saunoa ai Elder Holland. “Sa naunau i laua e oti nai lo le faafitia o le faapogai paia ma le moni e faavavau o le Tusi a Mamona.”1
O upu a Elder Holland na matua taua lava ia te aʻu ma atili faamalosia ai laʻu molimau e uiga i le Perofeta o Iosefa Samita ma le mana o le Tusi a Mamona.
Ou te faafetai mo le Perofeta o Iosefa Samita. Sa ia aumaia le Tusi a Mamona ma tuuina atu ma le naunautai lona ola e avea ma molimau ia Iesu Keriso. E ala i le Tusi a Mamona, ua ou iloa ai le i ai o le Atua ma Lona alofa mo au.