Auaunaga i se Auala e Sili Atu ona Paia
Saunia e Elder Neil L. Andersen
O Le Korama a Aposetolo e Toasefululua
Mai se saunoaga i le faigalotu, “O Se Taulai Paia Atu i le Auaunaga,” na tuuina atu i le Iunivesite o Polika Iaga i le aso 10 o Aperila, 2018.
Ou te folafola atu ao e alofa atu i le Atua ma lou loto atoa ma tatalo e avea ma meafaigaluega i Ona aao, o le a tuu e le Alii Ona atalii ma afafine faapitoa i lou ala.
O le tusi ua faaulutalaina The Narcissism Epidemic e amata i faataitaiga faateleina o le aganuu a Amerika i aso nei:
“I luga o se polokalama a le TV e faatatau i le olaga moni, o se teineitiiti na fuafuaina lona aso fanau lona 16 e manaʻo e poloka se auala tele ina ia mafai ai e se failipu ona muamua atu a’o le’i faia lana ulufale tele i luga o se kapeta mumu. O se tusi ua faaulutalaina My Beautiful Mommy o loo faamatalaina ai i tamaiti laiti le faia o ni taotoga mo le faalaitiiti ai o foliga o o latou tina mo le ‘Mommy Makeover.’ Ua mafai nei ona faafaigaluegaina tagata pueata pepelo e mulimuli ia te oe i le pueina o lou ata pe a e alu i fafo i le po-e mafai foi ona e ave i le fale se mekasini lauiloa pepelo o faaalia ai ata. O se pese lauiloa e tautino mai, e aunoa ma se taufaifai manino, ‘Ou te talitonu e tatau ona siomia e le lalolagi a’u!’ … E ofuina e pepe ni talifaua o suiina i ai ni ‘Tagata Faatusa’ … ma susuina ni meataalo faamoepepe ao faitaua e o latou matua ni solo faamoepepe o aso nei mai le This Little Piggy Went to Prada.”1
I le avea ai o ni soo o Iesu Keriso, tatou te matua teena le manatu faapea o o tatou olaga e faatatau ia i tatou lava. Nai lo lena, tatou te mulimuli i le Faaola, o le na fetalai mai:
“O se fia sili ia te outou, ia fai o ia ma a outou auauna;
“O se fia muamua foi, ia fai o ia ma a outou tautua:
“… O le Atalii o le tagata e lei sau ia ina ia auauna mai tagata ia te ia, a ia auauna atu ia, ma foaiina atu lona ola e fai ma togiola e sui ai tagata e toatele” (Mataio 20:26–28).
Tatou te faatauaina Ana upu:
“Ia outou fealofani, e pei ona ou alofa atu ia te outou” (Ioane 13:34; tagai foi Ioane 15:12).
“Fafaga i a’u tamai mamoe. … Fafaga a’u mamoe” (Ioane 21:15, 16).
“Pe a liua mai oe, ona e faamalosi ai lea i ou uso” (Luka 22:32).
“Fesoasoani i e vaivai, sii i luga lima ua tautau i lalo, ma faamalosi tulivae ua vaivai.” (Mataupu Faavae ma Feagaiga 81:5).
O se faataitaiga o le ituaiga o auaunaga faa-Keriso lea e tupu i totonu o tagata o le Ekalesia a le Alii. Na tusi talu ai nei se tamaitiiti aoga i le Iunivesite o Polika Iaga:
“Sa ou feagai ma se taimi sili ona faigata. I se tasi aso, sa ou tauivi moni lava ma na toetoe a maligi ou loimata. Sa ou aioi ma tatalo lemu mo le malosi e faaauau ai. I lena lava taimi, na aumai ai e laʻu uo ma te potu faatasi se tusiga e faailoa mai ai lona alofa mo au. Sa ia faasoa mai se mau ma tuuina mai se molimau. Na aumaia ia te au le tele o le malosi ma le mafanafana ma le faamoemoe i lena taimi o le le fiafia.”
Seʻi ou faʻasoa atua ni nai mafaufauga ou te faamoemoe o le a faamalosia ai le auala sili ona mataʻina e te auauna ai i le tasi ma le isi. O loʻu manatu muamua o le: Manatua le tulafono muamua ao leʻi faia le lua. Na sau se tasi alii talavou i le Faaola ma fesili atu ia te Ia:
“Le Aoao e, o le fea poloaiga o i le tulafono ua sili?
“Ona fetalai atu ai lea o Iesu ia te ia, E te alofa atu i le Alii lou Atua ma lou loto atoa, ma lou agaga atoa, ma lou manatu atoa.
“O le poloaiga muamua lena ma le sili.
“E faapena foi lona lua, E te alofa atu i le lua te tuaoi, ia pei o oe lava ia te oe” (Mataio 22:36–39).
O lou gafatia e aumai se auala sili ona paia i le alofa i lou tuaoi, i le tausiga ma le auauna atu i isi, o le a faalagolago i le malosi e te tausia ai le poloaiga muamua.
O Se Isi Ituaiga o Auaunaga
O loo i ai se meaalofa tulaga ese ma paia o le auauna atu lea e mafai ona sau mai se tasi e alofa i le Atua ma lona loto atoa; o le ua mautu, mausali, ma le le mafaagaeetia i lona faatuatua ia Iesu Keriso ma i le talalelei toefuataiina (tagai Efeso 3:17; Kolose 1:23; 1 Nifae 2:10; Mosaea 5:15; Alema 1:25; 3 Nifae 6:14); ma na te tausia poloaiga ma le atoatoa.
Sei ou tuuina atu ia te oe se mea ua e iloa. I le salafa o le lalolagi, ua le mautu le augatupulaga laiti i lo latou faatuatua aemaise lava i lo latou talitonuga i se tapuaiga faapitoa. Ina ua ou faauu mai le BYU i le 1975, o le fuainumera o talavou matutua (18 i le 24 tausaga) na i ai se sootaga ma se tapuaiga e lata i le 90 pasene. O lenei ua pau i le 66 pasene. “O le tasi vae tolu o le autalavou matutua e le i ai se sootaga ma soo se lotu faatulagaina.”2
I le 2001, na tusia ai e se tagata atamai i mataupu faalelotu o Robert C. Fuller se tusi ua ta’ua Spiritual, But Not Religious.3 O se tulaga agai atu i le faaleagaga faaletagata lava ia i fafo atu o faalapotopotoga faalelotu aloaia atonu na moni i le 20 tausaga talu ai, ae e le moni i le asō. O talavou matutua i le Iunaite Setete i aso nei e tatalo e aunoa ma se taimi, talitonu itiiti i le Atua, talitonu itiiti i le Tusi Paia, ma talitonu itiiti i poloaiga.4 E valea le talitonu e le mafai e aga a le lalolagi ona faatosinaina i tatou uma—e oo lava i tagata filifilia.
O le tausiga o isi, faaletino ma faalelagona, e manaomia ai se loto le manatu faapito ma le maaleale. O lenei popolega o se vaega taua o le talalelei. Ua faia i totonu ma fafo atu o le Ekalesia e tagata lelei, tagata talitonu ma tagata le talitonu. E tele tagata maoae, agalelei i le lalolagi atoa, ma e mafai ona tatou aʻoaʻo mai ia i latou.
Ae ui i lea, o le tulaga ese i se tagata liliu mai O Le Ekalesia a Iesu Keriso o le Au Paia o Aso e Gata Ai o se isi ituaiga o le auaunaga. I le avea ai ma soo o le Faaola, ua tatou mauaina ni avanoa e auauna atu ai i se auala e fesoasoani ai e taofia le faatuatua o se uo mai le faavaivai, e faamanatu atu ai i se uo i se auala agalelei o le faitauina o le Tusi a Mamona i aso uma lava e aumaia moni ai vavega, ma ua faaali atu ai i se tagata o le uarota o tulaga faatonuina o le Ekalesia ua le na o se seti o tulafono ae o se auala e faalatalata atili atu ai i tatou i le Atua ma aumaia ia i tatou le fiafia.
Atapue mai le Getty Images
O se tagata e i ai se loto lelei e mafai ona fesoasoani i se tasi e fai se pa’u [ua pa], ave se tuaoi i le fomai, fai se taumafataga o le aoauli ma se tasi o faanoanoa, pe ‘ata’ata ma fai atu talofa e faafiafia ai se aso. Ae o se soo o le poloaiga muamua e masani lava ona faaopoopo atu i nei galuega taua o le auauna atu, uunaia le tagata o loo faia le mea lelei i le tausia o poloaiga, ma faasoa atu se fautuaga atamai e faamalosia ai le faatuatua o se tasi ua faamamulu atu pe o manaomia se fesoasoani i le siitia atu i luga o le ala na malaga ai muamua.
Ou te luiina outou ina ia faamalosia au taumafaiga e auauna atu ai faaleagaga i le tasi ma le isi. O le auauna atu faaleagaga e mafai ona amata i le taoina o ni kuki po o le taaalo i se taaloga o le pasiketipolo. Ae mulimuli ane, o lenei auala sili atu ona paia o le auauna atu e manaomia ai le tatalaina o lou loto ma lou faatuatua, ma le lototele i le uunaia o le tuputupu ae lelei o loo e vaaia i se uo, ma le faaalia o le popolega e uiga i mea o e vaaia ma lagonaina e le o ogatusa ma le avea ai ma soo.
Sei o tatou le faafiaamiotonu, ae ia tatou lototetele faaleagaga i le auauna atu i se auala e sili atu ona paia, aemaise lava e ala i le faamalosia o le faatuatua o isi. Ina ia faatupuina ou manatu, mafaufau i tulaga nei:
-
E te iloa o loʻo faaalu e se uo se taimi tele e taʻalo ai i taaloga i luga o se telefoni poto ae e seasea auai i talanoaga e fesoʻotaʻi ma autu o le talalelei.
-
E te lagona e i ai se tagata o le uarota o i ai se faafitauli i ponokalafi.
-
O loo faaaluina e au uo le tele o le taimi e ave ma tuuina ai i luga ni ata o i latou lava lea e agai atu ai i le le tauagafau.
-
E te matauina o se tasi na foliga mai sa fiafia e talanoa e uiga i le Tusi a Mamona ae o le taimi nei e le o toe taʻua lava.
-
E te matauina o se tagata o le aiga na foliga mai sa fiafia e alu i le malumalu ae i le taimi nei ua le alu.
-
E te matauina o se uo na tautala muamua ma le faatuatua e uiga i le fautuaga a le perofeta o loʻo tautala nei ma le faitio.
-
Ua e iloa se faifeautalai ua maea lana misiona o le ua le aloaiaina le ofuina o laei ia atagia ai feagaiga o le malumalu.
-
Ua e matauina e saili e se tagata o le uarota ni mafuaaga e alu ai i isi nofoaga i le Aso Sa nai lo le lotu.
-
E te lagona ua amata ona le faamaoni se uo i mea laiti.
-
E te iloa se tagata na i ai se malamalama i ona mata pe a maeʻa ona sau mai se misiona, ae o lenei ua foliga mai ua mou atu le malamalama.
-
E i ai sau uo e tausua i mea paia.
-
E i ai sau uo o lona lotovaivai i tafaoga faamasani ua siitia atu i le “E le alofa le Atua ia te aʻu.”
-
E te vaʻai i le faʻatuatua o se uo o loʻo aʻafia e ala i le fetuunaʻi o le agavaa ma se manaʻoga ia salamō.
E mafai ona e mafaufau i nei tulaga po o isi e pei o i latou? E i ai ni igoa patino e oʻo mai i lou mafaufau? Sa fai mai le Aposetolo o Paulo, “Aua tatou te le tau ma tagata, a o alii sili, ma faipule, ma alii o le pouliuli o lenei lalolagi, atoa ma agaga leaga i mea o i le lagi,” (Efeso 6:12). O se tasi o manaoga silisili i le lalolagi atoa o le i ai lea o le tele o le faatuatua i lo tatou Tama Faalelagi ma Lona Alo, o Iesu Keriso, ma ia sili atu le naunau e mulimuli i poloaiga.
Auaunaga i le Tasi
Afai tatou te mulimuli i le mamanu a le Faaola, o le tele o la tatou auaunaga o le a mai le tasi tagata i le isi. I le fafine Samaria i le vaieli, na fetalai le Faaola:
“A o se inu i lenei vai e toe fia inu foi:
“A o se inu i le vai ou te avatu ia te ia, e le toe fia inu ia. …
“Ua fai mai le fafine ia te ia, Le Alii e, aumai ia te au lena vai, ina ia ou le toe fia inu. …
“[Ona ia faapea ifo lea,] Ou te iloa e afio mai [le] Mesia, o le ua igoa ia Keriso: ma pe a maliu mai, o le a ia tau mai mea uma ia i matou.
“Ona fetalai atu lea o Iesu ia te ia, O au lenei, o le tautala atu ia te oe.” (tagai Ioane 4:13–15, 25–26).
E oo lava i le tautinoina atu o Lona lava paia, na auauna atu Iesu i le tasi.
E le pei o le suiga o se paʻu pa, na o se tasi le aafiaga faaleauaunaga e seasea lava ona foia ai se faafitauli faaleagaga. E manaʻomia le taimi, talanoaga, ma aafiaga faamalosiau o le a fesoasoani i le toefausia o le faatuatua. E sau e pei o le sau mai le lagi nai lo se osofaʻi e tasi mai se fagaau fuimu. E tatau ona e auauna atu pea lava pea pe a e fesoasoani i se tasi e toe foi mai i le Atua ma toe faalagolago i le Faaola ma Lana Togiola.
Ina ia auauna atu i le ala a le Alii, tatou te manaomia le fesoasoani a le Agaga Paia. Na saunoa malosi mai Peresitene Russell M. Nelson i lenei mataupu ao faagasolo le konafesi aoao ia Aperila 2018: “I aso a sau, o le a le mafai ona ola ai faaleagaga e aunoa ma le taiala, taitaiga, faamafanafanaga, ma le faatosinaga mafanafana a le Agaga Paia.”5
Na faaopoopo mai Peresitene Nelson, “Ou te uunaia outou ina ia faateleina lou tomai faaleagaga o i ai nei e maua ai faaaliga faaletagata lava ia.”6 Sa ia fautuaina i tatou ia tatalo, faalogo, tusitusi i lalo o tatou mafaufauga, ma faatino.
E mafai ona tatou faaaoga lenei mea e auauna atu ai i se ala e sili atu ona paia? Ia tatou tatalo, faalogo, tusia o tatou mafaufauga, ma fai taga e faatatau ia i latou e mafai ona tatou auauna i ai.
Tatalo mo ni avanoa e fausia ai le faatuatua i isi. E le o i latou uma e te fesoasoani i ai o ni tagata e te iloa. Ina ua auauna atu Iesu i le fafine ua oti lana tane mai Naina, sa agai atu o Ia i le aai. Ae ui i lea, na vaai o ia ia te ia, sa alofa ia te ia, ma faatu ae lona atalii mai le oti. O Lana galuega na suia ai lona olaga (tagai Luka 7:11–15).
Tatalo ina ia oo mai ia te oe ni avanoa auauna atu, faalogo, tusi i lalo ni ou manatu, ona saunia lea e faia ni faatinoga ao tuuina mai tagata i lou ala.
E masani lava ona faagaeetia au i le tagi a le faisalamo’: Na ou tepa i le itu taumatau, … a ua leai se tasi na fia iloa au: ua leai lava se alofaga ia te au; ua leai se tasi na te sailia au ia ou ola” (Salamo 142:4). Sei o tatou fesoasoani atu ia i latou o e lagona faapena.
Ia Faaavanoa se Taimi mo le Agaga
Ina ia maua le fesoasoani a le Agaga Paia, e tatau ona tatou saunia o tatou mafaufau ma loto. I la tatou augatupulaga, tatou te manaʻomia le amio pulea ma le taofiofia i le auala tatou te faʻaaoga ai a tatou masini tekinolosi. Na saunoa mai Adam Alter, i lana tusi Irresistible, e uiga i amioga fai ma vaisu o tekinolosi ma ala o faasalalauga lautele. Na ia taʻua Greg Hochmuth, o se tasi o enisinia na amataina le Instagram, o le na fai mai, “E i ai lava se isi faailoga apafai [hashtag] e kiliki ai. Ona faia lea o lona lava olaga, e pei o se meaola, ma e mafai ona avea tagata ma mea e le mautonu.”7
Na faaopoopo mai Mr. Alter: “O le Instagram, e pei o le tele o isi faasalalauga faaagafesootai, e le gata. O le Facebook e le gata lana faasalalauga; o le Netflix e otometi ona sosoo mai le isi vaega o se ata faasolo; o le Tinder e faamalosia tagata e faaauau le fesuisuiai i le sailiga o se filifiliga e sili atu. … E tusa ai ma le tala a Tristan Harris, o se ‘tagata fai mamanu lauiloa,’ o le faafitauli e le o le leai o se malosi o tagata; ae o le ‘o loo i ai le afe tagata i le isi itu o le lau [screen] o le latou galuega o le talepeina lea o tulafono faatonutonu a oe lava ia.’”8
Na faaauau le saunoaga a Mr. Alter: “O le fiafia [like] i luga o le Facebook ma le Instagram e taia ai se tasi o nota [uaua sa’o], e pei o le taui o le faamaeaina o se misiona i luga o le World of Warcraft, pe vaai foi i se tasi o au tuiti [tweets] na faasoa mai e le faitau selau o tagata e faaaogaina le Twitter. O tagata e fatufatu ma faʻaleleia tekinolosi, taaloga, ma fesoʻotaʻiga fefaʻasoaaʻi e lelei tele i mea latou te faia. Latou te faia le faitau afe o suʻega ma le faitau miliona o tagata faaaoga e iloa ai po o fea vaega o loʻo lelei ma po o fea foi e le o lelei—o le a le talaaga, sitaili tusitusi, ma leo e faatele ai le faaaogaina ma faaitiitia ai le faanoanoa. A o tuputupu a’e se mea na tupu, ua avea ma se mea e le mafaamatalaina, o le auupega o le mea na tupu muamua. I le 2004, na manaia le facebook; [i aso nei,] ua fai ma vaisu.”9
Ina ia mafai ona afio le Agaga i totonu o i tatou, e tatau ona i ai le taimi ma le avanoa. Ia aoao e tuu i lalo tou telefoni feaveai. Ia faatulaga le taimi e te le faaaogaina ai au tekinolosi.
I le taimi o le konafesi aoao ia Aperila 2018, na saunoa ai Peresitene M. Russell Ballard, Sui Peresitene o le Korama a Aposetolo e Toasefululua: “Ua anoanoai tagata ua faatagaina i latou lava e toetoe lava ola i le initoneti i a latou masini poto—o lau o masini e suluia ai o latou fofoga i le ao ma le po ma meafaalogo i o latou taliga ua poloka ai le leo filemu ma le ititi o le Agaga. Afai tatou te le mauaina le taimi e sei ai le palaka, tatou te ono misia avanoa e faalogo ai i le siufofoga o Ia na fetalai mai, “Ia soia [ia], ma iloa o a’u o le Atua.’ [Salamo 46:10]. Ia e leai ma se mea e leaga ai le faaaogaina o tulaga lelei o tekinolosi ua musuiaina e le Alii, ae e tatau ona tatou atamamai i lo latou faaaogaina.”10
Faamalosia o le Tasi ma le Isi
I le taimi o oʻu tausaga aoga i le BYU, e ese mai i loʻu toalua, o Kathy, o ana faatosinaga e le mafai ona fuaina, e toalua a’u uo na ma potu faatasi—o le tasi ao lei faia laʻu misiona ma le isi na mulimuli ane—na matua mamanuina loʻu faavae faaleagaga. O le tasi o Reid Robison, o se polofesa i le BYU i amioga a faalapotopotoga [organizational behavior]. Sa ou feiloai ia te ia i laʻu misiona, ma sa ma potu faatasi i se taimi mulimuli ane. O le saʻo aʻiaʻi o Reid i le mulimuli i poloaiga, lona alofa mo le perofeta, ma lana molimau le maluelue e uiga i le Faaola na faamalosia ai au ma i latou uma o loo siomia o ia. Ma ua faaauau pea ona avea o ia ma se faataitaiga ia te aʻu mo le 45 tausaga talu ai.
O le isi na matou potu faatasi e igoa ia Terrel Bird, o loo nofo nei i St. George, Utah, ISA. Sa ou feiloai ia Terrel ao ma auai i le aoga maualuga i Pocatello, Idaho, ISA. E ui sa ma taaalo faatasi i le pasiketipolo, ae na amata le ma faigauo ina ua ou matauina lona matua faaleagaga. Na te faʻasoaina faasamasamanoa mai ni manatu faaleagaga na ia maua atoa ai ma mataupu faavae o le olaga sa ia faitau e uiga i ai ma aoaoina. Sa ou maofa i le faalogo atu i nei mea mai se tagata e 17 tausaga le matua. Na ma filifili ma te potu faatasi i le BYU.
I na aso, e le’i i ai ni matou komepiuta; na i ai masini talolomi [typewriter]. E ave e Terrel ia mau ia e taua ia te ia ma upusii na faatupulaia uiga lelei, tusitusi i lalo, ona teuina lea i totonu o se atigipusa laitiiti ina ia mafai ona ia piki mai ai i aso taitasi. O se mea masani ia te ia le sili atu ma le afe mau ma upusii, o le tele o na mea o le a ia taulotoina. E ui sa ou faigaluega—faamamaina le faletusi i taeao uma mai le 4:00 i le 7:00—ma le tauaveina o se atoaga o vasega, i le matamata ia Terrel, na amata ona ou fausia laʻu lava faila.
O se tasi lenei o upusii ou te manatua pea mai le toeitiiti 50 tausaga talu ai:
Mafaufau o le mana o le Matai e mamanuina ma faia,
Ma o le Tagata o le Mafaufau, ma na te aveina pea
O le meafaigaluega o le Mafaufau, ma, faavaeina mea na te manaʻo ai,
Na te aumaia le afe o ‘oliʻoli, tasi le afe o mea leaga;—
Na te mafaufau faalilolilo, ma e oʻo mai lava:
Siosiomaga o lona ata tioata.11
Ou te manatua foi, ioe, mau malolosi e pei o lenei:
“O a’u nei o le toetu ma le ola: o lē faatuatua mai ia te a’u, e ui lava ina oti, a e ola lava ia:
“O tagata ola uma o e faatuatua mai ia te au, e le oti lava” (Ioane 11:25–26).
Na fesoasoani Terrel ia te au e tuu i loʻu mafaufau o se tagata fou i upu BYU o tusitusiga paia ma upu o le poto na uunaia ai au i loʻu olaga atoa. Ou te faafetai ia Reid Robison ma Terrel Bird mo le popole ia te au faaleagaga i se taimi na faia ai se eseesega.
O nisi nei o solo na tusia e loʻu tuaoi o Thomas L. Kay:
Faʻafetai atu i le Atua mo i latou uma o e tuuina mai le faamafanafanaga
mo i latou e matua popole lava
I latou o e tuu o latou lima faataamilo ia i latou o e vaivai
ma aioi mo i latou i le tatalo
Faafetai i le Atua mo i latou o e faalogo i le loto
ma faalogo mai i upu
O le e iloa se vaaiga po o le pa’i malie
e sili atu nai lo le lalolagi atoa
Faafetai i le Atua mo i latou e sii i luga lima
ma faamalosia tulivae vaivai
O le na te toefuatai agaga
i se auaunaga filemu.12
Aʻu uo pele ma uso a soo, ou te tuuina atu ia te outou laʻu molimau mautinoa ou te iloa o loo soifua le Faaola. Ua toetu o Ia. Na te taitaia lenei galuega paia. O Peresitene Nelson o Lana perofeta faauuina i luga o le fogaeleele. O lo tatou taimi i le lalolagi e taua e faavavau.
Ou te folafola atu ao e alofa i le Atua ma lou loto atoa ma tatalo e avea ma meafaigaluega i Ona aao, auauna atu i tagata taitoatasi, fausia lou gafatia e maua faaaliga, ma faalagolago i le uunaiga a le Agaga Paia, o le a tuu e le Alii Ona atalii ma afafine faapitoa i lou ala ma o le a avea oe ma a latou agelu auaunaga, faamanuiaina o latou olaga e faavavau. O le a e auauna atu i se auala e sili atu ona paia.
Ou te tatalo o lenei mea e mafai ona avea ma se mea e taua ia te oe ao e faaauau pea i lenei ala sili ona taua o lo tatou olaga faitino. Ou te tuuina atu ia te outou laʻu molimau mausali ma le mautinoa e uiga i le Faaola ma lo outou taua e faavavau ia te Ia ma o le a Ia toe afio mai ma o le a fusia i tatou o Ona atalii ma afafine, o Ona soo.