O La Matou Malaga i le 30-Tausaga i le Malumalu
Francisco W. Fierro
Lima, Peru
Ata na tusia e Carl Wiens
I ni nai masina talu ona uma loʻu papatisoga, na auai ai loʻu uso laitiiti, o Oswaldo, i se isi lotu ma auai malosi i lana aulotu. Ae na ou manao ia Oswaldo ia iloa le mea na ou iloa e moni. Aemaise lava, na ou manao ia te ia e fesootai ma upu a perofeta.
O masina taitasi, a ou mauaina le mekasini o le Liahona, ou te faasoa atua ia Oswaldo. Sa ou fautua atu o nisi o autu i le mekasini e mafai ona fesoasoani ia te ia e saunia ai mo fonotaga i lana lotu. Sa ou fiafia ina ua ia taliaina laʻu fautuaga. Na tele tausaga na mavae, ae peitai, sa ou faanoanoa i le vaai o le a le talia e loʻu uso le talalelei toefuataiina a Iesu Keriso.
I se tasi taeao, na taʻu atu ai e Oswaldo i lo matou aiga o loo ia fuafua e tuua lo matou aiga i Ekuatoa ma malaga atu i Suitiselani. Sa ia taliaina se faamanuiaga mai ia te aʻu i le aso na alu ese ai o ia. O se taimi ootia mo aʻu aua na musumusu mai le Agaga i loʻu loto o lenei faigamalaga o le a aumaia faalatalata ai Oswaldo i le Faaola ma Lana Ekalesia.
I Suitiselani, sa feiloai Oswaldo i faifeautalai ma mulimuli ane valaauliaina i la’ua i lona fale. I le aluga o le taimi sa ia faia se faigauo vavalalata ma i la’ua. Ae sa ia taʻu mai ia te au afai e aumaia e faifeautalai le autu o le papatisoga, o le a ia le toe taliaina i la’ua. Mafaufau i loʻu teʻi ma loʻu fiafia ina ua ou mauaina se imeli mai ia te ia ma taʻu mai ia te aʻu o le a ia papatiso. Sa ou auai i le Ekalesia i le 1981. Na papatisoina Oswaldo i le 20 tausaga mulimuli ane, ia Me 2001. Na ia mauaina lona faaeega paia ia Iulai 2002, ma sa faamauina o ia i lana ava ia Fepuari 2003.
Ina ua toe foi mai Oswaldo i Ekuatoa, sa ia tuuina atu lana molimau i se sauniga faamanatuga. Faatasi ai ma loimata i ona mata, na ia fai mai ai, “Na faasoa mai e loʻu uso upu a perofeta ia te au. O nei upu na musuia ai au ao ou sauni mo fonotaga i le lotu na ou auai muamua ai, ma e toatele tagata na faagaeetia i lenei ala. O upu a perofeta na suia ai loʻu olaga. Na ala mai ia i latou, na ou iloa ai o le talalelei a Iesu Keriso ua toe i ai i luga o le fogaeleele i lona atoaga, faatasi ai ma le mana ma le pule.”
Ia Fepuari 2011, na faamauina ai ma’ua ma Oswaldo ia ma matua i le Malumalu a Guayaquil Ekuatoa. O upu a perofeta ua faamanuiaina ai lo matou aiga mo le faavavau.