Faatalitali mo Ian
“O le a le mea na tupu ia te a’u?” o le fesili lea a Ian.
“We like to be in Primary; we’re happy that you came too” (Children’s Songbook, 256).
Ina ua ala mai ia Ian, sa ia faalogoina le pese o lona tina. O le pese “Le Alofa o lo’u Faaola.” O le pese Peraimeri lena e fiafia lava i ai Ian. Sa amata ona pese faatasi ma ia.
“Ua e ala!” o le tala lea a tina. Na ataata o ia ma sa loimatā ona mata. Na vaai Ian i lona tama o nofo i autafa o ia. Na foliga fiafia foi o ia.
“Sa ou usuina pese e sili ona e fiafia i ai i aso uma,” o le tala lea a Tina.
Sa ataata atu Ian–ae na tiga lona ulu. O le mea moni, na tiga lona tino atoa, aemaise o lona vae.
Sa ia autilo solo ma le faaeteete. E le o i ai o ia i le fale. Sa taoto i luga o se moega uamea i se potu ese. Ona ia vaaia lea o se tausimaʻi ma le tele o isi moega i tafatafa ane. “E pei a o se falemai,” na ia mafaufau ai.
“O le a le mea na tupu ia te a’u?” o lana fesili lea.
Na foliga faanoanoa foliga o Tina. “Sa e lavea i se faalavelave matuia.” Na pau se pa uamea i luga o oe. Ua e i ai i le falemai mo le lua vaiaso, ae o le a e toe malosi.”
Lua vaiaso! “Oka, matuai umi lena taimi e moe ai,” o mafaufauga ia a Ian. O le mea mulimuli na mafai ona ia manatua o le i ai i le falesa, faia faataitaiga mo le polokalama a le Peraimeri …
Auoi, leai! Le polokalama!
“Na ou misia le polokalama a le Peraimeri?” o le fesili lea a Ian. Sa ia tulimatai atu i ai mo se taimi umi! Sa fiafia o ia e usuusu pese ma ana uo.
Sa ataata Tina ma lulu lona ulu. “Leai, e te le’i misia. Na filifili le uarota e tolopo sei e ala i luga ina ia mafai ona e avea ma se vaega o le polokalama.”
“E mo’i?”
“E moi,” na fai mai ai Tama. “Na talosaga tamaiti uma o le Peraimeri i le epikopo e faatali. Sa latou mananao ina ia e i ai iina. Na latou iloa lou fiafia i le polokalama i lenei tausaga.”
Sa fiafia Ian ina ua mafai pea ona ia i ai i le polokalama a le Peraimeri. Ae e tatau ona ia malosi muamua. Ma na umi se taimi. Sa tatau ona ia nofo i le falemai mo sina taimi umi. Ina ua taunuu o ia i le fale, sa le mafai ona savali pe taalo.
Ae na o mai ana uo e asiasi ia te ia. E fesilisili Ian ia i latou e uiga i le aoga ma le lotu. Ma latou fesili atu ia te ia pe toe foi mai afea.
“Sei lelei loʻu vae,” o lana tala lea ia i latou. “E le’i mafai lava ona ou savali.”
Na uma Oketopa sosoo ai ma Novema, ma na faasolosolo malosi Ian. I se tasi aso sa valaaulia ai o ia e ana uo e sau e matamata i se tifaga ma i latou. Sa fesoasoani le tina o Ian ma lona tama e momoli o ia iina.
“E tiga lou vae?” na fesili ai lana uo o Chaís ia te ia.
“Ioe,” o le tala lea a Ian. “Ae ua faasolosolo ona lelei i aso uma.”
“Ua mafai ona e savali?” O le fesili lea a Chaís.
“Ou te le iloa,” o le tala lea a Ian.
“Lea, tatou taumafai,” o le tala lea a Chaís. Sa ia fesoasoani e faatu o ia i luga. Ma le faaeteete, na tuu e Ian lona vae i lalo. Sa ia faaminoiina i luma lona tino. O loo tu pea o ia! O lana laa muamua lea i le silia ma le masina! Sa patipati tagata uma.
“O lona uiga e mafai ona e sau i le lotu!” fai mai ai Chaís.
Ma sa sa’o o ia. I ni nai vaiaso, na iu lava ina le tiga le vae a Ian. Na aveese e le fomai le sima mai lona vae ma tuu ai se fusi. Ina ua oo mai le Aso Sa, ua oo i le taimi mo le polokalama a le Peraimeri.
I le taimi o le sauniga faamanatuga, sa savali Ian i luma o le falesa ma ana uo. Sa tu saʻo o ia ma ataata atu i lona tina ma lona tama. I le taimi o pese, sa ia pese leotele i le mea na te mafaia. Ina ua oo i lona taimi, sa tu o ia i le masini faaleotele leo ma faasoa atu lana molimau. Sa faafetai o ia mo ana uo Peraimeri. Ma sa fiafia o ia ua mafai pea ona avea o ia ma vaega o le polokalama a le Peraimeri.