O Manaoga o le Fuavaa [Navy]--ma lo Matou Aiga

Saunia e Brian Morrill

E alaala le tusitala i Virgina, ISA.

Na maua manatu ua atoatoa lelei la ma fuafuaga i le taimi e mauaina ai se fanau, ae o suiga o mea e le mafai ona oo i ai so ma malosi.

O aiga fuafuaina atonu e le faigofie mo le toatele o ulugalii. E afe le tele o mea e filifili pea i ai ma le miliona o mea o loo tutupu i le soifuaga. E tusa lava po ua e manatu ua i ai sau fuafuaga lelei, e mafai e se mea itiiti lava e tasi ona oo mai ma faalavelave ai i le mea atoa.

O i matou o se aiga militeli O au o loo i ai i le Fuavaa a le Malo o Amerika, ma o mea uma matou te fai e faalagolago i mea e manaomia e le Fuavaa.” Matou te o i le mea e tau mai e le Fuavaa matou te o i ai pe a tau mai matou te o. E tusa ma le lua tausaga talu ai, sa maua ai e i maua ma lou toalua, o Shanna, le ma afafine muamua o Isabelle. E ui o se suiga tele lena, ona sa ou i ai pea i le aoga faapailate, sa sologa lelei lava lo matou olaga. I le mavae ai o le tausaga talu ona fanau mai Isabelle, sa ma lagona ua talafeagai le taimi e toe taumafai ai seisi tamaitiiti. Ua toe o se aga ona maea lea o le aoga faapailate ma tofia loa i lau iunite muamua o le fuavaalele.

Ona ma iloa ai lea o le a tofia faalemiliteli faavave au mo le fitu masina. O lea sa ma faia ai se fuafuaga atoatoa lelei. O le a ou alu e pei ona tofia ai faalemiliteli ma o le a ma taumafai ina ia maitaga lou toalua i le taimi lava ou te foi mai ai. O le a maua ai e maua se avanoa e manaomia i le va o a ma tamaiti, ae le gata i lea o le a i ai se avanoa lelei o le a ou i ai i le aiga mo sina vaitaimi. Sa ma tatalo mo lea mea ma lagona ai o le ala lea e ao ona maua uia.

I se tasi o taeao o le Aso Gafua sa ou iloa ai ua sui “le mea o loo manaomia e le Fuavaa” ma o le a ou alu i seisi iunite o le militeli, ma malaga soo e tusa ma le tausaga ma toe tofia ai mo le isi fitu masina pe a mavae lena. Ua suia ai lava faapena la ma’ua fuafuaga, ma sa ma leiloa le mea e fai. Na manatu pea Shanna o le fuafuaga sa ma faia o le a sili mo ma’ua, ae sa ou fai atu pea ia te ia e le talafeagai lena ma le faasologa o lou tiute. O le a ma faatali pea seia ou foi mai le tofiga faalemiliteli, ma o le a vavamamao lava taimi o la ma fanau e le pei ona ma mananao i ai.

O le mea e laki ai, na talitonu Shanna o le a lelei mea uma pe a faailoa atu sina faatuatua itiiti. Sa ou fai atu ia te ia sa lelei lava lena ia te au, ae sa ou mautinoa sa ia iloa pe afai o le a maitaga o ia e pei ona sa fuafua i ai, o le a ou tuua loa mo le tofiga faalemiliteli i se taimi e le mamao lava, ma o le a fanau le pepe e aunoa ma lou i ai. E le gata i lena, o le a ou le i ai i le taimi lena e fesoasoani ai ia Isabelle. Sa ou iloa o lou toalua e malosi, ae sa leai sou iloa po o le a le ituaiga malosi.

Sa tonu ia i maua e agai pea i luma la ma’ua fuafuaga, ma sa faamanuiaina i ma’ua i le vave ona toe maitaga o lou toalua. Sa ou aluese e le itiiti ifo i le ono masina o le taimi o le maitaga o Shanna. Ina ua tau le fitu o ona masina, sa ou tuua ai loa mo le tofiga faalemiliteli, ma sa le faamoemoe e toe foi mai seia lima pe ono masina o le matua o le pepe.

I se tasi aso ina ua latalata i le aso e fanau ai Shanna, sa faatulagaina ou te lele i se taeao po lava ae na iu ina le faataunuuina, o lea sa ou toe moe ai loa. Ina ua mavae ni nai itula, sa valaau mai lou taitai ofisa (CO) ou te lipoti atu i lona ofisa i le taimi lava lena. Ina ua ou taunuu atu, sa ia faaali mai se imeli mai ia Shanna o faapea mai ua faatiga o ia ma ua alu atu i le falemai. O le mea e lelei ai sa lelei le mafaufau o Shanna ua imeli ai i lou taitai ma au aua e vave ona maua ana imeli nai lo au. Sa faapea mai lou taitai e mafai ona ou faaaoga le telefoni, ma sa mafai ona ma talanoa i le telefoni ma Shanna i le taimi ua faatiga ai, sa vave lava ma filemu le pepe lenei nai lo Isabelle. Sa taulimaina e Shanna lenei mea faapei o se siamupini, ua na o ia ma le le fefe i le potu e fananau ai pepe. Sa fanau mai Alexis e aunoa ma se faalavelave. Ana faapea e le soloia lau malaga pe ana le imeli mai foi Shanna i lou taitai CO, semanu ou te misia le mea atoa ma le mafai ai ona faalogoina le tagi muamua a Alexis.

E lei pine ae ma iloa o le a ou toe foi atu i le fale mo ni nai vaiaso mo se malologa. Sa matua fiafia i maua o le a vave ona ou feiloai ia Alexis nai lo le taimi na faamoemoe i ai. Sa matagofie le oso ifo mai le vaalele ma iloa ai ua tutupu ma ola lou aiga.

Na aoao e i maua ma Shanna se lesona taua lava e uiga i le faatuatua ma le tuu o mea i aao o le Alii. Sa ma faia se fuafuaga ua manatu o le a silisili ona lelei mo lo matou aiga ma le tulaga ua i ai. Sa fesuiai mea ma e leai se mea e mafai ona taofia ai, ae sa aoao mai au e Shanna pe afai tatou te lagonaina le faamaoniga a le Agaga Paia e sao se fuafuaga, e ao lava ona tatou tumau ai i lena. Pau lava le mea tatou te faia o le i ai o se fuafuaga ma le Alii ma faaali atu sina faatuatua itiiti. Sa le i oo i se taunuuga patino e pei ona sa tatou fuafuaina, ae sa faia e le Alii ina ia taunuu e ala i le tuuina mai o le “alofa mutimutivale” e tele (tagai 1 Nifae 1:20).