Pili, Alisi, ma le Taimi ma Tamaiti

Saunia e Nancy Thomas

E alala le tusitala i Iuta, ISA.

Ou te leʻi mafaufauina o le a i ai se aafiaga tumau o repitaila (reptiles) i le ma mafutaga ma la’u tama tama.

E masani lava ona fiafia la’u tama tama o Dallin i repitaila. O aʻu, i le isi itu, ou te le fiafia lava i ai. Na faatagaina o ia ia i ai sana repitala i luga o le tulaga po o le a lava le meaola na te filifilia ae ia mafai ona ofi lelei i le fagaau o se masini mimiti [vacuum], ina nei te’i ua sao i fafo o lana pa a’o i ai o ia i le aoga. Na tele ni filifiliga na feagai ma i matou, mai lane i pili feololo [iguanas], aʻo leʻi tumau ai loa i pili felanulanua’i e lua o Fuzz ma Diane.

Na auai uo fou a Dallin i lo matou aiga ina ua fitu ona tausaga. O se tasi o itu o le onaina o pili ou te le’i mafaufau i ai o le manaomia lea ona fafagaina o i la’ua i alisi-ola—e faa-tasi i le vaiaso. Mo le tele o tausaga, na ma faia ai ma Dallin ni “tuliga alisi.” E seasea lava ona talafeagai, e masani lava ona tupu i le leva o le po ao taumafai e mili ma le uati aʻo leʻi tapunia le faleoloa mo manu.

O Diane na ola mo le tolu tausaga, ae sa ola Fuzz mo le tele o tausaga, maloloina ma fiafia. I le faaiuga o le tausaga sinia a Dallin i le aoga maualuga, na tofia ai o ia e tuuina atu se faaaliga mo lana vasega o le tautala faalautele. Sa ia tauanauina ma’ua ma loʻu toʻalua mo ni manatu. Na ma fautua atu ia te ia e talanoa atu i pili felanulanuai aua ua ia iloa le tele o mea e uiga ia i latou ma mafai ai ona aumai Fuzz e avea o se faataitaiga. Ona taʻu mai lea e Dallin ia i ma’ua ua pe Fuzz.

“E te mo’i? O anafea na pe ai?” sa ou fesili atu ma le le talitonu.

Ona taʻu mai lea e Dallin ia i ma’ua na pe Fuzz i le vaiaso na mavae atu.

“O loo i totonu o loʻu potu, ae aua le popole. E le manogi. O lae faaluaina tagapepa [o loo tuu ai].”

Ina ua uma ona ia vaaia lo ma maofa tele, sa faamalamalama mai e Dallin, “O loo ou faia se suesuega—ou te manao e matamata ia te ia a’o pala.”

O le suesuega a Dallin na sili atu nai lo le matamata atu ia te ia a’o pala. Na te faatuai le faiga e ala i le tuʻuina o Fuzz i le fulisa mo ni nai vaiaso ona aumai ai lea o ia i fafo e faavaivai ona toe faapala foi lea.

I le tausaga mulimuli ane, ina ua i ai Dallin i lana misiona, sa ou faamamaina le fulisa ma maua ai Fuzz, o loo i ai lava i totonu o tagapepa e lua, i le pito i tua. Talu ai sa ou saunia se afifi e auina atu ia Dallin, sa ou manatu ai o se mea malie pe a lafo i ai lana tama’i suesuega. Na ou tuuina ma le faʻaeteete Fuzz i totonu o se atigipusa, afifi i le pepa iila lanu uliuli ma le paepae e i ai ni togi, ma tuʻuina lelei i totonu o le afifi alofa a Dallin ma se faʻamatalaga e faitauina, “O loʻo i ai se vaega e faate’ia ai oe i totonu o lau afifi.” Ona ou faatalitali lea ma le naunautai mo lana tali mai.

“Na ou mafaufau i lena pili talu ona aumai,” o lana tusi lea. “E le o le pili, ae e faatatau i taimi na faʻaalu i le tietie taavale i vaiaso uma e maua ai alisi ma faia isi feau, a’o faʻalogologo i ou manatu, tala, ma lau molimau ao i totonu o le taavale. O se ‘alofaga lelei le tatau ona ou alu ma maua ai le avanoa e talanoa atu ia te oe (e le’i faapea na tele laʻu talanoa, ae sa ou faalogo).”

Faatauina o alisi. O ai na iloaina? I le avea ai ma matua e le mafai ona tatou fuafuaina i taimi uma le taimi o o tatou aafiaga. E masani lava ona tupu. Atonu o le taimi tatou te faamomoeina ai tatou fanau i le moega i le po, o le tietie faatasi i se lifi mo le faaseʻe i le aisa, pe naʻo le feoai i feʻau i totonu o le taavale. E tatau ona tatou faʻaalu se taimi e faatasi ai ma a tatou fanau.

Na faaalia e le Faaola le faataitaiga silisili o le faaavanoaina o le taimi mo tamaiti. Ina ua mavae se aso umi o le aoaoina o sa Nifaē, sa poloaiina e Keriso tagata e aumai a latou fanau ia te Ia. Sa ia tootuli faatasi ma tamaiti laiti ma tatalo. Ina ua uma le tatalo, sa tutulu o Ia. Ae teʻi ane, “sa ia ave a latou fanau laiti taitoatasi,ma faamanuia i latou ma tatalo atu i le Tama mo i latou” (3 Nifae 17:21).

Na iloa e na tamaiti e alofa Iesu ia i latou. Na Ia naunau e ave le taimi mo i latou. Sa ia faalogo ia i latou, tatalo mo i latou, ma faamanuia i latou. O i latou na molimauina lenei mea sa faatumulia i le mana lea na faamaumauina i faamaumauga, “E lei vaaia lava e le mata, pe na faalogoina foi muamua e le taliga, le tetele ma le ofoofogia naua o mea e pei ona matou vaai ma faalogo o fetalaia e Iesu i le Tamā” (3 Nifae 17:16).

O le aafiaga a Iesu Keriso i na tamaiti na tumau mo augatupulaga. Aʻo tatou faʻatupeina lo tatou fiafia ma le taimi ia tatou fanau, e tusa lava pe na’o le tatou o faatasi ma i latou e faʻatau mai alisi, faʻamoemoe o le a tumau a tatou faatosinaga mo augatupulaga.