O Lo Tatou Faasinomaga e Faavavau o ni Matua

Saunia e Katie Sue Embley

E alala le tusitala i Iuta, ISA.

I le tulaga masani, ma le faalelalolagi, e le o au o se tina, ae ua silafia e le Atua—ma ou te iloa—lou faasinomaga e faavavau.

O nisi o taimi ou te mafaufau ai pe o le a avea ea au ma se tina i lenei olaga pe o le a ou faatali mo faamanuiaga folafolaina a le Atua e faataunuuina i le isi olaga. Ou te moomoo e mafai ona ou faapea atu ou te le faitio lava ona o le nofotoatasi. Ae afai ou te faamaoni, o nisi o aso e faigata lava. Ou te lagona le tuuatoatasi. Ou te lagona le lotovaivai.

Ae i le faamaoni foi, e i ai nisi o ou aso e matuai lelei lava. E i ai nisi o ou aso ou te lagona ai le filemu moni e tusa ai ma le ala o loo ou agai i ai ma faamalieina ai e mea uma o loo ou aoaoina. I se tasi o na aso lelei e lei mamao atu nei, sa i ai sou lagona: “Aisea ua ou laki ai lava? Aisea ua ou maua ai nei poto masani sili?”

Sa ou maua lau tali i le Tusi a Mamona: “Ua tuuina mai nei mea e le Atua ia te oe, o ni mea ua paia, ia sa ia tausia i le paia, ma o ni mea foi o le a ia tausia ma faasaosaoina mo se faamoemoega poto ua ia te ia, ina ia mafai ona ia faailoa atu lona mana i tupulaga o le lumanai” (Alema 37:14; faaopoopo le faamamafa).

E ui o lena fuaiupu na tusia e uiga i papatusi apamemea, na aoaoina mai e na upu ia te au se mea sa ou le mafaufauina lava muamua. Sa tuuina mai e le Atua ia te au nei aafiaga ina ia ou faamanuiaina ai tupulaga o le lumanai. Ina ia mafai ona ou fesoasoani i au fanau o le lumanai, ma fanau uma a le Atua, ia iloa o Ia.

Sa faamatala mai e Peresitene Henry B. Eyring, Fesoasoani Lua o le Au Peresitene Sili e faapea, “po o le a lava lou tulaga faaletagata, o oe o se vaega—o se vaega autu—o le aiga o le Atua ma lou lava aiga, pe i le lumanai, i lenei lalolagi, po o le lalolagi o agaga. O lou tiute mai le Atua o le faafaileleina lea o le toatele o Ana fanau ma tagata o lou lava aiga i le mea e te mafaia i lou alofa ma lou faatuatua i le Alii o Iesu Keriso.”¹

Filifiliga e Saunia Ai

O nisi o aso ou te manao ai lava e faatasi ma lau soa e faavavau ma lau fanau. E peiseai o se vaega o au ua iloa ou te lei feiloai lava i nisi o tagata taua i lou olaga, ma ou te faamoemoe ou te tuuina atu ia i latou lou alofa.

Ae o le mea moni, e tusa lava pe le o i ai i latou iinei, ma e ui lava e foliga mai e mamao lava lena miti, e mafai ona ou faia ni filifiliga i le taimi nei mo lo latou lelei.

Sa faasoa mai foi e Peresitene Eyring le tala i le taimi o avea o ia ma epikopo ma se alii talavou na alu ane i lona ofisa. O lenei alii sa faia ni mea sese matuia lava, ae ua ia manao ina ia suia. Na manao i lana fanau i le lumanai ina ia faamauina i se tama e mafai ona faaaogaina lona perisitua. Na manao o ia e tauivi ma le faagasologa o le salamo ina ia tuuina atu ai lena meaalofa i lana fanau.

Na saunoa mai Peresitene Eyring, o lenei alii “na ia lagona i lena taimi le manaoga o le fanau ua na ona ia moemiti i ai, ma sa ia tuuina atu vave ma le tuusaoloto. Sa ia ositaulagaina lona faamaualuga ma le faapaie ma lagona musua. Ou te mautinoa e le foliga mai o se osigataulaga nei.”²

O lou Faasinomaga: O se Tina

E le i mamao atu sa ou vaai ai i se ata o lou tina a o teineitiiti. E foliga aulelei lava i lona lauulu migimigi ma le ofu lanumoana laiitiiti. Ae ina ua ou vaai atu i lena ata, pau le mea sa ou iloa atu o foliga o lou tina i le tino o se teineitiiti. Ou te iloa e lei foliga mai faapena ina ua pueina le ata—ae o ia lava o lou tina.

Na fai ma mea ou te manatu ai e uiga i meaalofa uma sa ia saunia mo au ae ou te lei fanau mai. Sa ou mafaufau pe na faapefea ona ia aoao e fausia se aiga matagofie. Sa ou mafaufau i le ala na ia galue malosi ai i le aoga ina ia avea ma tamaitai tausimai, ma le auala na ia suesue ai i le talalelei e atiina ae ai lana lava molimau. Sa ou mafaufau i le auala sa ia filifili ai e ositaulaga ma le lotomaulalo mea uma ina ia tausia ai au ma lou aiga.

Ona ou iloa ai lea: Mo au fanau i le lumanai, o au o se tina. Ma i fofoga o le Atua, o lo’u faasinomaga e faavavau o le avea ai ma se tina.

Na aoao mai Peresitene Russell M. Nelson e faapea “o tina taitasi o se tina e tusa ma lona natura paia.”³ O tamaitai taitasi uma o se tina, ma o alii taitasi uma o se tama, e le afaina pe i ai sau fanau pe leai. Atonu e o mai a tatou fanau i lenei olaga po o le olaga a sau, ae e le suia ai lava lo tatou faasinomaga e faavavau o ni matua.

O Lau Meaalofa mo Augatupulaga o le Lumanai

I le Taimi nei, e faigata ona vaai faalemafaufau i ai. O nisi o aso ou te lagona le tuuatoatasi. O nisi o aso ou te popole po o ou faataunuuina lou faamoemoega po o ou faia se mea aoga mo se tasi.

Ae mafai ona ou filifili i le taimi nei e avea o se faatosinaga lelei i tagata i lou olaga. O loo i ai fanau e mafai ona ou tausia ma aoao. E i ai auala e mafai ona ou faaaogaina ai ou aafiaga e faamanuia ai isi. Ma e i ai se aso, atonu o le a toe tepa ai i tua lau fanau i sou ata ma le mafai ona malamalama i se mea na ou avea ai sei vagana ai o le avea ma o latou tina.