Autalavou Matutua
Faamanuiaina i le Mauaina o Fanau
E alaala le tusitala i Managua, Nicaragua.
Sa fesiligia i ma’ua e tagata i le tele o le ma fanau, ae e ala atu i le ma fanau, ua mafai ai ona ma malamalama atili i le alofa o le Tama Faalelagi ma atiina ae lo ma’ua gafatia paia.
Ata na tusia e Tausha Coates
O lau tama mulimuli lenei?” Ina ua ou maitaga i laʻu tama lona tolu, ua i ai na o isi tamaiti e toalua i lalo ifo o le lima tausaga, e masani lava ona i ai se manatu faaalia a tagata e uiga i laʻu fanau. “O lau tama mulimuli lea?” “E te le manatu o saoasaoa tele lou alu?” “O le a lau mea o le a fai ma tamaiti e toatolu?” O fesili ia e masani ona ou faalogo i ai. E ui lava e malamalama, talu ai o tagata i loʻu atunuu e masani ona na o le tasi pe lua tamaiti ona o tulaga tau tamaoaiga, o mea e le iloa e tagata ina ua ma tafafao faamasani ma loʻu toalua, na ma talanoa pe toafia tamaiti ma te mananao ai ma le taimi e maua ai. O le fuafuaina o se aiga o se filifiliga taua ma le ogaoga ia i ma’ua, o lea e tatau ai ona faia i le va o i ma’ua uma, ma saili pea mo le taitaiga a le Atua. Sa ma faalogo i le Agaga nai lo leo oi latou o siomia i maua, ma ua faamanuiaina i ma’ua i le mauaina o fanau.
Ina ua osia e le Alii se feagaiga ma Aperaamo, sa Ia folafola atu ia te ia se fanau toatele (tagai Kenese 17:5–6; 22:17). Mai lena fuaitau o tusitusiga paia, tatou te maua ai le lagona faapea i lo tatou Tama Faalelagi, o le i ai o fanau o se tasi lea o faamanuiaga sili e mafai ona tatou mauaina. E ala ia tatou fanau, ua mafai ai ona tatou malamalama lelei i le alofa o lo tatou Tama Faalelagi, ma tatou atiina ae lo tatou tulaga paia ma faavavau. Pe a e maua ni fanau, e le gata i lou fesoasoani i na agaga o loo i le muai olaga e o mai i le lalolagi ma maua se tino, ae ua e maua foi le avanoa e aoaoina ai i latou i le talalelei. Ou te talitonu o nai mea laiti i le olaga e saunia lelei ai i tatou mo le ola e faavavau nai lo le mauaina o fanau. O o tatou aiga o le nofoaga sili lea tatou te aoao ai e faaaoga ia uiga o le Alii. O lenei la ua avea aʻu ma se tina, ua faamanatu mai ai ia te au i aso uma le taua o le tumau latalata i loʻu Tama Faalelagi. Ou te tatalo i taimi uma, ole atu mo le taitaiga, malosi, ma le onosai ma faafetai atu ia te Ia mo le tele o faamanuiaga e oo mai faatasi ma le maua o fanau.
O le tulaga faamatua o se aafiaga e suia ai le olaga ua tumu i nisi o luitau ae tele le olioli. O taimi uma lava ou te faalogologo ai i laʻu tama teine matua o usuina se pese a le Peraimeri, pe matamata i loʻu atalii e lua tausaga o taumafai e tapuni ona mata i le taimi o a matou tatalo faaleaiga, pe a ou uuina laʻu pepe tama o loo moe i oʻu lima, ou te lagona ua tumu loʻu loto ma le fiafia e le mafaamatalaina. O le ma fanau o le suauu lea e taofia ai i ma’ua e tumau seia oo i le iuga, tusa lava po o le a le tele o luitau e feagai ma i ma’ua i le olaga. Ou te matuai faafetai lava i loʻu Tama Faalelagi mo le tuuina mai ia te au o le avanoa e avea ai ma tina o laʻu fanau.
Ou te iloa e alofa lo tatou Tama Faalelagi ia i tatou. Na ou lagonaina Lona alofa i na taimi toafilemu e tumu i le fiafia tumau e faavavau faapea foi i taimi o tofotofoga. Na Ia auina mai Lona Alo, o Iesu Keriso, e faaali mai ia i tatou le ala e toe foi atu ai i lo tatou aiga faalelagi. Ou te alofa i loʻu aiga, ma ou te iloa e mafai ona faatasia aiga e faavavau.