ព័ត៌មានក្នុងស្រុក
សន្និសីទមជ្ឈិមវ័យនៅលីវនៃឆ្នាំ ២០១៩
កាលពីថ្ងៃទី ១៤–១៥ ខែឧសភា ឆ្នាំ ២០១៩ មជ្ឈិមវ័យនៅលីវប្រហែលជា ៤៥០ នាក់មានការជួបជុំគ្នាមួយដ៏ច្រើនកុះករនៅអគារស្ដេកខាងជើងភ្នំពេញកម្ពុជា ប្រារព្ធសន្និសីទមជ្ឈិមវ័យនៅលីវទូទាំងព្រះរាជាណាចក្រកម្ពុជា ។ មជ្ឈិមវ័យនៅលីវបានមកជួបជុំគ្នាពីវួដ និងសាខាគ្រប់ខេត្តក្រុងដូចជា ខេត្តសៀមរាប ខេត្តបាត់តំបង ខេត្តកំពង់ចាម ខេត្តកំពង់ធំ តាខ្មៅ ព្រែកឯង និងកន្លែងផ្សេងៗនៅក្នុងទីក្រុងភ្នំពេញ ។
យើងមានការចូលរួមជាអធិបតីដោយអែលឌើរតៃ នៃពួកចិតសិបនាក់ប្រចាំតំបន់ ព្រមទាំងភរិយា ព្រមទាំងអមដំណើរដោយប្រធានបេសកកម្មភ្នំពេញកម្ពុជា និងភរិយា ហើយដឹកនាំកម្មវិធីដោយប្រធាន អេង ប៊ុនហួច ជាប្រធានស្ដេកខាងជើងភ្នំពេញកម្ពុជា និងប្រធាន តាយ សុខាភារម្ស ជាគណៈប្រធានមណ្ឌលខាងកើត ។
ក្នុងឱកាសដ៏ពិសេសនេះ មជ្ឈិមវ័យនៅលីវមានឱកាសរៀនជាមួយគ្នាពីបទពិសោធន៍របស់ថ្នាក់ដឹកនាំនៅក្នុងជីវិតអាពាហ៍ពិពាហ៍របស់ពួកគាត់ ហើយពួកគេមានឱកាសដើម្បីរៀនអំពីកម្មវិធីភាពខ្លួនទីពឹងខ្លួន និងកម្មវិធី BYU-Pathway ដែលសាសនាចក្របានបង្កើតឡើងជាពរជ័យបន្ថែមសម្រាប់ជីវិតរបស់ពួកគេ នៅពេលពួកគេសិក្សាកម្មវិធីទាំងនេះដោយយកចិត្តទុកដាក់ ។ ការរៀនបង្កើតទំនាក់ទំនងចំណងមិត្តភាពជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយតែមួយក្នុងព្រះគ្រីស្ទ ជាអម្ចាស់នៃយើង គឺជាគ្រឹះដើម្បីពង្រឹងសាសនាចក្រនៅក្នុងប្រទេសកម្ពុជា ។