តើផ្លែឈើដែលនៅក្នុងការនិមិត្តរបស់លីហៃតំណាងឲ្យអ្វី ?

នៅក្នុងការនិមិត្តរបស់លីហៃ តើផ្លែឈើដែល « គួរឲ្យប្រាថ្នាដ៏លើសលប់ជាងអ្វីៗទាំងអស់ » តំណាងឲ្យអ្វី ? ( នីហ្វៃទី១ ១១:២២ ) ។

« ផ្លែឈើនៅលើដើមគឺជានិមិត្តសញ្ញាមួយសម្រាប់ពរជ័យនៃដង្វាយធួន [ របស់ព្រះយេស៊ូវគ្រីស្ទ ] ។ ការទទួលទានផ្លែឈើតំណាងឲ្យការទទួលយកពិធីបរិសុទ្ធ និងសេចក្តីសញ្ញា ដោយហេតុនោះដង្វាយធួនអាចបានសក្ដ័សិទ្ធិបំផុតនៅក្នុងជីវិតរបស់យើង » ( ដេវីឌ អេ បែដណា « Lehi’s Dream: Holding Fast to the Rod » Liahona ខែ តុលា ឆ្នាំ ២០១១ ទំព័រ ៣៤ ) ។

ពិធីបរិសុទ្ធទាំងនេះរួមមាន ពិធីបុណ្យជ្រមុជទឹក ពិធីបញ្ជាក់ ការតែងតាំងបព្វជិតភាពមិលគិស្សាដែកសម្រាប់បុរស និងពិធីបរិសុទ្ធក្នុងព្រះវិហារបរិសុទ្ធ ។

ការស្វែងរកផ្លែឈើ

ដំបងដែក ឬព្រះបន្ទូលនៃព្រះ ដឹកនាំយើងទៅកាន់ព្រះយេស៊ូវគ្រីស្ទ ព្រោះព្រះគម្ពីរទាំងឡាយ និងពួកព្យាការីសម័យទំនើបអញ្ជើញយើងឲ្យចូលរួមក្នុងពិធីបរិសុទ្ធ និងសេចក្ដីសញ្ញាទាំងឡាយ ហើយជួយយើងឲ្យយល់ពីការបង្រៀន បេសកកម្ម និងការបូជារបស់ព្រះយេស៊ូវគ្រីស្ទ ។

តើពាក្យសម្ដីចេញពីព្រះគម្ពីរ ឬមកពីព្យាការីសម័យទំនើបណាខ្លះដែលបានដឹកនាំអ្នកមកកាន់ព្រះយេស៊ូវគ្រីស្ទ ?

បន្តនៅជាប់នឹងផ្លែឈើ

មនុស្សមួយចំនួននៅក្នុងការនិមិត្តរបស់លីហៃ បានបោះបង់ចោលផ្លែឈើនោះ ដោយសារការចំអករបស់អ្នកដទៃ ។ ការបន្តនៅជាប់នឹងផ្លែឈើ គឺការបន្តនៅពិតស្មោះត្រង់នឹងសេចក្ដីសញ្ញារបស់យើង ហើយទៅកន្លែងដែលយើងធ្វើសេចក្ដីសញ្ញាទាំងនោះឲ្យបានញឹកញាប់ ។

ការចែកចាយផ្លែឈើ

បន្ទាប់ពីលីហៃបានទទួលទានផ្លែឈើនោះហើយ លោកចង់ចែកចាយវាជាមួយនឹងគ្រួសារលោក ដើម្បីពួកគេអាចទទួលអារម្មណ៍នៃ « សេចក្ដីអំណរជាអតិបរមា » ដែលលោកបានទទួល ( នីហ្វៃទី១ ៨:១២ ) ។

តើអ្នកអាចចែកចាយសេចក្ដីស្រឡាញ់របស់អ្នកចំពោះព្រះយេស៊ូវគ្រីស្ទ ហើយជួយអ្នកផ្សេងទៀតឲ្យចូលរួមក្នុងពិធីបរិសុទ្ធទាំងឡាយដោយរបៀបណា ?