Nōna, mai te huru ra ē, ‘’o tōna fare’

Nā Lillian Arp

’Ua fa’ahoro ’oi’oi te metua tāne o Tehani Burgess iāna i te séminaire i te po’ipo’i roa hō’ē mahana. ’A haere ai ’oia i roto i te fare purera’a, ’ua tuō tōna metua tāne : « ’Ua fa’ahiahia vau ia ’oe ».

14 matahiti tō Tehani i terā taime, ’e tē ha’amana’o ra ’oia i tōna mana’o rahi ’oa’oa ’e te māuruuru i terā taime. « ’Ua mana’o vau ē, ’ia tae i te hō’ē mahana, ’ua hina’aro vau ’ia parau ato’a mai tō’u Metua i te Ao ra i te reira iā’u. »

I terā taime ato’a tōna fa’aotira’a ē : e ora noa ’oia i te orara’a e au mai te Atua, hau atu i te ta’ata. ’Ua hina’aro Tehani ’ia pārahi i roto i te ao nei ’eiaha rā ’ia riro nō tō te ao nei. Tē nā ’ō ra ’oia : « Noa atu ā ’aita vau i tae i terā fāito maita’i roa, e ui noa vau iā’u ē, ‘e aha tā Iesu e rave ’āhani ’o ’oia terā, ’e e aha tā’u e rave ’āhani tei reira Iesu i te hi’ora’a iā’u ? »

’Ua ha’api’i Tehani nō ni’a i te faufa’a rahi o te mau ’utuāfare mure ’ore i te taime ’a bāpetizohia ai ’oia ma’a matahiti nā mua a’e, 10 matahiti tōna. ’Āria, ’ua tā’atihia ’oia i roto i te hiero ’e tōna nā metua ’e tōna mau taea’e e mau tuahine, ’e ’ua ’ite ho’i ’oia ē, ’ia tae te mahana nō te ha’amata i tōna iho ’utuāfare, ’eiaha ’oia ’ia tītau i te fa’aipoipo i raro mai i te fa’aipoipora’a hiero.

Nā teie mau fa’aotira’a, tei rave-’oi’oi-hia i roto i tōna orara’a, tei fa’auru i tāna mau mā’itira’a na’ina’i ato’a, i te mahana tāta’itahi. I hina’aro ho’i ’oia ’ia ’oa’oa tōna Metua i te Ao ra iāna ’e ’ia vai ti’amā ’oia nō te tomo i roto i te Fare o te Fatu, nō reira ’ua ha’afātata noa ’oia iāna nā roto i te pure ’e te tuatāpapara’a pāpa’ira’a mo’a. ’Ua haere pinepine ’oia i te mau rurura’a a te ’Ēkālesia, ’ua fa’aātea mai i te vaira’a e fa’arave iāna i te hara ’e ’ua ’imi tāmau noa ’oia i te arata’ira’a a te Vārua mo’a.

Terā rā, ’ia pe’e tātou i te mana’o o tō tātou ’ā’au ’e te Vārua, i te tahi taime e nehenehe te reira e fa’arave ia tātou i te tahi ’ohipa tīa’i-’ore-hia. ’Ua hitimahuta roa te ’utuāfare o Tehani nā reira ato’a tōna mau hoa i te fa’aipoipora’a ’oia ia Heiari’i Picard, e taure’are’a tei ho’i noa mai mai tāna misiōni, hō’ē noa ’āva’e rāua i te mātaura’a. ’Ua hitimahuta ato’a Tehani iho i te reira. E mana’o pāpū rā ho’i.

’Ua fārerei mātāmua Tehani ’e Heiari’i i te hō’ē rurura’a feiā tauturu JSF, tei roto noa ’oia i te titi nō Tahiti Fa’a’a i terā taime. ’A paraparau noa ai rāua, ’a ha’amātau noa ai te tahi i te tahi – ’e ’a pure ai rāua nō ni’a i tō rāua hoara’a—’ua tae mai i te hō’ē taime i roto ia Tehani te mana’o hau ’e te pāruru—mai te huru ē ‘tei te fare’ ’oia. ’O teie ïa tamāroa e ’āfa’i iāna i te hiero, ’o ’ōna tē tauturu iāna ’ia patu i te hō’ē ’utuāfare mure ’ore tāna i hina’aro noa ana.

Tē parau ra Tehani ē : « ’Aita māua i here ia māua i terā iho taime, i te roara’a rā o te mau mahana, ’ua tae mai te mana’o ē, e ti’a ia māua ’ia ha’afātata atu ā i te Atua ’e ’ia patu i tō māua ’utuāfare i ni’a i te Mesia ». E mea pāpū roa ē, nā te rima o te Metua i te Ao ra i fa’atāhō’ē ia māua—nō reira, ma te ha’amaita’ira’a ’e te fa’aitoitora’a a te metua tāne o Tehani, ’ua feruri rāua ’aita paha e faufa’a e fa’ataere i te mōmo’ara’a.

I te ha’amatara’a nō te matahiti 2020, ’ua fa’ahanahana Tehani ’e Heiari’i i te 10ra’a o te matahiti tō rāua fa’aipoipora’a. ’Aita te tere i ’ōhie noa—e ha’api’ira’a rahi te fa’aipoipora’a—noa atu rā, ’ua 10 matahiti i teienei ’e tē vai ra e maha tamari’i nehenehe, ’ua rahi atu ā te here o Tehani i tāna tāne fa’aipoipo ’e i tōna orara’a, hau atu i tāna i mana’o a’enei.

Nō te feiā ’āpī e fa’aruru nei i te mau fa’aotira’a e rave rahi i teie tau, ’ua ’ite Tehani ē, e nehenehe teie nei ao e riro ’ei vāhi ri’ari’a mau. « Terā te tumu e mea faufa’a rahi ’ia vai ti’amā noa nō te fāri’i i te arata’ira’a a tō tātou Metua i te Ao ra », tāna i parau, « ’e ’ia pe’e i te hina’aro o te Atua nō tatou—noa atu ā e ’ere te reira tō tātou hina’aro. ’Ua ’ite maita’i a’e ’oia ia tātou i ia tātou iho, ’e e tauturu noa ’oia ia tātou ’ia rave i te mau mā’itira’a maita’i roa a’e. »

E parau tumu te reira tāna e ha’api’i ra i tāna mau tamari’i, e ture tā Tehani i fa’aoti pāpū e pe’e ē pohe noa atu.