Te mau ’api nō Pātifita
’Ua haere te mau melo o te ’Ēkālesia i Tubuai i te ’āmuira’a rahi
’Ua tere atu te tahi mau melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei, nō Tubuai, i Utah nō te haere i te ’āmuira’a rahi nō ’Ēperēra a te ’Ēkālesia.
E ’ahuru ma toru melo o Te ’Ēkālesia a Iesu Mesia i te Feiā Mo’a i te mau Mahana Hope’a nei tei tere a’enei mai te motu iti nō Tubuai i Pātifita ’Apato’a, nō te haere i te Fenua Marite, i te ’āmuira’a rahi nō ’Ēperēra i te ’oire nō Roto Miti, i Utah.
Nō Apia Hareva’a ’e tāna vahine ’o Tehiari’i, ’ua ora noa rāua tō rāua orara’a tā’āto’a i ni’a i terā motu, 400 maile i te pae ’apato’a nō Tahiti, i roto i te ta’amotu nō Tuha’a pae, ’o tō rāua ïa tere mātāmua i te Fenua Marite, e ’ohipa ho’i tā rāua i moemoeā noa ana.
E hua’ai teie nā ta’ata fa’aipoipo 80 ti’ahapa matahiti, nō nā ta’ata fa’afāriu mātāmua o te ’Ēkālesia i Pātifita ’Apato’a nei, i reira te ’evanelia i te poro-mātāmua-ra’a-hia i te matahiti ra 1844, i ni’a i te motu nō Tubuai, ’a 175 matahiti i teienei. E piti tamari’i pa’ari tā rāua tei ’āpe’e ia rāua, ’o Valérie ’e ’o Teri’i.
’Ua fāri’ihia teie nei pupu e te tahi mau misiōnare tahito tei tāvini i roto i te misiōni nō Tahiti Pape’ete. I Utah, ’ua haere teie pupu e māta’ita’i te tahi mau vāhi nō te ’ā’amu o te ’Ēkālesia, mai ia Temple Square, te fare ha’api’ira’a tuatoru ato’a nō Brigham Young University-Provo. ’Ua haere ato’a rātou i te putuputura’a nō te misiōni nō Tahiti i te ’oire nō Roto Miti, i reira rātou i te hīmenera’a e rave rahi hīmene mātau nō Tahiti i mua i te 400 misiōnare tahito ’e te mau melo nō Tahiti ato’a tei putuputu ato’a mai.
I muri mai i te tuha’a purera’a nō te po’ipo’i mahana mā’a, ’ua fārerei te pupu ia Elder Ian S. Ardern, e melo nō te pupu Hitu ’Ahuru a te ’Ēkālesia ’e e peresideni ho’i nō te ārea nō Pātifita ’Āpato’a, tei roto te mau motu nō Tuha’a pae, i te ’apato’a roa nō Porinetia Farāni.