Te mau ’api nō Pātifita
Te vai-fifi-’ore-ra’a i roto i te mau fare purera’a, e hōpoi’a ïa nā te feiā mo’a tāta’itahi
E pāhonora’a te fa’a’āpīra’a i te mau arata’ira’a nō te vai-fifi-’ore-ra’a, i te ‘mau tauira’a o te mau mea ’ati a’e i te ao nei’
’Ua fa’a’āpī Te ’Ēkālesia a Iesu Mesia i te Feiā Mo’a i te mau Mahana Hope’a nei i tāna mau arata’ira’a nō te tauturu i tōna feiā fa’atere ’e te mau melo ’ia vai fifi ’ore noa i te mau vāhi fatuhia e te ’Ēkālesia. « ’O te mau tauira’a o te mau mea ’ati a’e i te ao nei » tei tūra’i teie fa’a’āpīra’a, ’ua pāpa’i te ’Episekōpora’a fa’atere rahi o te ’Ēkālesia i roto i te hō’ē rata i te feiā fatere o te ’Ēkālesia.
« Te fā o teie mau arata’ira’a, nō te tauturura’a ïa i te ha’api’i i te feiā fa’atere ’e te mau melo nāhea i te ha’amaita’i atu ā i te fifi-’ore-ra’a i roto i te mau fare a te ’Ēkālesia ’e te mau ’ohipa ri’i », tē parau ra te rata tei tu’urimahia e te ’Episekōpo fa’atere rahi ’o Gérald Caussé ’e tōna nā tauturu, ’o te ’episekōpo Dean M. Davies ’e te ’episekōpo W. Christopher Waddell. « Tē ani nei mātou i te feiā fa’atere ’ia ’āparau i te reira i roto i te mau ’āpo’ora’a pāroita ’e titi, ’e ’ia fa’a’ohipa ho’i i te reira nō te ha’api’i i te mau melo, mai te au i te mau hina’aro, nō ni’a i te mau fifi i reira. E fa’a’ohipa tano te feiā fa’atere i teie mau arata’ira’a ’e e vai ara rātou i te mau ture fenua. »
Tē fa’aue nei teie mau arata’ira’a i te feiā mo’a ’ia tūru’i i ni’a i te ture o te fenua nō te mau taime rū ’e tē hōro’a ato’a nei te reira i te mau ’ohipa rau e nehenehe te mau melo e rave nō te ha’amaita’i atu ā i te fifi-’ore-ra’a. I roto i te reira, tē vai nei te vai-ara-ra’a i te mau mea ’ati a’e ia tātou, te vai-hau-ra’a, te fa’ataera’a i te tāpa’o aroha ’e te fa’atura i te mau ta’ata ato’a e rātere mai, ’eiaha e vai ’ōtahi noa i roto i te hō’ē fare a te ’Ēkālesia ’e e pe’e i te mau muhumuhu a te Vārua Maita’i nō te arata’ira’a ’e te vai-fifi-’ore-ra’a. E tauturu ato’a teie mau arata’ira’a i te feiā fa’atere ’ia rave i te ’ohipa ti’a roa i te taime e fa’ataupupūhia te purera’a e te tahi ta’ata ’aore rā pupu ta’ata.
Tē fa’aoti nei teie mau arata’ira’a ma te tahi parau a’o nō te ’ohipa e rave mai te mea e ta’ata terā e pūpuhi haere ra ’aore rā e ta’ata e tāparahi haere ra i te ta’ata. E mau arata’ira’a teie e ha’api’ihia ra e te mau mūto’i ’e te feiā ’aravihi i te pae nō te pārurura’a tapiha’ara’a ’ei ’ohipa tano roa a’e e rave i terā mau taime. Tē fa’auehia nei te feiā fa’atere ’e te mau melo ’ia horo, ’ia tāpuni ’aore rā ’ia ’aro atu, tei te huru te ’ohipa e tupu ra :
Horo. E horo ’ē i terā iho taime mai te mea e ’ē’a horora’a e vai ra. E haere ’oi’oi i te ’ūputa fifi ’ore roa a’e nō te haere i rāpae i te fare, i te hō’ē vāhi pāruru. Haere māmū noa i rāpae, ’ia ’ore te ta’ata hāmani ’ino ’ia ’ite mai ia ’outou. E hi’o te feiā pa’ari ē, tē ha’apa’ohia ra te mau tamari’i ato’a ’e ’ua tai’ohia rātou. ’Eiaha e ho’i i roto i te fare ’aore rā i roto i te hō’ē piha tōro’a ’aore rā piha ha’api’ira’a nō tā ’outou mau tauiha’a. ’Eiaha e ta’ita’i i ni’a ia ’outou i te hō’ē mea e hapehia ē e mauiha’a tama’i i te mau mūto’i.
Tāpuni. Mai te mea e’ita e nehenehe e horo ma te fifi ’ore, e tāpuni i te hō’ē vāhi e’ita te ta’ata hamani ’ino e ’ite mai ia ’outou. Mai te mea e nehenehe, e tāpiri, e pōnao ’e e fa’a’eta’eta i te mau ’ūputa o te piha ha’api’ira’a, o te piha tōro’a ’aore rā te vāhi tei reira ’outou i te tāpunira’a. Tūpohe i te mau mōrī, ha’amāmū i te niuniu ’āfa’ifa’i ’e e fa’aha’eha’a noa ia ’outou i ni’a i te tahua, i te ātea o te mau ha’amāramarama. Mai te mea tē tupu ra te pūpuhira’a i rotopū i te mau mūto’i ’e terā ta’ata hāmani ’ino, e fa’aea noa te mau ta’ata i roto i te fare i tō rātou mau pīha tā rātou i fa’a’eta’eta ē tae roa i te taime e roa’a mai te mau arata’ira’a a te mau mūto’i.
’Aro. Te rave’a hope’a, mai te mea ’aita e taime nō te horo ’aore rā nō te tāpuni, ’a ’aro atu i terā ta’ata hāmani ’ino. Fa’a’ohipa i te mau mea ato’a ’ei mauiha’a tama’i ’e ’a ’aro atu nō te tāpe’a i terā ta’ata hāmani ’ino. Mai te mea tē vai ra te tahi atu mau ta’ata, ’a fa’anaho ia ’outou nō te pāruru ia ’outou.