’Ua fa’a’āpī te ’Ēkālesia i te mau uira’a nō te uiuira’a nō te parau fa’ati’a nō te hiero

’Ēperēra 2020

Te mau ’api nō Pātifita

’Ua fa’a’āpī te ’Ēkālesia i te mau uira’a nō te uiuira’a nō te parau fa’ati’a nō te hiero

Parau ri’i ’āpī

’Aita te mau fa’aturera’a nō te tomo i roto i te hiero i taui, e fa’aineine maita’i a’e rā te mau tauira’a i te feiā mo’a nō te ha’amori i roto i te mau hiero.

Tē tāmau nei te peresideni Russell M. Nelson nō Te ’Ēkālesia a Iesu Mesia i te Feiā Mo’a i te mau Mahana Hope’a nei i tāna fa’atumura’a paieti i ni’a i te ha’amaita’ira’a o te fa’aro’o nō te ha’amorira’a hiero i te sābati ra, i te tuha’a purera’a hope’a nō te 189ra’a o te ’āmuira’a rahi nō ’Ēperēra. ’Ua tai’o mai ’oia i te hō’ē tāpura uira’a e uihia te mau melo o te ’Ēkālesia i te taime e fāri’i rātou i te hō’ē parau fa’ati’a nō te hiero.

I terā taime ’e terā taime, ’ua ha’apāpūhia ana te mau uira’a nō te parau fa’ati’a nō te hiero ’aore rā ’ua fa’atanohia i te mau hina’aro ’e te vaira’a o te mau tamari’i a te Atua. E ha’apāpū teie mau fa’a’āpīra’a nei i te mau tītaura’a nō te vai ti’amā nō te tomo i roto i te hiero, ’aita te reira e taui nei i te mau tītaura’a.

Tē tūra’i nei teie fa’atanora’a i te mau uira’a o te parau fa’ati’a nō te hiero, i te mau mea faufa’a roa a’e nō te feiā mo’a nō te fa’aineine māite nō te tomo i roto i te hiero.

Maoti te parau fa’ati’a nō te hiero e tomo ai te feiā mo’a i roto i te hō’ē o te mau hiero o te ’Ēkālesia. Nō te hō’ē melo pa’ari o te ’Ēkālesia, e piti uiuira’a tāna nō te fāri’i i te hō’ē parau fa’ati’a nō te hiero—te hō’ē nā te hō’ē melo nō tōna ’episekōpora’a, i muri iho nā te hō’ē melo nō tōna peresidenira’a titi (e ti’a fa’atere nō te fenua iho). E mana teie parau fa’ati’a e piti matahiti te māoro.

E noa’a te parau fa’ati’a tei tā’ōti’ahia nō te mau ta’ata 11 matahiti e ni’a atu maoti te hō’ē uiuira’a ’e tō rātou ’episekōpo. Maoti te reira e ti’a ai i te feiā mo’a, te rahira’a o rātou e feiā ’āpī tamāroa ’e e feiā ’āpī tamāhine, ’ia haere i te mau bāpetizora’a i roto i te hiero. E mana teie parau fa’ati’a hō’ē matahiti te māoro.

« ’O te hiero mo’a te tupua’i mou’a nō te Fa’aho’i-fa’ahou-ra’a [te ’ohipa nō te ha’amau-hope-ra’a i te ’Ēkālesia a Iesu Mesia i ni’a i fenua nei] », ’ua parau te peresideni Nelson.¹

« ’Ia ti’amā te ta’ata nō te tomo i roto i te fare o te Fatu, tītauhia iāna ’ia fa’aineine rahi i te pae vārua. Nā roto rā i te tauturu a te Fatu, ’aita e mea e’ita e haere. I te tahi taime, e mea ’ōhie a’e te patura’a i te hiero, i te fa’aineinera’a i te ta’ata nō te hiero. ’Ia ti’amā te ta’ata, tītauhia te fa’afāriura’a hope o te ferurira’a ’e te ’ā’au, nō te riro rahi atu ā mai te Fatu te huru, nō te riro ’ei tino huira’atira ha’avare ’ore, nō te riro ’ei hiora’a maita’i a’e ’e nō te riro ’ei ta’ata mo’a a’e ».²

Te mau uira’a nō te parau fa’ati’a nō te hiero

’Ua fa’a’itehia te mau uira’a nō te uiuira’a i te mau ta’ata ’ia ti’a i te mau melo ato’a, noa atu tō rātou fāito matahiti, ’ia māramarama a’e i te mau tītaura’a nō te ha’amorira’a hiero ’e nō te fa’aineine ia rātou ’ia tomo i roto i te hiero.

Teie i raro nei te mau uira’a nō te uiuira’a nō te parau fa’ati’a nō te hiero. ’Ua tauihia te fa’ahitira’a i roto i e 11 uira’a.

E fa’aro’o ānei tō ’oe ’e te ’itera’a pāpū nō ni’a i te Atua, te Metua Mure ’Ore ; nō ni’a i tāna Tamaiti, ’o Iesu Mesia ; ’e nō ni’a i te Vārua Maita’i ?
E ’itera’a pāpū ānei tō ’oe nō ni’a i te tāra’ehara a Iesu Mesia ’e i tōna ti’ara’a ’ei Fa’aora ’e ’ei Ora ?
E ’itera’a pāpū ānei tō ’oe nō ni’a i te fa’aho’i-fa’ahou-ra’a mai o te ’evanelia a Iesu Mesia ?
Tē pāturu ra ānei ’oe i te Peresideni o Te ’Ēkālesia a Iesu Mesia i te Feiā Mo’a i te mau Mahana Hope’a nei ’ei peropheta, ’ei ’ite ’e ’ei heheu parau ’e ’o ’oia ana’e te ta’ata i ni’a i te fenua nei tei ha’amanahia nō te fa’a’ohipa i te mau tāviri ato’a o te autahu’ara’a ?

Tē pāturu ra ānei ’oe i te mau melo o te Peresidenira’a Mātāmua ’e o te pupu nō te Tino ’Ahuru Ma Piti ’āpōsetolo ’ei mau peropheta, ’ei mau hi’o ’e ’ei mau heheu parau ?

Tē pāturu ra ānei ’oe i te tahi atu mau Huimana fa’atere rahi ’e te feiā fa’atere o te ’Ēkālesia o te fenua iho ?
’Ua parau te Fatu ē, ’ia « rave-mā-hia » te mau mea atoa’ i mua iāna (Te Parau Ha’api’ira’a ’e te mau Parau Fafau 42:41).

Tē tūtava ra ānei ’oe ’ia vai mā i te pae mōrare, i roto i tō ’oe mau mana’o ’e te mau haere’a ?

Tē ha’apa’o ra ānei ’oe i te ture nō te vi’ivi’i ’ore ?
Tē pe’e ra ānei ’oe i te mau ha’api’ira’a a te ’Ēkālesia a Iesu Mesia i roto i tā ’oe mau peu i ni’a i te mau melo o tō ’oe ’utuāfare ’e i ni’a ia vetahi ’ē, i te vāhi ’ōmo’e ’e i te vāhi ta’ata ?
Tē pāturu ra ānei ’oe ’aore rā tē fa’aitoito ra ānei ’oe i te tahi noa atu ha’api’ira’a, ravera’a ’aore rā ha’api’ira’a tumu e pāto’i nei i tā Te ’Ēkālesia a Iesu Mesia i te Feiā Mo’a i te mau Mahana Hope’a nei ?
Tē tūtava ra ānei ’oe i te ha’amo’a i te mahana Sābati, i te fare ’e i te fare purera’a ; i te haere i tā ’oe mau rurura’a ; i te fa’aineine nō te rave ti’amā i te ’ōro’a ’e nō te ora i te orara’a e au i te mau ture ’e te mau fa’auera’a o te ’evanelia ?
Tē tūtava ra ānei ’oe ’eiaha e ha’avare i roto i te mau mea ato’a tā ’oe e rave ?
E ta’ata ’aufau tuha’a ’ahuru ti’a ānei ’oe ?
Tē māramarama ra ānei ’oe i te parau pa’ari ’e tē ha’apa’o ra ānei ’oe i te reira ?
Tē vai ra ānei tā ’oe i te hō’ē noa atu utu’a ’aore rā tītaura’a i te hō’ē hoa fa’aipoipo mātāmua ’aore rā, i tā ’oe mau tamari’i mātāmua ? Mai te mea ē ’Ē, tē ’aufau ra ānei ’oe i tā ’oe mau utu’a ?
Tē ha’apa’o ra ānei ’oe i te mau fafaura’a ’o tā ’oe i rave i roto i te hiero, mai te ’ahura’a i te ’ahu hiero mai tei parauhia i roto i te ’ōro’a hiero ?
Tē vai ra ānei te tahi mau hara teimaha i roto i tō ’oe orara’a tei tītauhia e fa’a’āfaro ’e te mau ti’a mana o te autahu’ara’a ’ei tuha’a nō tō ’oe tātarahapara’a ?
’Ia mana’o ’oe, e mea ti’amā ānei ’oe nō te tomo i roto i te fare o te Fatu ’e nō te rave i te mau ’ōro’a o te hiero ?

’Ua fa’aha’amana’o te peresideni Nelson i te feiā mo’a ē, e riro te mau ’īritira’a ’ōpani nō te mau hiero tei fa’aarahia a’enei ’aore rā ’o tē patuhia ra i tō rātou mau vāhi ’ei taime faufa’a rahi nō te ha’api’i i te huira’atira nō ni’a i te ha’amorira’a hiero ’e te tumu nō te reira.

« E rave rahi mau hoa e ’ere nō tō tātou fa’aro’o tē haere mai e māta’ita’i i teie mau hiero ’e e ha’api’i rātou i te hō’ē mea nō ni’a i te mau ha’amaita’ira’a o te hiero. ’E tē vai ra te hō’ē pae o rātou e putapū tō rātou ’ā’au nō te ha’api’i rahi atu ā nō ni’a i te reira », tāna ïa i parau. « E ani ateate mai vetahi ē nāhea i te fa’aineine nō te mau ha’amaita’ira’a o te hiero. Tātou te mau melo o te ’Ēkālesia, tītauhia ia tātou ’ia vai ineine nō te pāhono atu i tā rātou mau uira’a. E nehenehe tātou e fa’ata’a atu ē, ’ua matara te mau ha’amaita’ira’a o te hiero i te mau ta’ata ato’a ’o te fa’aineine ia rātou ».³