Mautinoa i Feagaiga e ala ia Iesu Keriso
Pe a tatou ulufale atu i le maota o le Alii, ua tatou malaga i se faigamalaga paia o le aoao ia avea ma soo maualuga atu ma paia atu o Keriso.
O’u uso e ma tuafafine pele, ou te tatalo ia mafai ona faafouina faaleagaga i tatou e ala i savali musuia mai o tatou taitai i le faaiuga o lenei vaiaso, ma olioli i mea ou te fiafia e ta’u o le “mautinoa i feagaiga e ala ia Iesu Keriso.” O lenei mautinoa e filemu ae o le faamautinoaga moni o le mauaina o faamanuiaga ua folafola mai e le Atua mo i latou o e tausia a latou feagaiga ma e matuai manaomia e ui lava i tulaga luitauina o o tatou aso.
O le fausiaina o fale fou o le Alii i le salafa o le lalolagi, i lalo o le taitaiga musuia a Peresitene Russell M. Nelson, ua mafua ai le olioli tele i tagata o le Ekalesia ma o se faatusa taua o le faalauteleina o le malo o le Alii.
I le tomanatu ai i lo’u aafiaga ofoofogia musuia i le faapaiaga o le Malumalu o Feather River Kalefonia ia Oketopa taluai, sa ou manatunatu ai pe ona o le tatou fiafia tele i le i ai o malumalu i o tatou alalafaga ma nuu, ua galo ai ia i tatou le faamoemoega paia atu o feagaiga paia na osia i le malumalu.
O loo vaneina i pito i luma o malumalu taitasi ia se faaupuga paia: “E Paia i le Alii.”1 O nei upu musuia o se valaaulia manino faapea a tatou ulufale atu i le maota o le Alii, ua tatou malaga i se faigamalaga paia o le aoao ia avea ma soo maualuga atu ma paia atu o Keriso. A o tatou osia feagaiga i le paia i luma o le Atua ma tautino atu e mulimuli i le Faaola, tatou te maua le mana e suia ai o tatou loto, faafou ai o tatou agaga, ma faaloloto ai la tatou mafutaga ma Ia. O se taumafaiga faapena e aumaia ai le faapaiaga i o tatou loto ma fausia ai se sootaga paia faatasi ma le Atua ma Iesu Keriso, o lē ua folafola mai e mafai ona tatou maua le meaalofa o le ola e faavavau.2 O le taunuuga o lenei faigamalaga paia o le, tatou te maua ai se mautinoa paia atu ma maualuga atu mo o tatou olaga i lea aso ma lea aso, i totonu o a tatou feagaiga na osia e ala ia Iesu Keriso.
O se mautinoa faapena o le faatumutumuga lea o lo tatou sootaga paia ma le Atua, ma e mafai ona fesoasoani e faatupulaia ai lo tatou tuuto i le ma le agaga faafetai mo Iesu Keriso ma Lana taulaga togiola. E faamausalī ai lo tatou gafatia e alofa ma auauna atu i isi ma e faamalosia ai o tatou loto e ola i se lalolagi lē paia lea ua faateteleina le pogisa ma le lotovaivai. E musuia ai i tatou e faatoilalo fatu o le masalosalo ma le lotovaivai, fefe ma le lē fiafia, lototiga ma le leai o se faamoemoe lea e taumafai le fili e matuai vivili i totonu o o tatou loto ae maise lava pe a faigata le olaga, uumi tofotofoga, pe faigata ia tulaga. Ua tuuina mai e se mau o le tusi paia se fautuaga lelei mo i tatou taitoatasi a o tatou lilifa atu i matagi malolosi o luitau faalelalolagi o aso nei: “O le mea lea, aua le lafoai ai o outou faamalosi.”3
Uso ma tuafafine pele, o i latou ua maua le mautinoa moni i feagaiga na osia i le maota o le Alii e ala mai ia Iesu Keriso, ua umia se tasi o malosiaga e sili ona mamana e mafai ona tatou maua i lenei olaga.
E pei ona tatou suesueina le Tusi a Mamona i le Sau, Mulimuli Mai ia te A’u i lenei tausaga, ua tatou molimauina ai le ala na faaalia ai ma le matagofie e Nifae le mana o lenei ituaiga o mautinoa i feagaiga e ala i lona faamaoni ina ua feagai o ia ma faafitauli ma luitau faapei o le aumaiga o papatusi e pei ona sa poloaiina ai e le Alii. E ui i le faanoanoa tele o Nifae ona o le fefefe ma le leai o se faatuatua o Lamana ma Lemuelu, sa tumau lona talitonu o le a aumai e le Alii ia papatusi ia i latou. Sa ia fai atu i ona uso: “E pei ona soifua le Alii, ma e pei foi ona tatou ola, tatou te lē o ifo lava i lalo i lo tatou tamā i le vao seiloga ua uma ona tatou faataunuuina o le mea na poloaiina ai i tatou e le Alii.”4 Ona o le mautinoa o Nifae i folafolaga a le Alii, sa mafai ona ia ausia le mea na poloaiina o ia e fa.5 Mulimuli ane, i lana faaaliga vaaia, sa vaai ai Nifae i le aafiaga o lenei ituaiga o mautinoa, lea na ia tusia ai, “O a’u, o Nifae, sa vaai i le mana o le Tamai Mamoe a le Atua, ua alu ifo i luga o le au paia o le ekalesia a le Tamai Mamoe, ma luga o le nuu o le feagaiga a le Alii, … ma sa faaauupegaina i latou i le amiotonu ma le mana o le Atua i le mamalu tele.”6
Ua ou vaai tino i folafolaga alofa ma le mana o le Alii o tafe atu i olaga o le fanau a le Atua, e faamalosia ai i latou e fetaiai ai ma tulaga o le olaga. I se tasi aso na sau ai lo’u toalua ina ua uma lana tapuaiga i le malumalu ma ta’u mai ia te a’u lona ootia tele ona o sona aafiaga iina. A o ulufale atu o ia i le maota o le Alii, sa ia vaaia se alii i se nofoa faataavalevale o alu lemu lava ma se tamaitai sa savali ma le faigata tele e faaaoga ai se tootoo, ae na o mai ma le lotototoa e tapuai ma le Alii i Lona maota. Ina ua savali atu lo’u toalua i le eria o mulumuluga, sa ia vaaia se tuafafine pele e leai le isi ona lima—ae sa na o se vaega na i ai o le isi lima—na faatinoina ma le matagofie ma le faaselesitila soo se galuega na tuuina atu ia te ia.
A o ma talanoa ma lo’u toalua e uiga i lena aafiaga, sa ma faaiuina ai, e na o le mautinoa mamā ma le faamaoni i folafolaga e faavavau ua tuuina mai e le Atua e ala i feagaiga paia na osia ma Ia i Lona maota, e mafua ai ona tuua e na soo ofoofogia o Keriso o latou aiga i lena aso sili ona malulu, e ui lava i o latou tulaga patino o le olaga.
A’u uo pele, afai e i ai se mea e tasi tatou te umia—ma se mea e tasi e mafai ona tatou tuufaasolo atu i a tatou fanau ma fanau a fanau o le a fesoasoani ia i latou taitoatasi i tofotofoga ma luitau o loo lumanai—o le mautinoa lea i feagaiga na osia e ala ia Iesu Keriso. O le mauaina o se meatotino paia faapena o le a fesoasoani ia i latou e ola ai e pei ona folafolaina mai e le Alii i Ona soo faamaoni: “O o’u soo o le a tutulai i nofoaga paia, ma o le a lē masii lava.”7
E faapefea ona tatou maua sea mautinoa e ala ia Iesu Keriso? E oo mai e ala i le lotomaualalo, faaogatotonuina o o tatou olaga i le Faaola, ola i mataupu faavae o le talalelei a Iesu Keriso, mauaina o sauniga o le faaolataga ma le faaeaga, faamamaluina o feagaiga tatou te osia ma le Atua i Lona maota paia.
I lana saunoaga faaiu i le konafesi aoao o Oketopa 2019, sa faamanatu mai ai e lo tatou perofeta pele ia i tatou se laasaga taua i le mauaina o le mautinoa i feagaiga, na saunoa ai: “O le agavaa faaletagata lava ia e ulufale atu ai i le maota o le Alii e manaomia ai le tele o sauniuniga faaleagaga a le tagata lava ia. O le agavaa faaletagata lava ia e manaomia ai se liua atoa o le mafaufau ma le loto ina ia avea atili e faapei o le Alii, ia avea ma se tagatanuu faamaoni, ia avea ma se faataitaiga sili atu, ma ia avea ma se tagata paia atu.”8 O lea, a sui a tatou sauniuniga e ulu atu i le malumalu, o le a sui a tatou aafiaga i le malumalu, lea o le a suia ai o tatou olaga i fafo o le malumalu. “Ona malosi ai lea o lou faatuatua fai ifo i luma o le Atua; ma totō ifo i lou agaga le mataupu faavae o le perisitua e pei o le sau mai le lagi.”9
E ta’ua e se epikopo ou te iloa le vasega aupito matutua i le Peraimeri e le o se vasega o le “Peraimeri” ae o se vasega “sauniuni mo le malumalu” Ia Ianuari e aumai ai e le epikopo ia tagata o le vasega ma o latou faiaoga i lona ofisa, lea latou te talanoa ai e uiga i le pe faapefea ona latou faaaluina le tausaga atoa e sauniuni ai e ulufale atu i le malumalu. E faaalu e le epikopo le taimi e talanoa ai i fesili talafeagai o le pepa faataga o le malumalu, lea o loo aofia ai i lesona o le Peraimeri. Na te valaaulia tamaiti ia saunia, a oo loa i le taimi e o mai ai i le ofisa o le epikopo i le toe tasi le tausaga, o le a latou saunia ma le mautinoa, mautinoa i feagaiga, e maua se pepa faataga o le malumalu ma ulufale atu i le maota o le Alii. O le tausaga lenei e toafa teineiti laiti a le epikopo o e sa matuai fiafia lava, saunia, ma mautinoa e o atu i le malumalu, o lea na latou mananao ai i le epikopo e lolomi mai a latou pepa faataga i le Aso o le Tausaga Fou i le ta o le 12:01 i le vaveao.
O sauniuniga e le mo na o i latou e o atu i le malumalu mo le taimi muamua. E tatau ia i tatou uma ona sauniuni faaagaga e o atu i le maota o le Alii. O se tasi o siteki ou te iloa ua faaaoga le anava “Faatotonugalemu i le Aiga, Lagolagoina e le Ekalesia, ma agai atu i le malumalu.” Agai atu10 o se upu e ese lava, o lona uiga o le taulai atu i se faasinoga, ae e uiga foi o le fusi i se pe faamauina i se, faaiuina ma filimaotiina, mautu. O lea la, o le agai atu i le malulmalu tatou te mau ai i le Faaola, e tuuina mai ai ia i tatou le taitaiga tatau ma le mausali a o faamautinoa ai tatou te maua le mautinoa i feagaiga e ala ia Iesu Keriso. O lea, e tatau ia i tatou uma ona faaleleia ma le loto i ai lea fusi e ala i le faatulagaina o le isi a tatou taimi atofaina ma le Alii i Lona maota paia, e tusa pe lata mai pe mamao le malumalu.11
Sa faamanatu mai ia i tatou e lo tatou perofeta pele o, Peresitene Russell M. Nelson nei mataupu faavae taua i le faapea mai: “O le malumalu o le totonugalemu lea o le faamalosia o lo tatou faatuatua ma le malosiaga faaleagaga ona o le Faaola ma Lana aoaoga faavae o le taulaiga autu lea o le malumalu. O mea uma o loo a’oa’oina i totonu o le malumalu, e ala i a’oa’oga ma e ala i le Agaga, e faateleina ai lo tatou malamalama ia Iesu Keriso. O ana sauniga taua e fusia ai i tatou ia te Ia e ala i feagaiga paia o le perisitua. Ma, a tatou tausia a tatou feagaiga, Na te faaee mai ia i tatou Lona mana faamalolo ma faamalosiau. Ma ioe, oka so tatou manaomiaina o Lona mana i aso o i luma atu.”12
E finagalo le Faaola ia tatou saunia e malamalama, ma matuai manino, i le ala tonu tatou te aga ai a o tatou osia feagaiga ma lo tatou Tama Faalelagi i Lona suafa. E finagalo o Ia ia tatou saunia e maua o tatou faamanuiaga, folafolaga, ma tiutetauave; ia saunia e maua malamalamaaga faaleagaga ma nofoutaga tatou te manaomia i lenei olaga. Ou te iloa a vaaia e le Alii sina emo o le manao po o se taumafaiga amiotonu i lo tatou naunau e faaogatotonu o tatou olaga ia te Ia ma i sauniga ma feagaiga tatou te osia i Lona maota, o le a Ia faamanuia i tatou, i le Lana ala atoatoa, i vavega ma mutimuti alofa tatou te manaomia.
O le maota o le Alii o le nofoaga lea e mafai ona tatou liuaina ai i auala maualuluga ma paia atu. A tatou savavali la mai fafo o le malumalu, ua liuaina e lo tatou faamoemoe i folafolaga o feagaiga, ma faaauupegaina i le mana mai luga, ua tatou ave atu le malumalu faatasi ma i tatou i totonu o o tatou aiga ma olaga. Ou te tautino atu o le i ai o le agaga o le maota o le Alii i totonu o i tatou e sui atoa ai i tatou.
Ua tatou iloa foi mai le malumalu, a tatou mananao ia le taofiofia le Agaga o le Alii i o tatou olaga, e le mafai la ma e le tatau ona i ai ni o tatou lagona agaleaga agai i soo se tasi. O le tuu i o tatou loto po o mafaufau o se avanoa mo lagona po o manatu agaleaga o le a maua mai ai upu ma amioga agaleaga, pe o luga o ala o faasalalauga agafesootai po o totonu o o tatou aiga, e afua ai ona aluese le Agaga o le Ali mai o tatou loto. O le mea lea, faamolemole aua le lafoai o outou faamalosi, ae ia, tumau mausali o outou mautinoa.
O le faifai pea ma le faatelevaveina o le fausiga o malumalu, o le a faaauau ona tatou olioli, musuia, ma manuia ai. Ae e sili atu ona taua, a o sui a tatou sauniuniga e ulu atu ai i le malumalu, o le a sui a tatou aafiaga i le malumalu, lea o le a suia ai o tatou olaga i fafo o le malumalu. Talosia ia faatumulia e lenei suiga i tatou i le mautinoa i a tatou feagaiga paia na osia ma le Atua e ala ia Iesu Keriso. O loo soifua le Atua, o Iesu Keriso o lo tatou Faaola, ma o Lana Ekalesia toefuataiina lenei i le lalolagi. Ou te tautino atu ai ma le faaaloalo nei upumoni, i le suafa paia o lo tatou Faaola o, Iesu Keriso, amene.