“Elder David L. Buckner,” Liahona, Me 2024.
Elder David L. Buckner
Fitugafulu o le Pulega Aoao
Sa fanau Elder David L. Buckner i le aso 27 o Setema, 1963, i Ogden, Iuta, ISA, ae sa “tuputupu ae” a o nofo o ia mo le tolu tausaga i Sacramento, Kalefonia, ISA.
O le uii o le fanau e toalima a Melba ma E. LaMar Buckner, o Tavita e 11 tausaga le matua sa siitia atu i Kalefonia ma lona aiga ina ua valaauina lona tama e pulefaamalumalu i le misiona a le Ekalesia i Sacramento. I le mamao ese ai mai uo ua mafana mafutaga i Iuta, sa ia aoaoina le auala e fai ai ni uo fou ma maua ai “uso ma tuafafine matutua e 300” i totonu o faifeautalai faamisiona.
O le mea e sili ona taua, na maua lana molimau i le talalelei a Iesu Keriso. “O lena aafiaga faamisiona na suia ai mea uma mo a’u,” o lana tala lea.
Mulimuli ane sa ia auauna atu i le Misiona a Ekuatoa Guayaquil. E na o le tolu masina talu ona uma lana misiona, a o avea ma peresitene o le paranesi i le taulaga o Jipijapa, sa faanoanoa o ia faatasi ma tagata o le paranesi ma isi ina ua malemo se tamaitiiti e 11 tausaga le matua a o auai i se gaoioiga a le Ekalesia.
A o ia augani atu i le Tama Faalelagi i vaiaso ma masina na sosoo ai, sa ia maua se molimau e le maluelue i le ata o le faaolataga. Sa ia molimauina foi le agaalofa o le Alii a o taliaina e isi i le nuu le talalelei. Na oo ina latou malamalama faatasi i le natura paia o le ola ma le mana o le alofa tunoa o le Alii.
Ina ua maea lana misiona, sa auai Elder Buckner i le Iunivesite o Polika Iaga, lea na ia feiloai ai ia Jennifer Romney Jackson. Sa faaipoipo i laua i le aso 30 Aokuso, 1990, i le Malumalu o Sate Leki. Sa ola ae Sister Buckner i Niu Ioka, ISA, lea na siitia atu i ai le ulugalii ina ua mavae le la faaipoipoga. Sa la tausia le la fanau e toalima i Manhattan, lea sa avea ai Elder Buckner ma sui o le Ekalesia i le Komisi lauiloa o Taitai Faalelotu.
Na maua e Elder Buckner se faailoga o le faasaienisi i mea tautupe mai le BYU i le 1988 ma se faailoga o le matuaofaiva i le pulega o pisinisi mai le Iunivesite o Durham i le 1991. Sa ia mauaina foi se faailoga o sootaga faavaomalo mai le BYU i le 1995 ma se faailoga faafaamasinoga mai le BYU i le 1996. Sa avea o ia ma se polofesa o le kolisi ma, talu mai le 1999, o le peresitene o le Bottom Line Training and Consulting Inc. Sa avea Elder Buckner ma Fitugafulu Eria, peresitene o le siteki, fautua maualuga, ma se epikopo.