“Brother Chad H Webb,” Liahona, Me 2024.
Brother Chad H Webb
Fesoasoani Muamua i le Au Peresitene Aoao o le Aoga Sa
A o talavou, sa auai Chad Webb i le Kolisi o Iuta i Sasae (lea ua avea nei ma Iunivesite o le Setete o Iuta i Sasae) ina ua ia maua se aafiaga faaleagaga faavae lea na faalolotoina ai lana molimau i le talalelei. O lena aafiaga na amata i se manao e faamalosia lona faatuatua.
I le lotolotoi o le faia o meaaoga ma le taalo pasiketipolo i lana au i le kolisi, sa faia ai e Brother Webb le suesueina o tusitusiga paia, tatalo, ma mafaufau loloto o se mea e faamuamua a o ia sauniuni e auauna atu i se misiona atoa i Veracruz, Mekisiko.
I se tasi po malulu sa alu ai o ia mo se savaliga umi faataamilo ia Price, Iuta, ma mafaufau i mea uma sa ia aoaoina. Na oo mai le taitaiga faalelagi a o ulufale atu o ia i se pakaga taavale e leai se mea o i ai.
“Sa ou lagonaina na oo mai tali uma i a’u tatalo ma fesili, ma sa ou lagonaina le loloto o le moni o le talalelei ma le Ekalesia,” o lana tala lea. “O na upumoni na oo mai ma le manino tele i lo’u mafaufau, faatasi ai ma le lagona sa silafia a’u e le Tama Faalelagi. Sa ou lagonaina Lona alofa ma Lana taitaiga. O se tasi lena o uluai aafiaga na ou maua e faaloloto ai la’u molimau.”
Sa fanau Chad H Webb i Rexburg, Idaho, ISA, i le aso 18 o Tesema, 1964, ia Larry George Webb ma Paige Webb. Sa ola a’e o ia i le itu i sautesasae o Idaho ma faaipoipo ai ia Kristi Ann Bronson i le Malumalu o Logan Iuta i le aso 4 o Aokuso, 1990. E nonofo i laua i Layton, Iuta, ISA, ma e toaono le la fanau.
Na faauu Brother Webb mai le Iunivesite o Polika Iaga ma se faailoga o le tagata malaga i le faaSipaniolo ma se faailoga o le matuaofaiva i taitaiga faaleaoaoga ma faavae. Sa faiaoga o ia i vasega seminare i le Aai o Sate Leki ma vasega inisitituti i Virginia ma Iuta, faamaopoopoina polokalama o le inisitituti i Uosigitone, D.C., ma vaavaaia aoaoga ma le filifilia o faiaoga seminare. Talu mai le 2008, na ia auauna atu o se taitai o Seminare ma Inisitituti o Mataupu Faalelotu.
Sa faamaloloina Brother Webb i le avea ai ma peresitene o le Siteki a Layton Iuta Valley View a o le’i umi ae valaauina o ia. O valaauga na muamua atu e aofia ai le epikopo, fautua maualuga, ma le peresitene o le korama a toeaina.