Faamaoni e oo i le Iuga

Saunia e Andrea Muñoz Spannaus

Fesoasoani Lua i le Au Peresitene Aoao o Tamaitai Talavou

O Lona aao lava, o le a mafai ai ona e faatoilaloina Koliata uma e alia’e mai i lou olaga.

Uo talavou pele, o le asō ou te fia tautala tuusa’o atu ia te outou—le autalavou a le Ekalesia.

Ua atoa nei le tausaga talu ona valaauina le Au Peresitene Aoao o Tamaitai Talavou. E tele mea ua tutupu i lenei tausaga ua tuanai atu!

Ua matou feiloai i le toatele o outou ma suesue faatasi i aoaoga a Keriso. Sa tatou usuina pese, fai ni uo fou, ma auauna atu faatasi ma outou i o tatou nuu. Ua faamalolosia i matou e ala i le faalogologo atu ia outou molimau i konafesi a le autalavou ma mea na tutupu i le lalolagi. Sa tatou tapuai faatasi i le maota o le Alii.

O taimi taitasi, sa tatou fefaasoaai ai i se savali mai lo tatou Alii o Iesu Keriso. O le po nei o le a lē ese ai; e i ai sa’u savali mo outou, le autalavou o le Ekalesia a Iesu Keriso.

O Fesili Tetele

Pe na i ai se taimi na e mafaufau ai pe mafai faapefea ona e faamaoni i le Atua a o ola ai i se lalolagi o agasala? O fea e te maua mai ai le malosiaga e agai ai i luma ma faia pea mea lelei? E faapefea ona e maua le olioli moni?

Ou te manatu e mafai ona fesoasoani le aafiaga o Tavita ma Koliata¹.

Tavita ma Koliata

I le Feagaiga Tuai, sa tau le autau a Filisitia ma Isaraelu, ma o taeao ma afiafi taitasi, sa lu’iina ai e le sau’ai Filisitia e igoa ia Koliata soo se Isaraelu la te tau.

I tagata o Isaraelu sa i ai Tavita, o se leoleo mamoe talavou e matua’i laitiitī lava nai lo Koliata, ae sa i ai se faatuatua sau’ai ia Iesu Keriso! Sa ofo atu Tavita la te tau. E oo lava i le tupu sa taumafai ia suia lona mafaufau, ae sa filifili Tavita e tuu lona faatuatuaga ia Iesu Keriso.

Muamua atu, sa tauivi ai Tavita ma se leona faapea foi se urosa. Mai lona lava aafiaga, sa ia iloa ai na puipuia o ia e le Atua ma sa ia manumalo ai. Ia Tavita, o le faamoemoega o le Atua o le mea aupito taua lea. O lea, i le tumu ai i le faatuatua i se Atua o le a lē tuulafoa’ia o ia, na ia aumaia ai ni ma’a lamolemole se lima, ave lana ma’atā, ma sa alu e faafesaga’i ma le sau’ai.

Ua ta’u mai e tusitusiga paia ia i tatou o le maa muamua lava na lia’i e Tavita na tau i le muaulu o Koliata, ma uma ai lona ola.²

Saili mo le Tali

E ui ina sa na o le tasi le ma’a na faaaoga e Tavita e fasioti ai Koliata, ae sa ia saunia le lima. Ma le lima! Ua afua ai ona ou mafaufau pe mafai faapefea ona ou saunia a’u lava e faafesagai ma le lalolagi.

E a pe a faapea o ma’a taitasi e lima a Tavita e faatusa i se malosiaga tatou te manaomia ina ia tatou manumalo ai i o tatou olaga? Mata o a ni mea e faatusa i ai na ma’a e lima? Sa ou mafaufau i tiutetauave nei:

O le ma’a o lo’u alofa i le Atua.
O le ma’a o lo’u faatuatua i lo tatou Faaola, o Iesu Keriso.
O le ma’a o le malamalama i lo’u faasinomaga moni.
O le ma’a o lo’u salamo i aso taitasi.
O le ma’a o lo’u mauaina o le mana o le Atua.

Se’i o tatou talanoa e uiga i le faamanuiaina tele o i tatou i nei malosiaga.

Muamua, o le ma’a o lo’u alofa i le Atua. O le alofa i le Atua o le poloaiga sili muamua.³ O le taiala Mo Le Malosi o le Autalavou ua aoao mai ai i tatou: “E alofa le Atua ia te oe. O Ia o lou Tama. O Lona alofa atoatoa e mafai ona musuia ai oe e alofa ia te Ia. Afai o lou alofa mo le Tama Faalelagi o le faatosinaga aupito sili lea ona taua i lou olaga, e tele filifiliga o le a faigofie atu.”⁴

O lo tatou alofa i le Atua ma la tatou sootaga vavalalata ma Ia tatou te maua ai le malosiaga tatou te manaomia e suia ai o tatou loto ma atili faigofie ai ona faatoilalo o tatou luitau.

Lona lua, o le ma’a o lo’u faatuatua i lo tatou Faaola, o Iesu Keriso. Ina ua afio mai Iesu Keriso i le lalolagi, sa puapuagatia o Ia ona o a tatou agasala ⁵ ma sa Ia tauaveina i Ona lava luga o tatou faanoanoaga, o o tatou tiga, o o tatou vaivaiga, ma o tatou ma’i faaletino ma faalemafaufau. O le ala lena ua Ia silafia ai le ala e fesoasoani ai ia i tatou. O le i ai o le faatuatua ia Iesu Keriso o lona uiga o le faalagolago atoatoa i Lona poto, o Lana taimi, o Lona alofa, ma Lona mana e togiola ai mo a tatou agasala. O le ma’a o le faatuatua ia Iesu Keriso o le a faatoilalo ai soo se “sau’ai” i o tatou olaga.⁶ E mafai ona tatou manumalo i lenei lalolagi pa’ū ona sa Ia mua’i faatoilaloina.⁷

Numera tolu, o le ma’a o le malamalama i lo’u faasinomaga moni. Na aoao mai i tatou e lo tatou perofeta pele o, Peresitene Russell M. Nelson, e faapea o o tatou faasinomaga sili ona taua o ni fanau ia a le Atua, fanau o le feagaiga, ma soo o Iesu Keriso.⁸

Ua suia mea uma ina ua ou iloa lo’u faasinomaga moni. ⁹ A ou le mautonu i o’u tomai, e tele ina ou faapea ifo soo ia te au lava i lo’u mafaufau pe leotele foi, “O a’u o se afafine o le Atua, o a’u o se afafine o le Atua,” ou te faia faafia e tusa ma lo’u manaomia seia i’u ina ou toe lagonaina le mautinoa e faaauau pea.

Lona fa, o le ma’a o lo’u salamo i aso taitasi. I le taiala o le Mo Le Malosi o le Autalavou tatou te faitau ai: “O le salamo e le o se faasalaga mo le agasala; o le ala e faasaoloto ai i tatou e le Faaola mai le agasala. O le salamo o lona uiga o le suia—ia liliu ese mai le agasala ma agai atu i le Atua. O lona uiga o le faaleleia ma maua le faamagaloga. O lenei ituaiga o suiga e le o se mea e tasi le taimi e tupu ai; o se faagasologa faifai pea.”¹⁰

E leai se mea e sili atu lona faasaolotoina nai lo le lagonaina o le faamagaloga a le Atua ma iloa ua tatou mama ma ua toefaalelei ma Ia. O le faamagaloga e mafai mo tagata uma.

O le ma’a lona lima o le ma’a o lo’u mauaina o le mana o le Atua. O feagaiga tatou te osia ma le Atua, e pei o ia tatou te osia i le sauniga o le papatisoga, e mafai ai ona tatou maua le mana o le faaleatua.¹¹ O le mana o le Atua o se mana moni e fesoasoani tatou te faafesagai ai ma luitau, e fai ai faaiuga lelei, ma faateleina ai lo tatou gafatia e onosa’ia tulaga faigata. O se mana e mafai ai ona tatou tuputupu a’e i tomai patino tatou te moomia.¹²

O le taiala Mo Le Malosi o le Autalavou o loo faamalamalama mai ai: “O feagaiga e faafesoota’ia ai oe i le Tama Faalelagi ma le Faaola. E faateleina ai le mana o le Atua i lou olaga.”¹³

Se’i o tatou talanoa e uiga i lena fesootaiga. Manatua ina ua aoao mai e Keriso le eseesega i le va o se fale e fau i luga o le papa ma le fale i luga o le oneone?¹⁴ Na faamalamalama mai e Elder Dieter F. Uchtdorf: “E le tu lava pea se fale i se afa ona e malosi le fale. E le sao foi ona e malosi le papa. E sao le fale mai le afa ona ua maua’a i lena papa malosi. O le malosiaga o le sootaga i le papa e taua.”¹⁵

O lo tatou sootaga patino ia Iesu Keriso o le a tatou maua ai le lototele ma le mautinoa tatou te agai ai i luma i le lotolotoi o tagata e le faaaloalogia o tatou talitonuga, pe soona faia foi i tatou. Ua valaaulia i tatou e Keriso ina ia teuina o Ia i o tatou mafaufauga e le aunoa; ua Ia fetalai mai, “Ia vaavaai mai ia te au i mafaufauga uma.”¹⁶ O le mafaufau i le Faaola tatou te maua ai le manino o le mafaufau e faia ai faaiuga, e gaoioi ai e aunoa ma le fefe, ma fai atu ai e leai i mea e feteenai ma aoaoga a le Atua.¹⁷ A faigata lo’u aso ma manatu ai e pei ua le toe mafai ona ou toe talia se mea, o le mafaufau e uiga ia Keriso ou te maua ai le filemu ma ou maua ai foi le faamoemoe.

E mafai faapefea ona tatou utuvai mai lenei mana a Iesu Keriso? O le usitai i a tatou feagaiga ma faateleina lo tatou faatuatua ia Iesu Keriso o le ki lea.

Ou te moomoo moni lava ma’imau e pe a na toe i ai lava se isi ma’a a Tavita; o le a avea ma ma’a o la’u molimau. O la tatou molimau e fau mai aafiaga patino faaleagaga lea tatou te iloa ai le tosinaga paia i o tatou olaga.¹⁸ E leai se tasi e mafai ona aveesea lena malamalama mai ia i tatou. O le iloaina o mea ua tatou iloa mai le ola ai i o tatou aafiaga faaleagaga, e le mafaatauina. O le faamaoni i lena malamalama tatou te maua ai le saolotoga. Tatou te maua ai le olioli! Afai tatou te fiafia i le upumoni, o le a tatou sailia, ma a tatou mauaina loa, ona tatou puipuia ai lea.¹⁹

O Se Valaaulia

E faapei lava foi ina ou filifilia le ma’a lona ono, ou te valaaulia foi outou e faapotopoto ma lau vasega, korama, po o le aiga ma mafaufau pe o a isi malosiaga tou te manaomia ia maua ina ia tumau faamaoni ai i le Atua, ma faatoilaloina ai le lalolagi.

O Se Folafolaga

A’u uo pele, o loo naunau mai Keriso tatou te malaga faatasi i le malaga o o tatou olaga. Ou te folafola atu ia te oe, a e pipiimau i le ai u’amea, o le a oulua savavali faatasi ma Iesu Keriso.²⁰ O le a Ia taialaina oe, ma o le a Ia aoaoina oe.²¹ O Lona aao lava, o le a mafai ai ona e faatoilaloina Koliata uma e alia’e mai i lou olaga.

Molimau

Ou te molimau atu o loo i ai le olioli i le tatalo i aso uma, i le faitauina o le Tusi a Mamona i aso uma, i le aai ai ma feinu i le faamanatuga i Aso Sa uma, ma i le o i le seminare—i vaveao! E i ai le olioli i le faia o mea lelei.

E i ai le olioli i le faamaoni i le Atua o le atulaulau, le Faaola o le lalolagi, le Tupu o tupu. E i ai le olioli i le avea ai ma se soo o Iesu Keriso.

O le Atua o lo tatou Tama. Na Te silafia manaoga o lou loto ma mea e te mafaia, ma Na Te faatuatuaina oe.

Talavou pelē, o le a fesoasoani Iesu Keriso ia te oe ia e faamaoni e oo i le iuga. Ou te tuuina atu ai la’u molimau i nei upumoni i le suafa paia o Iesu Keriso, amene.