Elder Michael B. Strong

Fitugafulu o le Pulega Aoao

O le aoaoina o le talalelei a Elder Michael B. Strong na amata i le fale, lea na aoaoina ai o ia e ona matua.

“Faatoa tuputupu ae la’u molimau ma malosi atili i le aluga o taimi, toetoe lava i auala e le iloa,” o le tala lea a Elder Strong. A o ia toe tepa i tua, “Ua ou vaaia soo le aao o le Atua i lo’u olaga, ae ua faailogaina i ni aafiaga loloto faaleagaga maoae.”

A o la tausia ma lona toalua lo la aiga, sa la fuafuaina le faaaofia ai o le talalelei i o laua olaga. “Sa matou taumafai ia faia ina ia lalagaina le talalelei i totonu o le ie o o matou olaga,” o le tala lea a Elder Strong. “O le talalelei o so matou uiga lea.”

Na maua e Elder Strong se faailoga o le faasaienisi i paiolosi o meaola ninii ma se vaega itiiti i mea tau vailaau mai le Iunivesite o Polika Iaga i le 1989 ma se faailoga faafoma’i mai le Kolisi Faafoma’i a Baylor i le 1993.

Sa avea o ia ma se foma’i ma, i le taimi o lona valaauga, sa faigaluega o se ofisa sili o faamatalaga faafoma’i mo le Iunivesite o Iuta.

Na iloa e Elder Strong, a fetaiai o ia ma faafitauli, e aofia ai faafitauli i lana galuega, sa taialaina o ia i ni vaifofo a o ia faatauaina na luitau i le tatalo. “Sa mafai ona ou lagonaina le tuuina mai e le Alii ia te au o manatu ma le faia o ni vaifofo ua manino ia te au lea semanu ou te le vaai i ai,” o lana tala lea. “Ua ou iloaina e popole moni lava o Ia ia i tatou.”

I le taimi o lona valaauga o se Fitugafulu o le Pulega Aoao, sa auauna atu Elder Strong o se Fitugafulu Eria. Sa avea foi o ia ma peresitene o le Misiona Tutotonu a Perú Lima, peresitene o le siteki, epikopo, ma se faifeautalai faamisiona i le Misiona a Polivia Cochabamba.

Sa fanau Michael Brent Strong i le Aai o Sate Leki i le aso 6 o Aokuso, 1965. Na ia faaipoipo atu ia Cristin Connelly le aso 22 Aokuso, 1987, i le Malumalu o Sate Leki. O i laua o ni matua o se fanau e toaono. O Elder ma Sister Strong o loo nonofo i Centerville, Iuta, ISA.