Faatuatua i le Alii
Na pau le maualuga e mafai ona tuputupu a’e ai la tatou mafutaga ma le Atua o lo tatou naunau lea e tuuina atu lo tatou faatuatua ia te Ia.
I totonu o le matou aiga, o ni isi taimi matou te taaalo ai i se taaloga matou te ta’ua “The Crazy Trust Exercise.” Atonu ua outou tatalo ai foi. E tutu tagata e toalua o ni nai futu e valavala ai, o le tasi e u lona tua i luma o le isi. I se faailo mai le tagata o loo i tua, e faapa’u atu ai i tua le tagata o loo i luma i lima o le latou uo o loo faatalitali mai.
O le faatuatuaina o le faavae lea o mafutaga uma. O se fesili muamua lava i soo se mafutaga o le “E mafai ona ou faatuatuaina le isi tagata?” Na pau le taimi e fatu ai se mafutaga, pe afai lea e naunau tagata e tuu atu le faatuatuaga i le tasi ma le isi. E le o se mafutaga pe afai e toatasi le tagata e faatuatuaina atoatoa ae o le isi e leai.
O i tatou taitoatasi o se atalii po o se afafine agaga faapelepele a se Tama Faalelagi agaalofa.1 Ae e ui e saunia e lena gafa faaleagaga se faavae, e le mafai e ia lava ona fatu se mafutaga aoga ma le Atua. E na o le pau le mea e mafai ona fausia se mafutaga pe a tatou filifili e faatuatua ia te Ia.
E finagalo le Tama Faalelagi e fausia se mafutaga vavalalata, patino faatasi ma Ana fanau agaga taitoatasi.2 Na faaalia e Iesu lena manaoga ina ua Ia tatalo, “Ina ia tasi i latou uma, faapei o oe le Tama o i totonu ia te au, o au foi o i totonu ia te oe, ina ia tasi i latou i totonu ia te i taua.”3 O le mafutaga o loo saili e le Atua ma tamaiti agaga taitasi o le mafutaga lea e matuai vavalalata ma patino lea o le a mafai ona Ia faasoa atu ai mea uma o ia te Ia ma mea uma ua avea ai o Ia.4 O lena ituaiga o mafutaga loloto ma tumau e na o le pau le tulaga e tupu ai pe a fausia i luga o le faatuatuaga atoatoa.
Mo Lana vaega, ua galue ai le Tama Faalelagi mai le amataga e faailoa mai Lona faatuatuaga atoa i le gafatia faalelagi o Ana fanau taitoatasi. O le faatuatuaina e faavae i le fuafuaga na Ia tuuina mai mo lo tatou tuputupu a’e ma le alualu i luma ae tatou te lei o mai i le lalolagi. O le a Ia aoao i tatou i tulafono faavavau, foafoa se lalolagi, saunia mo i tatou ni tino faaletino, tuu mai ia i tatou le meaalofa e filifili mo i tatou lava, ma faataga i tatou e aoao ma tuputupu a’e e ala i le faia o a tatou lava filifiliga. O Lona finagalo ia tatou filifili e mulimuli i Ana tulafono ma toe foi atu e olioli i le ola faavavau faatasi ma Ia ma Lona Alo.
O le silafia ai e le o taimi uma o le a tatou faia ai filifiliga lelei, na Ia saunia ai foi se ala tatou te sao ai mai taunuuga o filifiliga leaga. Na Ia saunia mo i tatou se Faaola—o Lona Alo, o Iesu Keriso—e togiola mo a tatou agasala ma toe faamama i tatou i tuutuuga o le salamo.5 Ua Ia valaaulia i tatou e faaaoga le meaalofa faapelepele o le salamo e le aunoa.6
Ua iloa e matua uma le faigata o le lava o le faatuatuaina o se tamaitiiti e tuu atu ai i latou e fai ai a latou lava faaiuga, ae maise lava pe a iloa e le matua o le a faia e le tamaitiiti mea sese ma o se taunuuga e tigaina ai. Ae ua faatagaina i tatou e le Tama Faalelagi e faia filifiliga lea o le a fesoasoani ia i tatou e ausia lo tatou gafatia paia! E pei ona aoao mai e Elder Dale G. Renlund, “O [Lana] sini i le tulaga faamatua, o le lē tuu i Ana fanau ia faia le mea sa’o; ae o le tuu atu i Lana fanau e filifili e fai le mea sa’o ma mulimuli ane, avea e faapei o Ia.”7
E ui i le faatuatuaga o le Atua ia i tatou, na pau le maualuga e mafai ona tuputupu a’e ai la tatou mafutaga ma Ia o lo tatou naunau lea e tuu atu lo tatou faatuatua ia te Ia. O le lui la o le, o loo tatou ola i se lalolagi pa’ū ma aafia uma i le faalataina o le faatuatuaina o se taunuuga o le le faamaoni, taufaavaleaga, po o le fai faamalosi e isi, po o isi tulaga. A uma ona faalataina, atonu o le a tatou tauivi ia toe faatuatuaina. O nei aafiaga le lelei o le faatuatuaina ma tagata le atoatoa e ono aafia ai lo tatou naunautai e faatuatuaina le Tama Faalelagi atoatoa.
O ni tausaga ua mavae, na faaalia ai e ni a’u uo se toalua, o Leonid ma Valentina le la mananao e avea ma ni tagata o le Ekalesia. A o amata ona aoao e Leonid le talalelei, sa faigata ia te ia ona tatalo. I lona olaga i se taimi na muamua atu, sa mafatia ai Leonid mai le taufaavaleaga ma le pulea faamalosi e e maualuluga atu ma sa atiae ai se le faatuatuaina o taitai. O nei aafiaga sa aafia ai lona gafatia e tatala atu lona loto ma faailoa atu ona lagona patino i le Tama Faalelagi. Faatasi ai ma le taimi ma le suesue, sa maua ai e Leonid se malamalamaaga lelei atu i le uiga faaalia o le Atua ma maua ai aafiaga o le lagonaina o le alofa o le Atua. Mulimuli ane, na avea le tatalo o se auala masani mo ia e faaalia ai le faafetai ma le alofa sa ia lagonaina mo le Atua. O le faateleina o lona faatuatuaina o le Atua na iu ai ina taitaiina atu ai i la’ua ma Valentina e ulu atu i ni feagaiga paia e faamalosia ai lo la mafutaga ma le Atua ma le tasi ma le isi.
Afai o le aveesea o le faatuatuaga i se taimi na muamua atu, ua taofia ai oe mai le faatuatuaina o le Atua, faamolemole mulimuli i le faataitaiga a Leonid. Ia faaauau pea ona aoao atili ma le onosai e uiga i le Tama Faalelagi, o Ona uiga faaalia, Ona uiga auaumama, ma Ana faamoemoega. Tagai mo ma faamaumau aafiaga o le lagonaina o Lona alofa ma le mana i lou olaga. Ua aoao mai lo tatou perofeta soifua, o Peresitene Russell M. Nelson, e faapea, o le tele o lo tatou aoao e uiga i le Atua, o le faigofie foi lea mo i tatou ona faatuatuaina o Ia.8
O ni isi taimi o le auala sili e aoao ai e faatuatuaina le Atua, o le faatuatuaina lea o Ia. Faapei o le “The Crazy Trust Exercise,” o nisi taimi tatau lava ona tatou naunau ia pa’ū’ū i tua ma tuu atu ia te Ia e sapoina i tatou. O lo tatou olaga faaletino o se tofotofoga. O luitau e fālōina i tatou e oo i tua atu o o tatou lava gafatia e oo mai soo. A le lava lo tatou lava atamai ma le malamalama, o lo tatou masani o le vaavaai mo ni punaoa e fesoasoani ia i tatou. I se lalolagi ua faulalai ai faamatalaga, e le sioti puna faamatalaga e faalauiloa ai a latou vaifofo i o tatou luitau. Peitai, o le fautuaga faigofie, ma taimiina i le Faataoto ua tuuina mai ai le fautuaga sili ona lelei: “Ia e faatuatua ia Ieova ma lou loto atoa.”9 Tatou te faaalia lo tatou faatuatuaina o le Atua i le liliu muamua atu ia te Ia pe a fetaiai ma luitau.
Ina ua uma lau aoga faaloia i Iuta, sa feagai lo matou aiga ma se filifiliga taua i le po o fea e faigaluega ai ma faia ai lo matou fale. Ina ua mavae ona fefautuaai ma le tasi ma le isi ma le Alii, sa matou lagona le taialaina o lo matou aiga ia masii atu i sasae o le Iunaite Setete, e mamao ese mai matua ma tauaiga. O le mea muamua, sa sologa lelei mea, ma na matou lagona le faamautuina o la matou faaiuga. Peitai ane na suia mea uma. Sa tuuitiitia tagata faigaluega o le ofisa loia, ma sa ou feagai ma le leai o se galuega po o se inisiua i le taimi tonu lea na fanau ai le ma afafine o Dora, ma sa i ai ni luitau ogaoga o faafomai ma manaoga faapitoa faaumiumi. A o feagai ai i nei luitau, sa ou mauaina se valaauga e auauna atu lea o le a manaomia ai le taimi ma le tuuto tele.
Ou te le’i fetaiai lava ma sea ituaiga luitau ma sa lofituina a’u. Sa amata ona ou fesiligia le faaiuga sa ma faia ma lona faamautinoaga na o mai faatasi. Sa ma faatuatuaina le Alii, ma sa tatau ona sologa lelei mea uma. Sa ou pa’ū atu i tua, ma ua foliga mai nei e leai ma se tasi o le a sapoina a’u.
I se tasi aso na manino lava le oo mai o ni upu i lo’u mafaufau ma lo’u loto e faapea “Aua le fesili pe aisea; ae fesili po o le a se mea e te finagalo ou te aoaoina”. O lea la ua atili ona ou le mautonu. I le taimi tonu lava sa ou tauivi ai ma la’u faaiuga muamua, sa valaaulia a’u e le Atua ia ou faatuatua atili atu ia te Ia. O le toe tepa i tua, o se taimi taua lea i lo’u olaga—o le taimi na ou iloa ai o le auala sili e aoao ai ia faatuatuaina le Atua o le faatuatuaina lea o Ia. I vaiaso na sosoo ai, sa ou vaaia ma le ofo tele a o tatala mai faavavega e le Alii Lana fuafuaga e faamanuia ai lo ma aiga.
E silafia e faiaoga ma faiaoga o taaloga lelei o le tuputupu a’e faaleatamai ma le malosi faaletino e pau le auala e mafai ai ona tupu o le faamalosia o le mafaufau ma maso. E faapena foi, e valaaulia i tatou e le Atua ia tuputupu a’e e ala i le faatuatuaina o Ana aoaoga faaleagaga e ala i aafiaga e faalautele ai le agaga. O le mea lea, e mafai ona tatou mautinoa o le a lava le faatuatua sa tatou faaalia i le Atua i le taimi ua tuanai, ae o loo i ai se isi aafiaga e faateleina ai le faatuatua o loo taoto i luma atu. E taulai atu le Atua i lo tatou tuputupu a’e ma le alualu i luma. O Ia o le Matai Aoao, o le faiaoga atoa o taaloga o lē e faateleina e le aunoa i tatou e fesoasoani ia tatou iloa atili ai lo tatou gafatia paia. O le a aofia ai i taimi uma se valaaulia i le lumanai ia faatuatua teisi atu ia te Ia.
Ua aoao mai i le Tusi a Mamona le mamanu e faaaoga e le Atua e faateleina ai i tatou e atinae ai sootaga malolosi ma Lana fanau. I le Sau, Mulimuli Mai ia te A’u, na tatou aoaoina ai lata mai nei i le ala na tofotofoina ai le faatuatua o Nifae i le Atua, ina ua poloaiina i latou ma ona uso e toe foi i Ierusalema e aumai papatusi apamemea. Ina ua le manuia a latou taumafaiga muamua, na togi solo a ona uso ma sauni e toe foi e aunoa ma papatusi. Ae sa filifili Nifae e tuu atu lona faatuatuaga atoa i le Alii ma sa manuia i le aumaiga o papatusi.10 Atonu o lena aafiaga na faamalosia ai le talitonu mautinoa o Nifae i le Atua ina ua gau lana aū, ma sa faapea ona feagai ai le aiga ma le fiaaai i le vaomatua. Sa toe filifili foi Nifae e faatuatua i le Atua, ma sa laveaiina ai le aiga.11 O nei aafiaga faamanuiaina na tuu atu ai ia Nifae le talitonuga malosi atu i le Atua mo le galuega tele ma le faatuatuaina o le a feagai ma ia o le fauga lea o se vaa.12
E ala i nei aafiaga, sa faamalosia e Nifae le la mafutaga ma le Atua e ala i le fai soo ma le faaauau pea o le faatuatuaina o Ia. E faaaoga e le Atua lea lava mamanu ia i tatou. Na te tuu mai ia i tatou ni valaaulia patino e faamalosi ma faaloloto ai lo tatou faatuatua ia te Ia.13 O taimi taitasi tatou te talia ma faatino ai se valaaulia, e tuputupu a’e lo tatou faatuatua i le Atua. Afai tatou te le amanaia pe teena se valaaulia, e tu lo tatou alualu i luma seia oo ina tatou galulue i se valaaulia fou.
O le tala fiafia la, e tusa pe o le a lo tatou faatuatua atonu na tatou filifili pe le filifili foi e tuu atu i le Atua i le taimi ua mavae, e mafai ona tatou filifili e faatuatua i le Atua i le aso nei ma aso uma lava agai atu i le lumanai. Ou te folafola atu o taimi uma tatou faia ai, o le a i ai iina le Atua e sapo i tatou, ma o le a tupu a’e malosi la tatou mafutaga o le faatuatuaina se’ia oo i le aso o le a tatou tasi ai ma Ia ma Lona Alo. Ona mafai lea ona tatou tautino atu e pei o Nifae, “Le Alii e, ua ou faalagolago ia te oe, ma o le a ou faalagolago pea ia te oe e faavavau.”14 I le suafa o Iesu Keriso, amene.