Tofatumoanaina i le Olioli ia Keriso
Ou te molimau atu e faafofoga mai lo tatou Tama Faalelagi i a outou aioiga ma loimata ma o le a tali mai pea i le poto atoatoa.
Matou te alolofa ia te oe, Elder Kearon. E mafai ona ou nōnōina mai lena tautala mo le 10 minute?
Faananau-mo Vavega
I le Feagaiga Fou, ua tatou aoao ai e uiga i le tauaso o Patimaio, o le na alaga atu ia Iesu ua manaomia se vavega. “Na fetalai atu Iesu ia te ia, Ina alu; ua e ola i lou faatuatua. Ma sa ia pupula loa lava.”1
I se tasi taimi, na faananau ai se tagata i Petesaita mo se faamalologa. I se tulaga e ese ai, e le’i oo mai i le taimi lava lealenei vavega. Nai lo lena, na faalua ona faamanuia o ia e Iesu a’o le’i “faamaloloina.”2
I se faataitaiga lona tolu, na “faatolu ona talosagaina le Alii” e le Aposetolo o Paulo i ona mafatiaga,3 ae peitai, ua tatou iloa, e le’i toina atu ia te ia lana talosaga faamaoni.
E toatolu tagata eseese. E tolu aafiaga tulaga ese.
O lea la, o le fesili lenei: Aisea e vave ai ona maua e nisi a latou vavega na moomoo i ai, ae o isi e tumau ma le onosai, ma faatalitali i le Alii?4 Ma e ui atonu tatou te le iloa i taimi uma le pe aisea, ae faafetai, tatou te iloa i taimi uma po o ai e “alofa ia i [tatou]”5 ma “[faia] mea uma mo lo [tatou] soifua manuia ma le fiafia.”6
O Faamoemoega Paia
O le Atua, o lē silasila i le taunuuga mai le amataga,7 ua faamautinoa mai e faapea “O lou tiga ma ou puapuaga o le a na o sina minute laitiiti”8 ma o le a faapaiaina “mo lou manuia.”9
I le fesoasoani mai ia i tatou ia maua se isi faauigaga i o tatou tofotofoga, na aoao mai ai Elder Orson F. Whitney: “E leai se tiga tatou te mafatia ai, leai se tofotofoga tatou te oo i ai e maimau. E fesoasoani e a’otauina ai i tatou. … O … mea uma tatou te tatalia [ma le onosai] … e fausia ai o tatou tagata, faamamaina ai o tatou loto, faalautele ai o tatou agaga, ma atili avea ai i tatou ma ni tagata agamalu ma agaalofa. … E ala mai i faanoanoaga ma puapuaga, fita ma faigata, tatou te maua ai le malamalama lea ua tatou o mai ai iinei ia maua, ma o le a faia ai ia tatou faapei atili o o tatou [matua faalelagi].”10
I le malamalama ai “ina ia tumau i [ona] luga le mana o Keriso” i ona puapuaga, na saunoa ai le Aposetolo o Paulo ma le lotomaualalo, “Aua pe a ou vaivai, ona ou malosi ai lea.”11
O tofotofoga o le olaga e faamaonia ai i tatou.12 E oo lava i le Faaola “na aoaoina ai … ia usiusitai” ma sa “faaatoatoaina ona o tiga.”13
Ma e i ai se aso o le a Ia folafola atu ai ma le agaalofa, “Aua faauta, ua Ou faamamāina oe, ua Ou filifilia oe mai i le ogaumu o puapuaga.”14
O le faalagolago i faamoemoega paia a le Atua e manavaina ai le faamoemoe i agaga ua lēlavavā ma faaosofia ai le naunautaiga i vaitau o mafatiaga ma lototiga.15
O Vaaiga Paia
I le tele o tausaga ua mavae, na faasoa mai ai i lena taimi e Peresitene Russell M. Nelson lenei malamalamaaga taua: “A tatou tagatagai atu i mea uma ma se vaaiga o le faavavau, o le a matua’i faamamasagia ai lava a tatou avega.”16
Sa ma molimauina talu ai nei ma lo’u toalua o Jill lenei meamoni i olaga faamaoni o Holly ma Rick Porter, lea na maliu lo la atalii e 12-tausaga-le-matua, i se afi matautia. Faatasi ma lima ma vae na matua’i mu leaga mai se tauiviga lototoa e lavea’i lana tama faapelepele, sa tulai ai Holly i le sauniga faamanatuga a le uarota, ma molimau mamana atu i le filemu tele ma le olioli na liligi ifo e le Alii i luga o lo latou aiga i lo latou faavauvau, na faaaoga ai upu e pei o le faavavega, maoae, ma le ofoofogia.
O le faavauvau lē matauaveina o lenei tina pele, na suia i le filemu lemaalofaia i lenei manatu: “O o’u lima e le o lima ia e lavea’i ai. O na lima e ō le Faaola! Nai lo le vaai i o’u ma’ila’ila e fai ma faamanatu o mea sa le mafai ona ou faia, ou te manatua ai ma’ila o loo tauaveina e le Faaola.”
Ua faataunuu e le molimau a Holly le folafolaga a lo tatou perofeta: “A e mafaufau faaselesitila, o le a e vaai atu i tofotofoga ma mea faafeagai i se malamalama fou.”17
Na taua e Elder D. Todd Christofferson: “Ou te talitonu o le luitau o le faatoilaloina ma le tuputupu ae mai puapuaga na faatosina mai ia i tatou ina ua tuuina mai e le Atua Lana fuafuaga o le togiola i le muai olaga. E tatau ona tatou taulimaina lena luitau i le taimi nei ma le iloaina o le a lagolagoina i tatou e lo tatou Tama Faalelagi. Ae e taua lo tatou liliu atu ia te Ia. A aunoa ma le Atua, o nei aafiaga pogisa o mafatiaga ma puapuaga e oo atu i le leai o se faamoemoe, faanoanoa, ma le lototiga.”18
O Mataupu Faavae Paia
Ina ia aloese mai le pogisa o le le faamalieina ae ia maua le filemu sili atu, faamoemoe, ma e oo lava i le olioli i taimi o luitau faigata o le olaga, ou te faasoa atu ai ni mataupu faavae paia se tolu.
Tasi—o le faatuatua malosi e oo mai i le tuu o Iesu Keriso ia faamuamua.19 “Vaai mai ia te aʼu i mafaufauga uma” na Ia fetalai mai ai; “aua le masalosalo, aua le fefefe.”20 Na aoao mai Peresitene Nelson:
“O [lo tatou] ola e faavavau e faalagolago i [lo tatou] faatuatua ma i Lana Togiola.”21
“A o ou tauivi ma le tiga matuitui na mafua ona o lo’u manu’aga talu ai nei, sa ou lagona loloto atili ai le talisapaiaina o Iesu Keriso ma le meaalofa lemafaamatalaina o Lana Togiola. Mafaufau i ai! Sa puapuaga le Faaola i ‘tiga ma mafatiaga ma faaosoosoga o ituaiga uma’ ina ia mafai ona Ia faamafanafana i tatou, faamalolo i tatou, [ma] laveai i tatou—i taimi e manaomia ai.”22
Sa ia faaauau: “O lo’u manu’aga na mafua ai ona ou toe mafaufau pea lava pea i ‘le silisiliese o le Paia e Toatasi o Isaraelu.’ I le gasologa o lo’u faamalologa, sa faailoa mai e le Alii Lona mana paia i ni auala filemu ma le lē mafaaseseina.”23
“E maua foi outou e le puapuaga i le lalolagi, a ia outou loto tetele,” ua faamalosiau mai ai lo tatou Faaola; “ua Ou manumalo i le lalolagi.”24
Lua—o le faamoemoe e sili atu ona susulu e oo mai i le vaai faalemafaufau i lo tatou taunuuga e faavavau.25 I le talanoa ai e uiga i le mana o loo i ai i le tausia “o se vaaiga mamao i faamanuiaga maoae ua folafola mai e lo tatou Tama … i o tatou mata i aso uma,” na molimau mai ai Sister Linda Reeves: “Ou te le iloa pe aisea ua tele ai o tatou tofotofoga, ae o lo’u lava lagona patino, e maoae le taui, … e matua tumu i le olioli ma e le oo i ai lo tatou malamalama pe a oo i lena aso o le taui, atonu tatou te fia fai atu i lo tatou Tama alofa ma le alofa mutimutivale, ‘Pe sa na o le pau lava lena o le mea sa manaomia?’ … O le a le mea e taua … o mea tatou te mafatia ai iinei, i le iuga, o na tofotofoga … o mea tonu lava na o le a faaagavaaina ai i tatou mo le ola e faavavau … i le malo o le Atua?”26
Na faasoa mai e Peresitene Nelson lenei malamalamaaga: “Mafaufau i le tali a le Alii ia Iosefa Samita ina ua ia aioi atu mo se toomaga i totonu o le Falepuipui o Liperate. Sa aoao atu e le Alii le Perofeta e faapea o le faiga lē alofa o ia o le a ia maua ai le aafiaga po o le poto masani ma o le a avea ma ona lelei. ‘Afai e te talitalia lelei,” sa folafola atu e le Alii, “o le a faaeaina oe e le Atua i lugā.’ Sa aoao atu e le Alii ia Iosefa e mafaufau faaselesitila ma ia vaai faalemafaufau i se taui e faavavau nai lo le taulai atu i faigata ogaoga o le aso.”27
O lea suiga o vaaiga e aumaia ai le faapaiaga faateleina ia Iosefa, e pei ona atagia mai i lenei tusi i se uo: “I le mavae ai ona loka i totonu o papuipui o se falepuipui mo le lima masina, e foliga mai ia te au o le a atili mu’amu’a lo’u loto pe a mavae lenei mea nai lo se isi taimi muamua. … Semanu e le mafai lava ona ou lagonaina e pei ona lagonaina i le taimi nei pe ana ou le’i mafatia i mea sese sa ou pagatia ai.”28
Tolu—o le mana sili atu e oo mai i le taulai atu i le olioli.29 I le taimi o itula sili ona taua ma tiga o le faavavau, sa lei solomuli lo tatou Faaola ae sa Ia taumafa i le ipu oona.30 Na faapefea ona Ia faia? Ua tatou aoao, “Ona o le olioli sa tuu i ona luma [Keriso] na onosai i le satauro,”31 o Lona finagalo “ua tofatumoanaina i le finagalo o le Tamā.”32
O lenei fasifuaitau o le “tofatumoanaina” ua matua’i tuia ai lava lo’u loto. Sa faateleina lo’u fiafia i ai ina ua ou iloaina i le faaSipaniolo, o le “tofatumoaina” ua faaliliuina o le “lofituina”; i le faaSiamani, e pei o le “faaumatiaina”, ma i le faa-Saina, e pei o le “ufitia.” O le mea lea, a oo ina lofituina a’u i luitau sili o le olaga, ou te manatuaina le folafolaga a le Alii—e faapea, “tatou le mafatia i soo se ituaiga o puapuaga, vagana ai [ua] faatumuina [lofituina, faaumatia, ma ufitia] i le olioli ia Keriso.”33
Ua ou vaaia i le toatele o outou lenei olioli, lea “[e tetee] … malamalamaaga faaletino,”34 e ui lava e lei aveesea a outou ipu oona. Faafetai mo le tausia o a outou feagaiga ma le tutu o ni molimau mo le Atua.35 Faafetai mo le aapa atu e faamanuia i tatou uma, a o “lilo faanoanoa i [o outou] loto, ma ua lē ma va’aia.”36 Pe a outou aumaia le toomaga a le Faaola i isi, o le a outou mauaina mo outou lava, na aoao mai e Peresitene Camille Johnson.37
O Folafolaga Paia
Ia, toe foi mai faatasi ma a’u i le sauniga faamanatuga lea na matou molimauina ai le vavega o le aiga o Holly Porter a o fesoasoani i ai Alii.38 I luga o le tulaga a o mafaufau loloto po o le a sa’u tala e avatu ai le faamafanafanaga i lenei aiga ofoofogia ma a latou uo, sa oo mai lenei manatu: “Faaaoga upu a le Faaola.”39 O le a ou faaiu atu la i le asō e pei ona sa ou faia ai i lena Sapati, i Ana afioga, “lea e faamaloloina ai le loto ua faamanu’alia.”40
“Ia outou o mai ia te au, o outou uma o e tigaina ma mafatia i avega, o a’u foi e malolo ai outou.”41
“O le a Ou faamāmāina avega ua i o outou tauʼau, ia outou lē lagonaina i o outou tua, aʼo outou i ai i le pologa; … ma ia outou mautinoa o Aʼu, o le Alii o le Atua, e asiasi atu i loʼu nuu i o latou puapuaga.”42
“Ou te le tuulafoaina outou e le faamafanafanaina: Ou te sau i te outou.”43
O La‘u Molimau
I le migao e tumu i le olioli, ou te molimau atu ai o loo soifua lo tatou Faaola ma e mautu Ana folafolaga.44 Aemaise outou o e ua atuatuvale pe “puapuagatia i soo se itu,”45 Ou te molimau atu e faafofoga mai lo tatou Tama Faalelagi i a outou aioiga ma loimata46 ma o le a tali mai pea i le poto atoatoa.47 “Ia toina tu e le Atua ia te outou,” e faapei ona Ia faia mo lo matou aiga i taimi o le manaomia tele, “ina ia māmā a outou avega,”48 e oo lava ina “tofatumoanaina i le olioli o Keriso.”49 I le suafa paia o Iesu Keriso, amene.