Olioli i le Meaalofa o Ki o le Perisitua

Saunia e Peresitene Russell M. Nelson

Peresitene O Le Ekalesia a Iesu Keriso o le Au Paia o Aso e Gata Ai

E pulea e ki o le perisitua le auala e mafai ona faaaoga ai le perisitua a le Atua e aumai ai faamoemoega o le Alii ma faamanuia ai tagata uma o ē taliaina le talalelei toefuata’iina.

O’u uso e ma tuafafine pele, o le asō o se aso faasolopito mo Peresitene Dallin H. Oaks ma a’u. Ua 40 tausaga talu ai, i le aso 7 o Aperila, 1984, ina ua valaauina i ma’ua i le Korama a Aposetolo e Toasefululua.¹ Ua ma olioli i konafesi aoao taitasi ma konafesi aoao uma, talu mai lena taimi, e aofia ai le konafesi lenei. Ua toe faamanuiaina foi i tatou i se liligi paia mai o le Agaga. Ou te faamoemoe o le a outou suesue pea i savali o lenei konafesi i masina o gasolo mai.

Ina ua ou fanau mai,² e ono malumalu sa faagaoioia i le Ekalesia—e taitasi i St. George, Logan, Manti, ma le Aai o Sate Leki, Iuta; faapea ai ma Cardston, Alberta, Kanata; ma Laie, Hawaii. E lua uluai malumalu na puupuu se taimi na faaaoga ai i Katelani, Ohaio, ma Navu, Ilinoi. Ina ua masii atu le tino tele o le Ekalesia i sisifo, sa faamalosia le Au Paia e tuua na malumalu e lua.

O le Malumalu o Navu sa faatamaiaina e se afi na susunu e se tagata. Sa mulimuli ane toe fausiaina ona faapaia ai lea e Peresitene Gordon B. Hinckley.³ O le Malumalu o Katelani sa faaleagaina e fili o le Ekalesia. Mulimuli ane sa maua e le Community of Christ le Malumalu o Katelani, lea sa latou umiaina ai mo le tele o tausaga.

O le masina ua te’a sa faasilasila atu ai le faatauina e Le Ekalesia a Iesu Keriso o le Au Paia o Aso e Gata Ai o le Malumalu o Katelani, faatasi ai ma nisi o nofoaga faasolopito taua i Navu. Matou te faafetai tele i talanoaga mafana ma felagolagomai na matou faia ma taitai mai le Community of Christ na oo ai i lenei maliliega.

E tulagaese le taua o le Malumalu o Katelani i le Toefuataiga o le talalelei a Iesu Keriso. O nisi o mea na tutupu iina sa valo’ia mo le faitau afe o tausaga ma sa taua mo le Ekalesia toefuata’iina a le Alii e faataunuu ai lana misiona i aso e gata ai.

O le mea aupito sili ona taua o nei mea na tupu i le Aso Sa o le Eseta i le aso 3 o Aperila, 1836.⁴ I lena aso, sa oo ai Iosefa Samita ma Oliva Kaotui i se faasologa o asiasiga ofoofogia. Muamua, sa faaali mai le Alii o Iesu Keriso. Sa tusia e le Perofeta e faapea o “fofoga [o le Faaola] sa pei o se afi mumū; o lauao o lona ao sa papaʼe e pei o le kiona mamā; o ona fofoga sa susulu e sili atu i lo le pupula o le la; ma o lona siufofoga sa pei o le leo o le tafe-taalili o vai tetele.”⁵

I le taimi o lea asiasiga, sa faamautu mai ai e le Alii Lona faasinomaga. Sa Ia fetalai mai: “O Aʼu o lē muamua ma lē mulimuli; o Aʼu o lē o ola, o Aʼu o lē na fasia; o Aʼu o lo oulua fautua i le Tamā.”⁶

Ona folafola mai lea e Iesu ua Ia taliaina le malumalu e avea ma Ona maota ma fai mai lenei folafolaga ofoofogia: “O le a Ou faaali atu aʼu lava i loʼu nuu i lenei fale i le alofa mutimutivale.”⁷

O lenei folafolaga iloga e faatatau i malumalu uma ua faapaiaina i aso nei. Ou te valaaulia outou ia mafaufau loloto po o le a le uiga o le folafolaga a le Alii mo oe patino lava ia.

Na sosoo ma le asiasiga a le Faaola, na faaali mai ai Mose. Na faaee atu e Mose ia Iosefa Samita ki mo le faapotopotoina o Isaraelu ma le toefoi mai o ituaiga e sefulu.⁸

Ina ua tapunia lenei faaaliga, “Sa oo mai Elaia, ma tuu mai le tisipenisione o le talalelei a Aperaamo” ia Iosefa.⁹

Ona faaali mai lea o Elia le perofeta. O lona oo mai na faataunuu ai le folafolaga a Malaki e faapea, a o le’i oo mai le Afio Mai Faalua, o le a auina mai e le Alii ia Elia e “faaliliuina loto o mātua i fanau, ma loto o fanau i o latou mātua.”¹⁰ Ona faaee atu lea e Elia o ki o le mana o faamauga i luga o Iosefa Samita.¹¹

O le taua o nei ki ua toe faafoi mai i le lalolagi e ni avefeau faalelagi se toatolu i lalo o le taitaiga a le Alii, e le lava upu e matua faamamafa ai. O ki o le perisitua o loo i ai le pule ma le mana o le au peresitene. E pulea e ki o le perisitua le auala e mafai ona faaaoga ai le perisitua a le Atua e aumai ai faamoemoega o le Alii ma faamanuia ai tagata uma o ē taliaina le talalelei toefuata’iina a Iesu Keriso.

E taua le silafia a o lumanai ai le faatulagaina o le Ekalesia, ua uma ona faaee atu e avefeau faalelagi le Perisitua Arona ma le Mekisateko i luga o Iosefa Samita ma tuu atu ia te ia ki mo perisitua uma e lua.¹² O nei ki na tuu atu ai ia Iosefa Samita le pule e faatulaga ai le Ekalesia i le 1830.¹³

Ona oo lea i totonu o le Malumalu i Katelani i le 1836, o le faaeega atu o nei ki faaopoopo e tolu o le perisitua—o lona uiga, o ki o le faapotopotoina o Isaraelu, o ki o le talalelei a Aperaamo, ma ki o le mana o faamauga—sa taua. O nei ki sa faatagaina ai Iosefa Samita—ma Peresitene uma na sosoo ai o le Ekalesia a le Alii—e faapotopoto Isaraelu i itu uma e lua o le veli, ia faamanuia ai fanau uma o le feagaiga i faamanuiaga o Aperaamo, ia tuu ai se faamaufaailoga ua faamaonia i luga o sauniga ma feagaiga o le perisitua, ma ia faamau ai aiga e faavavau. O le mana o nei ki o le perisitua e le muta ma e ofoofogia.

Mafaufau i le auala semanu e ese ai lou olaga pe ana faapea e le’i toefuata’i maia ki o le perisitua i le lalolagi.¹⁴ A aunoa ma ki o le perisitua, e le mafai ona faaee atu ia te oe le mana o le Atua.¹⁵ A aunoa ma ki o le perisitua, o le Ekalesia ua na o se aoaoga taua ma se faalapotopotoga mo galuega alofa ae leai se isi mea sili atu. A aunoa ma ki o le perisitua, e leai ma se tasi o tatou e mafai ona mauaina sauniga ma feagaiga taua ia e fusia ai i tatou e faavavau i ē pele ia i tatou ma faatagaina ai i tatou i le i’uga e mau ma le Atua.

O ki o le perisitua ua ese ai Le Ekalesia a Iesu Keriso o le Au Paia o Aso e Gata Ai mai se isi lava faalapotopotoga i le lalolagi. E tele isi faalapotopotoga e mafai ma o le a faia lou olaga ia lelei atu iinei i le olaga faaletino. Ae e leai se isi faalapotopotoga e mafai ma o le a faatosinaina lou olaga pe a mavae le oti.¹⁶

Ua tuu mai e ki o le perisitua ia i tatou le pule e tuufaasolo atu ai faamanuiaga uma na folafola atu ia Aperaamo i alii ma tamaitai uma e tausi-feagaiga. Ua faia e galuega o malumalu nei faamanuiaga matagofie ia avanoa i fanau uma a le Atua, e tusa lava po o fea po o anafea na latou soifua ai po o fea foi o latou soifua ai nei. Ia tatou olioli ua toe i ai nei ki o le perisitua i le lalolagi!

Ou te valaaulia outou ia mafaufau ma le toto’a i faamatalaga nei e tolu:

O le faapotopotoina o Isaraelu o le faamaoniga lea e alofa le Atua i Ana fanau uma i soo se mea.
O le talalelei a Aperaamo o le isi faamaoniga lea e alofa le Atua i Ana fanau uma i soo se mea. Ua Ia valaaulia tagata uma e o mai ia te Ia, “uliuli ma le paʼepaʼe, e pologa ma le saoloto, o tane ma fafine; … ua tutusa tagata uma i le Atua.”¹⁷
O le mana o faamauga o le faamaoniga faalelagi lea o le tele na’ua o le alofa o le Atua i Ana fanau uma i soo se mea ma e finagalo ia i latou taitoatasi ia filifili e toefoi atu i le aiga ia te Ia.

O ki o le perisitua na toefuatai e ala mai i le Perofeta o Iosefa Samita ua mafai ai mo alii ma tamaitai tausi-feagaiga uma ona olioli i faamanuiaga maoae ma patino faaleagaga. E toe faapea atu, e matuā anoanoa’i mea e a’oa’o mai le talafaasolopito paia o le Malumalu o Katelani.

O le tatalo o le faapaiaga a Iosefa Samita o le Malumalu o Katelani ua aoao ai i tatou e uiga i le auala e faamalosia ai faaleagaga e le malumalu oe ma a’u e taulima luitau o le olaga i nei aso e gata ai. Ou te fautuaina oe e suesue lena tatalo, o loo tusia i le Mataupu Faavae ma Feagaiga vaega e 109. O le tatalo o le faapaiaga, lea sa mauaina e ala i faaaliga, ua aoao mai o le malumalu o se “o se fale lava o le tatalo, o se fale o le anapogi, o se fale o le faatuatua, o se fale o le aoaoga, o se fale o le mamalu, o se fale o le faatulagaga tatau, o se maota o le Atua.”¹⁸

O lenei lisi o uiga paia e sili atu nai lo se faamatalaga e uiga i se malumalu. O se folafolaga e uiga i mea e mafai ona tupu ia i latou o e auauna atu ma tapuai i totonu o le maota o le Alii. E mafai ona latou faamoemoe e maua ni tali i tatalo, faaaliga faaletagata lava ia, se faatuatua sili atu, malosi, mafanafana, se iloa sili atu, ma se mana faateleina.

O le taimi e faaalu i totonu o le malumalu o le a fesoasoani ia te oe e te mafaufau faaselesitila ai ma pu’e ai se vaaiga po o ai moni lava oe, o ai e mafai ona e avea ai, ma le ituaiga o olaga e mafai ona e mauaina e faavavau. O tapuaiga e le aunoa i le malumalu o le a faaleleia ai le ala e te vaai ai ia te oe lava ia ma le auala e fetaui lelei ai oe i le fuafuaga ofoofogia a le Atua. Ou te folafola atu lena mea ia te outou.

Ua folafola mai ia i tatou o totonu o le malumalu e mafai ona tatou “maua ai se atoaga o le Agaga Paia.”¹⁹ Vaai faalemafaufau i le uiga o lena folafolaga e tusa ma le matala o le lagi mo tagata taitasi e saili ma le naunautai mo le upumoni e faavavau.

Ua aoaoina foi i tatou o tagata uma e tapuai i totonu o le malumalu e o ese mai ma le mana o le Atua atoa ma agelu ua i ai le “tausiga i o latou luga.”²⁰ I le avea ai ma se tamaitai po o se alii ua maua faaeega paia ma ua faaauupegaina i le mana o le Atua, e faapefea ona faateleina lou talitonuga mautinoa i le iloaina e te le tau feagai ma le olaga na o oe? E faapefea ona e mauaina le lototele mai le iloaina o le a fesoasoani moni agelu ia te oe?

Mea mulimuli, ua folafola mai ia i tatou o le a le manumalo lava “pulega o le amioleaga” ia i latou o ē tapuai i totonu o le maota o le Alii.²¹

O le malamalama ai i avanoa faaleagaga ua mafai ona maua i totonu o le malumalu e taua tele ia i tatou taitoatasi i aso nei.

O’u uso e ma tuafafine pele, o la’u folafolaga lenei. E leai se mea e sili atu ona fesoasoani ia te oe e pii mau ai i le āi u’amea²² nai lo le tapuai i totonu o le malumalu i le tele e mafai ona faatagaina ai e ou tulaga. E leai se mea e sili atu ona puipuia oe a o e fetaia’i ma puao pogisa o le lalolagi. E leai se mea e faamausali ai lau molimau i le Alii o Iesu Keriso ma Lana Togiola pe fesoasoani e te malamalama atiliai i le fuafuaga ofoofogia a le Atua. E leai se mea e sili ona faamālūina lou agaga i taimi o tiga. E leai se mea e siliona tatalaina le lagi. E leai se mea!

O le malumalu o le faitotoa lea i faamanuiaga silisili ua teuina e le Atua mo i tatou taitoatasi, aua o le malumalu ua na o le pau lea o le nofoaga i le lalolagi e mafai ona tatou maua ai faamanuiaga uma na folafola atu ia Aperaamo.²³ O le mafuaaga lenei o loo matou faia ai mea uma i lo matou malosi, i lalo o le taitaiga a le Alii, ia faia faamanuiaga o le malumalu ia maua atili e tagata o le Ekalesia. O lea, matou te fiafia lava e faasilasila atu ua matou fuafua e fausia se malumalu fou i nofoaga taitasi nei e 15:

Uturoa, Farani Polenisia
Chihuahua, Mekisiko
Florianópolis, Pasila
Rosario, Atenitina
Edinburgh, Sikotilani
Brisbane, eria i Saute o Ausetalia
Vancouver British Columbia
Yuma, Arisona
Houston, Eria i Saute o Texas
Des Moines, Iowa
Cincinnati, Ohaio
Honolulu, Hawaii
West Jordan, Iuta, ISA
Liae, Iuta
Maracaibo, Venesuela

O’u uso e ma tuafafine pele, ou te molimau atu o le Ekalesia lenei a Iesu Keriso o le Au Paia o Aso e Gata Ai. O loo tu o Ia i lona faauluuluga. O i tatou o Ona soo.

Ia tatou olioli i le toefuataiga o ki o le perisitua, lea ua mafai ai e oe ma a’u ona olioli i faamanuiaga uma faaleagaga ua tatou loto ma agavaa e maua. O lea ou te molimau atu ai i le suafa paia o Iesu Keriso, amene.